Ngux nyied co’ngux yaek daengz, gyoengq- vunz guh soujgunghyi Bwzswz Si Yougyangh Gih cingq cagaenj guh momeh. Momeh dwg cungj doxgaiq conzdungj ndawbiengz Bouxcuengh aeu bae hoij cang haenx. Baez daih’it yawjraen momeh, mwngz haengjdingh roxnyinh yienghceij de ndeigyaez raixcaix, bouxvunz iqet yiengh ndeiriu ndeigyaez yungh baengzva guhbaenz, ndawrungj umj aen giuz hunghung ndeu.

Momeh cawjdaeuz youq Bwzswz Yougyangh、Denzyangz、Denzdungh、cauzlueg Bingzgoj caeuq Lozyez、Lingzyinz、Denzlinz doengh aen yienh diegbya neix riuzcienz, gij dinfwngz nyibguh momeh Bouxcuengh Yougyangh daengz seizneix gaenq miz geij bak bi lizsij lo. Ngux nyied co’ngux, vunz dangdieg aeu momeh ma cangndang, naeuz de ndaej gyaep yakrwix, vunz raek le cix haemq simdingh. Cungj de hunghung iqiq cungj miz, lai saek lai yiengh, ndawde oet miz go’ngaih、rum hom、vujgyahbiz、makraeu、gofuz daengj cib geij cungj ywdoj, heiq homhom rangrang, baengz baihrog siuq miz gij doz gitleih, daengx aen couh guhbaenz yiengh vunz iqet umj aen giuz ndeu. Momeh, Vahcuengh couh baenzneix heuh, couhdwg duzbaed caeuq daxmeh, aen yiengh de dwg daj ndaw《Goj Duzlungz Caeuq Daengngoenz》gij cienzgangj gaeuqgeq Bouxcuengh neix daeuj.

Cienzgangj, cawlungz dwg bohfeiz daeng- ngoenz, daengngoenz baengh gij feiz neix ciuq rongh aenbiengz, duzlungz cix guh duzbaed henyawj cawlungz. Miz ngoenz ndeu, cawlungz sawqmwh doek youq henzhamq Cwngzbizhuz, bouxcoz Boux- cuengh Bwzvangz gwn le haujlai haemzhoj, cij bang duzlungz ra raen naed cawlungz, hawj daengngoenz dauq ndaej ronghsagsag. Ngoenz ra raen cawlungz haenx cingqngamj dwg ngoenz ngux nyied co’ngux. Vih geiqniemh Bwzvangz bouxyinghyungz Boux- cuengh hawj aenbiengz dauq rongh neix, caeqbaiq duzlungz caeuq daengngoenz, mehyah Bwzvangz dem vunzcug aeu baengz caeuq go’ngaih guhbaenz boux vunz iqet、ndawrungj umj aen daengngoenz ndeu, an coh guh “momeh”, eiqhoz naeuz henhoh daengngoenz. Doeklaeng vunzlai youq gij bak Dah- yougyangh、Dahngozgyangh、Cwngzbizhuz doxgap gyonjcomz haenx hwnq aen daiz caeq duzlungz, nyibguh momeh bae geiqniemh bouxyinghyungz Bwzvangz, muengh daengngoenz、duzlungz henhoh gyoengqde seiqseiq daihdaih an’onj. Daj neix gvaq- laeng, moix daengz ngux nyied co’ngux, gyoengq- vunz Bwzswz cungj gag nyib momeh doxsoengq, hoh vunzlai youq ndei gwn van.

Momeh conzdungj dingzlai aeu baengz nding、henj、loeg、ndaem、hau haj saek daeuj guh, vunz Bouxcuengh nyinhnaeuz haj saek neix dwg gim、faex、raemx、feiz、doem, vujhingz doxseng doxhaek, ndaej cawz bingh gyaep fangz. Gij raiz dajcang cawjdaeuz miz gorum、gofaex、vengqfwj、aennyenz、duzlungz、duzfungh daengj. Mehmbwk Bouxcuengh doxsoengq ma cangndang, gwnzndang lwgnding goj dingh aeu seizseiz raek dwk, naeuz momeh ndaej dinghsim、gyaep fangz gaij doeg、ywbingh daengj.

Momeh hojguh dahraix, aeu oet haujlai cungj ywdoj haeujbae, gag nyibguh couh miz cib geij bouh lo. Daj sourom、lienh ywdoj daengz nyib baenz, moix diuz mae moix mbat cim cungj yo miz gij cingzngeih bouxdajnyib. Vihliux hawj bouxcoz engq rox caeuq gyaezmaij momeh, vunzlai cingq mboujduenh cauhmoq, lumjbaenz guh momeh nyumxlab、 baengzdoj、man、 ndoksan daengj lai cungj lai yiengh vwnzva minzcuz bonjdieg Bouxcuengh Bwzswz caeuq gij yenzsu ndwenngoenz seizhwng, hawj daegsaek Bouxcuengh engq yienjda; daegbied caiq dem haeuj faexdanzyangh caeuq faexbozmuz hom, hawj heiqhom daj geij ndwen lienzdaemh daengz cib bi doxhwnj; aeu cungj nyibfap nyib mbouj raen riz haenx, momeh couh bienqndaej engq gyaqciq; guh lai yiengh momeh, lumjbaenz momeh soijrwz、momeh hoij soujgih、momeh cam、momeh hoij daeh……

Gij giyez minzcuz diegde lij caeuq fulenz doxgap, bae daengz mbanj hojndoq guh hozdung son dinfwngz guh momeh, hawj mehmbwk baengh hag guh momeh rom di cienzngaenz he. Vunzlai caemhcaiq haeuj hagdangz guh langhbaij, gyoengq lwgnyez ndaej daejniemh yienghndei feihyiz, ciepcienz vwnzva conzdungj. Seizneix, momeh hix daj doxgaiq gitleih bienqbaenz doxgaiq dajcang ndaw ndwenngoenz vunzlai, menhmenh yungzhaeuj saedceij vunzlai bae.

（Swhliu daj Swcigih Vwnzva Caeuq Lijyouz Dingh, Gvangjsih Minzcuz Bozvuzgvanj aeu）