Doiqnaj miz gingq raen, boux- boux gaen daeuj guh. Dahlieng sam beixnuengx cungj baenz vunz le, gyoengq bouxgeq Mbanjnazloek uk- gyaeuj bienq lo, lwgmbwk lwgsai cungj soengq haeujhag doegsaw, seizneix, gyoengq lwgmbwk Mbanj- nazloek boux dang lauxsae, boux dang canghyw, boux youq cwngfuj dang- daeuz、 guh saeh miz daihbaj.

Geij bi gonq, ndawmbanj guh roen, Dahlieng bang ngaenz cib fanh maenz; ndawmbanj rangh dienh, Dahlieng bang ngaenz haj fanh maenz. De naeuz:“Gyaeu mbouj gyaeu, raemx ndawmbanj swiqnaj; caen mbouj caen, dah ndawmbanj ciengx hung.” Bangbang vunzmbanj, de caen sim caen eiq, seizneix yaek dauq ranzmeh, Dahlieng hix naemj bangbang gyoengq beixnuengx ok di rengz, de caen ngeix mbouj daengz, seizneix gwndaenj ndei lo, bouxboux miz ngaenz, de naemj lai ok di ngaenz hix deng gyoengq beixnuengx euq.

“Ginghlij, Gou suenq ndei lo, lajfwngz raeuz itgungh miz it fanh lingz betcib boux vunz guhhong.” Boux bangfwngz haeujdaeuj naeuz.

“Ndei, gou rox lo.” Dahlieng naeuz.

Boux bangfwngz okbae le, Dah- lieng dwk dienhvah dauq bae ndaw- mbanj, caeuq goengdaeuz ndawmbanj doxyaeng, de daengq goeng daeuz- mbanj, naeuz bineix gij makdoengj makgam ndawmbanj couh mbouj yungh rag okbae gai lo, daengz ngoenz lwgmbwk guhdoih dauq ranzmeh, gyoengq lwgmbwk lwgsai guhdoih bae mbaet mak, de bang boux mbanj dawz mak gai liux bae.

Seiq

Bet nyied, haeux fag mak henj, ngoenz guhdoih dauq ranzmeh daengz lo, ga roen doeng haeuj Mbanjnazloek song mbiengj baek rim geiz, vava loegloeg itloh iet daengz ndawmbanj bae. Gwnz dou mbanj venj daeng- loengz, nem doiq nding, gwnz doiq raiz naeuz “Miz gwn miz daenj mbouj lumz gungcanjdangj, ndangcangq majhung mbouj lumz bohmeh” “Beixnuengx cingzngeih mbouj goenq, angqcoux lwgmbwk maranz” daengj.

Gyangmbanj dap miz daiz ciengqheiq, gwnzdaiz bu ndei damj nding, hoengzfwgfwg, seizneix cingq cienz ok diuz go 《Ciengz Dauqranz Yawjyawj》, sing go hap bya hap rungh. Doiqnaj daizheiq cingjcingj caezcaez baij miz betcib aen daiz gwn haeux, daiz henj daengq nding, cuengqda yawj bae, daengx mbanj hoengz- fwgfwg. Lingh baih gyaeujmbanj, geij- cib boux beixnuengx nangzbawx nyaengq dajcawj, oenq feiz gveuj- foenfoen, sing riu gyukcumcum.

Gyoengq lwgmbwk bouxboux daenj buhhoengz vinj hoengz ciuq seizgan daeuj daengz gyaeujmbanj. Gyoengqde miz boux ram mou ram yiengz, miz boux rap bit rap gaeq, miz boux riuj dangz riuj bingj, miz boux dawz mak dawz va, boux gaen boux nauhnauh yiedyied, miz gangj miz riu, angqangq yangzyangz byaij haeuj mbanj daeuj, yaepseiz, ndawmbanj gyong laz yiengj dungdung cangcang, bauqciengh hongz bili bala, vunz- mbanj ndwn youq song mbiengj roen, bouxboux dopfwngz angqcoux.

Geijlai daih roengzdaeuj, Mbanj- nazloek mbouj caengz baenzneix nauhyied gvaq, gyoengq lwgmbwk daeuj daengz ndawmbanj, doxiu hwnj gwnz daizheiq bae baizdoih ingj- siengq, boux daemq naengh youq geij hangz baihnaj, boux sang ndwn youq geij baiz baihlaeng, coih bae coih dauq guh baenz buenq ngoenz cij ingj ndei.

Goeng daeuzmbanj daeuj daengz gwnz daizheiq naeuz:“Gyoengq lwg- mbwk lwgsai gak boux dingq ndei lo, ngoenzneix gyoengq lwgmbwk mbanj raeuz cungj dauq caez lo, gyoengqde miz mbangj boux liz mbanj geijcib bi mbouj dauq gvaq, mbanj raeuz bienq- vaq baenzlawz yiengh hix mbouj rox, ciep roengzdaeuj, gyoengq lwgmbwk sien gvaq gyangmbanj bae byaijbyaij, yawjyawj ranzmbanj raeuz seizneix caeuq gaxgonq miz maz mbouj doxdoengz, doeklaeng daihgya hwnj ndoi bae guhdoih mbaet mak.”

Mbanjnazloek gaxgonq daih- bouhfaenh dwg ranznamh, gwnz hoemq haz. Ranz ceiq fatcaiz dwg ranzcien, gwnz hoemq vax. Roen luengq dwg roen namh, dauqcawq dwg haex mou caeuq nyouh vaiz. Ngoenz ndit foenx gienjfoenfoen, haeu nyouh haeu haex; ngoenz fwn, namhboengz mbaeqmbatmbat, mbouj daenj suijhaiz cungj mbouj rox baenzlawz yamq din. Haex mou sanq, haex vaiz mbej, dwg hinj dwg rueg. Seizneix, ndawmbanj ranzlaeuz cingjcingj caezcaez, aen- aen moqsaksak, roen luengq bae suijniz bingzcwtcwt、seuqfwtfwt, lij cang miz lohdaeng dem, ndawluengq giz hab ndaem va couh miz va, giz hab ndaem faex couh miz faex, vunz byaij gvaq gyangmbanj, sim singj- swdswd.

Gaxgonq, laengmbanj dwg ndoeng faexge ndeu, mwh Dahlieng youq hag doegsaw, baez daengz seiz ndaem faex, lauxsae couh daiq gyoengq hagseng hwnj bya bae ndaem goge, bibi ndaem faex mbouj baenz ndoeng, goge maj mbouj vaiq, geijcib bi lij mbouj caengz baenz gai. Seizneix ndoeng goge mbouj raen lo, najda bo rangh bo cungj dwg gomak, gij mak neix ranzranz miz faenh, ndawmbanj baengh ndaem mak demlai mbouj noix souhaeuj.

Gwnz bo makgam, mak henj- rwdrwd hoij rim go, gyoengq lwgmbwk daeuj daengz gwnz bo mak, nyaengq dwk mbaet mak. Miz dah ndeu gvaqdaeuj cam goeng daeuzmbanj naeuz:“Raeuz baenzlai vunz mbaet mak, gai gvaq gizlawz bae?”

Goeng daeuz riuhaha naeuz:“Mbouj youqgaenj, sou roengzdaeuj couh miz vunz cawx.”

Byongh ngoenz gvaqbae, gij makdoengj youq ndawmbanj doi rim lumj goengq bya iq nei. Seizneix miz song aen cihuq hai haeuj ndawmbanj daeuj, geij daegcoz daj gwnzci buen roengz doi loengxceij he. Goeng daeuzmbanj raen seizgan daengz lo, daengz gwnz daizheiq bae daihsing naeuz:“Gyoengq beixnuengx, daihgya dingq lo, bet nyied cibngux yaek daengz lo, Dahlieng gietdingh cawx aeu gij mak mbanj raeuz guh leix soengq hawj gyoengq vunzhong de gvaqciet, moix boux song sieng mak, gij mak mbanj raeuz daihgaiq hix cij miz ngeihcib fanh lai gaen, ngamq- ngamq gaeuq hawj de, seizneix ci daeuj rag mak lo, ciep roengzdaeuj, gyoengq lwgmbwk youq neix cang sieng hwnj ci, gyoengq lwgsai laeb- daeb hwnj ndoi bae mbaet mak.”

Gyoengq beixnuengx gyoengq vunzmbanj dingq le, bouxboux doek- saet. Dahlieng naeuz:“Gou miz ngoenzneix, dwg baengh dieg mbanj raeuz wngq gou, dwg baengh gyoengq bohmeh beixnuengx mbanj raeuz fuk gou, ndaej bang bouxmbanj bang bohmeh dwg aen maqmuengh gou, muengh daihgya gaej naemj bae naemj dauq o.”

Gak boux gak miz hong, gak boux gak nyaengq hong, aen ciengzmienh neix couh lumj aen ngeihcib sigij caetcib nienzdaih vunzlai doengzdoih guhhong nei, sing hemq sing riu langh doh daengx mbanj.

Haj

Daengngoenz yaeng’yaeng sou bae geu rongh doeklaeng, mokhaemh yaeng’yaeng roemj roengz daihdeih, haemhneix, Mbanjnazloek daeng ronghsagsag, ciuq ndawmbanj rongh lumj banngoenz nei.

Gwn caeuz seiz, gyoengq lwg- mbwk faen guh bet buek, baez aen daiz baez aen daiz gvaqbae hawj gyoengq vunzmbanj gingq caz gingq laeuj. Gingq bohmeh bouxgeq, hoh gyoengqde gwn ndei daenj ndei youq ndei, hoh gyoengqde ndangcangq, ngoenzngoenz gvaq ndaej angqyangz; gingq beixnuengx bajliuz, hoh gyoengqde caux miz gwn guh miz daenj, bibi ngaenz rim daeh, saehsaeh swnh hoz swnh sim; gingq lwglan, hoh gyoengqde maj sang ndangcangq, hagsib ndei, bouxboux baenzcaiz.

Laeuj gvaq sam baez, gwnz daizheiq ciengq hwnj diuz go《Yinh Ndei Daeuj》——

Yinh ndei daeuj hoh mwngz yinh ndei daeuj,

Yinh ndei daiq daeuj le angq caeuq gyaez,

……

Haihij ciengqheiq lo, gwnz daizheiq saekdaeng myab laep myab rongh, ciep daeuj, lwgmbwk lwgsai, bouxgeq lwgnyez doxlwnz hwnj daiz ciengq go diuqfoux. Ndawmbanj angqyangz, nauhyied, raeujrub.

Lwnz daengz gyoengq lwgmbwk caeuq gyoengq nangzbawx hwnj daiz doiqfwen lo.

Gyoengq lwgmbwk ciengq naeuz:“Dou haq bae ranz vunz, gwnz ranz mbouj ndaej goq, vut ce meh ce boh, sinhoj gyoengq beixnangz.” Gyoengq nangzbawx ciengq naeuz:“Biek doxlwnz guh faen, maenz doxlawh guh ceh, raeuz hix miz ngoenz geq, bohmeh aeu hoh ndei.” Gyoengq lwgmbwk ciengq naeuz:“Dou bae ranz vunz youq, mbouj ndaej ciengx bohmeh, lwg’eng youh bouxgeq, ce rap hawj sou dawz.” Gyoengq nangzbawx ciengq naeuz:“Lwgsai geq aeu baz, lwgmbwk geq haq vunz, sou miz daenj miz gwn, hix gaej lumz baeuqyah……” Gyoengqde mwngz ciengq gou dap, mwngz coenz gou coenz, coenzcoenz miz cingz miz leix, coenzcoenz haeuj sim haeuj saej, ciengq ndaej gyoengq vunzmbanj bouxboux gamjdoengh.

Ciep roengzdaeuj couhdwg gyoengq lwgmbwk fat hoengzbau hawj gyoengq bouxgeq ndawmbanj, roekcib bi doxhwnj bouxboux miz faenh.

Vunz lai daizheiq iq, gyoengq bouxgeq faen guh geij baez hwnjdaiz, gyoengq lwgmbwk fat hoengzbau hawj vunzgeq, youh dawz sujbaq caeuq batraemx gvaqdaeuj, swiq din swiq naj vunzgeq. Seizneix, gwnzdaiz yienznaeuz mbouj ciengq go mbouj gangj vah hix mbouj diuqfoux, hoeng gyoengq lwgmbwk bouxboux yungh cingz yungh sim, gyoengq bouxgeq bouxboux gamjdoengh, gyoengq vunz- mbanj bouxboux haenh ndei.

Ciengz heiq neix guh sat lo, gyoengq vunzmbanj lij naengh youq naj daizheiq, nanznanz mbouj naemj dauqbae.

Baez dauq ranzmeh neix gvaqbae lo, gyoengq lwgmbwk Mbanjnazloek lij nanznanz mbouj lumz, gyoengq vunz Mbanjnazloek roxnyinh gij heiq angqyangz neix lij heux youq gyang- mbanj.

（2 sat）