It

Mbanjnazloek daihdaih lwgsau lai, suenq hwnjdaeuj miz song bak lai boux lwgmbwk haq ok baihrog bae.

Gyoengq lwgmbwk ndawmbanj boux haq gyae boux haq gyawj, miz boux youq ranz guhhong, miz boux okrog bae dajgoeng, bi daengz haemh mbouj miz geijlai boux ndaej dauq ranzmeh, couhdwg daengz ngoenz cietheiq ndaej dauq, hix dwg boux nyaengq yienghneix boux nyaengq yienghhaenx, mbouj miz geijlai boux ndaej doxraen, engq mbouj miz geijlai boux ndaej guhdoih naengh roengz- daeuj gangjgoj guhcaemz.

Dahlieng caeuq geij dah baengz- youx doxyaeng, gietdingh daengx mbanj lwgmbwk guhdoih dauq ranz- meh baez ndeu.

Song bak lai boux lwgmbwk guhdoih dauq ranzmeh, gienh saeh neix mbouj dwg saeh iq. Aeu cingj daengx mbanj bohmeh bouxgeq、bouxnuengx lwglan guhdoih gwn donq haeux ndeu, aeu miz caet betcib daiz byaek, yienghneix couh deng aeu gaj mou gaj yiengz, dang bit dang gaeq, mbouj miz cib fanh bet fanh maenz ngaenz hix aeu miz haj roek fanh maenz ngaenz cij gaeuq yungh, gyoengqde gietdingh heuh gyoengq lwgmbwk gien ngaenz, boux miz lai gien lai, boux miz noix gien noix, ceiq noix moix boux hix aeu gien song bak maenz cij ndaej.

Dahlieng naeuz:“Raeuz baenz ciuh beixnuengx, gaej gangj baenzlai lo, baez dauq ranzmeh neix, yungh bae geijlai ngaenz couh gou boux ndeu ok ba, gyoengq beixnuengx lai couh mbouj yungh feiqsim lo.”

Coenz vah Dahlieng baez ok bak, couh lumj ndaek rin hung ndeu doek roengz ndawdah bae nei, raemx sinzfoenfoen, miz boux doeksaet naeuz:“Dahlieng dwg mbouj dwg gip ndaej ngaenz hoem ha, baenzlai daihfueng.”

Miz mbangjboux mbwnjbak naeuz:“Dahlieng miz di ngaenz he couh naemj yienghneix guh ndaeng- gon, seizneix song bak maenz ngaenz bouxlawz mbouj miz, lij yungh daengz de yienghneix guh fauh dem?”

Dahlieng naeuz gag ok ngaenz guh baez saeh dauq ranzmeh neix, gyoengq beixnuengx doih mbouj doengzeiq, Dahlieng naeuz:“Ndaej, couh daihgya gien ngaenz guh ba.”

Ngeih

Mbanjnazloek miz betcib lai ranz, seiq bak lai vunz, aen mbanj neix miz bya miz ndoi miz raemx, ga dah iq ndeu daj gizgyae lae daeuj, hopngomx aen mbanj le youh utut eujeuj lae coh gizgyae, raemx dah sawdikdik, bi daengz haemh lae mbouj dingz. Gaxgonq caengz miz dienh seiz, mbouj miz gihgi cou raemx dwk naz, vunzmbanj couh guh loek daeuj daek raemx dwk naz, biendah dauqcawq dwg gij loek aeu faexbya guh gaenz, aeu faexndoek guh mbaengq daek raemx, aen loek ngoenzhwnz baenq mbouj dingz, dawz gij raemx ndawdah mbouj dingz dwk daek haeuj ndawnaz bae, mboujlwnh mbwn baenzlawz rengx, gij reihnaz dieg neix cungj ndaej ndaem haeux. Aenvih loek lai naz lai, vunz couh heuh aen mbanj neix guh Mbanjnazloek.

Gwnzndoi Mbanjnazloek ndaem rim makdoengj caeuq makgam, bi daengz seiz mak cug, mak henj rim bo, hohhoh fatcaiz.

Gyoengq lwgmbwk naemj guh- doih dauq ranzmeh gienh saeh neix, gyoengq lwgsai ndawmbanj rox le, couh doxcomz gvaqdaeuj, doxyaeng baenzlawz guh.

Miz vunz naeuz:“Naj fwngz dwg naeng, laeng fwngz dwg noh, beix- nuengx raemxmboq, bohmeh raemx- rongz. Gyoengq lwgmbwk dwg beix- nuengx raeuz, gyoengqde miz aen sim neix, raeuz guh vunz ranzmeh hix aeu bang gyoengqde baenzlawz guh ndei gienh saeh neix.”

Gyoengq bouxcoz doxcomz gvaq- daeuj, doxyaeng senj ngoenzndei、doxyaeng bwh maz doxgaiq. Vunz- mbanj lij gietdingh ngoenzhaenx gyoengq lwgmbwk daeuj daengz le, banngoenz daiq gyoengqde bae youz- youz suenmak、naenghnaengh saz; banhaemh guh daiz heiq ndeu, boux rox ciengq go couh ciengq go, boux rox guhfwen couh guhfwen, boux rox diuqfoux couh diuqfoux.

Goeng daeuzmbanj naeuz:“Seizneix vunz cungj youq gwnzvangj gai mak, gyoengq beixnuengx dauq le, raeuz heuh gyoengqde bangbang raeuz, dawz gij mak mbanj raeuz ingjsiengq le fat hwnj vangj bae, gangj mbouj dingh hix ndaej gai okbae di mak he bw.”

Goeng daeuzmbanj gangj ndaej deng, Mbanjnazloek couhdwg mak lai, bi daengz seiz gai mak cungj hawj vunz sieng uk. Bi gai ndaej swnh, song sam ndwen couh gai liux lo, bi gai mbouj swnh, gai daengz bilaeng cungj gai mbouj okbae, mak loenq laj goek moj bae, mbouj gangj noix bae geijlai souhaeuj, yawj daeuj cungj hawj vunz sim’in.

Sam

Haetromh, Dahlieng daeuj daengz bangunghsiz, de heuh boux guhsaeh bienndang gvaqdaeuj, naeuz:“Siujdungh, mwngz bae suenqsuenq yawj, raeuz miz geijlai vunzhong, baugvat gij vunz caeuq raeuz ciengx bit ciengx gaeq haenx, suenq ndei le bauq soq hawj gou.”

Dahlieng dwg dahmbwk ndaw- mbanj ceiq baenzsau ndeu, daj iq daengz hung vunzmbanj bouxboux ndiep de, baez raen de cungj dwg ndiepgyaez caeuq de doxdongx, caeuq de gangjgoj.

Dahlieng seizneix youq diegrog gag hai gunghswh, aen gunghswh de gag faeg gaeqlwg caeuq bitlwg. Haidaeuz, gunghswh cij dwg gai gaeqlwg、bitlwg, seizneix lij guh swzliu dem. Caemhcaiq hengzguh “gunghswh gya bouxciengx doxgap dajciengx”, gunghswh bau ok gaeqlwg、swzliu caeuq bau dajcim re bingh、son baenzlawz guenjciengx, boux dajciengx bau ok dieg ciengx、okrengz guenj, gaeq ciengx hung le, gunghswh ciuq dangseiz gyaqcienz gwnzhaw sou gaeq hung doxdauq, caiq gai daengz daengx guek gak dieg, yienghneix bouxciengx miz canh mbouj miz sied, boux maij caeuq gunghswh doxgap ciengx gaeq yied daeuj yied lai. Seizneix youq lajfwngz gunghswh ciengx gaeq couh miz gouj cien lai ranz, aen gunghswh Dahlieng bi souhaeuj cien ngaenz fanh cienz mbouj gangj vunz hix rox lo.

Yaek guhdoih dauq ranzmeh, Dahlieng roxnyinh miz di sieng uk, geij ngoenz neix de cungj naemj gienh saeh neix.

Dahlieng ranz youq gyaeujmbanj, gaxgonq dwg aen ranz aeu rin caep ciengz、baihgwnz hoemq haz ndeu, seizneix aen ranz de dwg aen laeuz sam gan song caengz、dingjranz cang vax henj、ciengz ranz nem menghau、cueng nding gingq loeg ndeu, aen ranz neix dwg song bi gaxgonq hwnj ndaej, haeuj mbanj couh yawjraen aen ranz de gonq, aen ranz neix dwg aen “naj” Mbanjnazloek.

Gaxgonq ndawmbanj mbouj doeng goengloh, mbouj miz ci vaij, haeujok gig sinhoj; mbouj doeng raemx, vunzmbanj gwn raemx lij aeu doengj daengz ndawdah bae rap; mbouj doeng dienh, banhaemh ciuq rongh cungj dwg diemj daengyouz- haeu, Dahlieng couh youq laj daengyouzhaeu majhung, youq laj daengyouzhaeu doegsaw hagsib.

Gyoengq bouxgeq ndawmbanj ukgyaeuj gaeuq, cungj nyinhnaeuz lwgmbwk doegsaw mbouj miz yungh, nyinhnaeuz ciengx lwgmbwk dwg bang lwg bouxwnq ciengx bawx, soengq lwgmbwk bae doegsaw dwg bang ranz bouxwnq doeg, gyoengqde cungj mbouj maij soengq lwgmbwk haeujhag doegsaw, ndawmbanj ban vunz Dahlieng neix, mbouj miz geijlai boux lwgmbwk rox saw.

Daxboh Dahlieng seng Dahlieng sam beixnuengx mbwk, de caeuq vunzmbanj naemj mbouj doxdoengz, de naeuz:“Ranz miz lwgsai ndaej bae doegsaw, ranz raeuz cij miz lwgmbwk, danghnaeuz mbouj hawj lwgmbwk bae doegsaw, ranz raeuz daj ciuh neix hwnj couh baenz ranz sawmengz lo, lwgmbwk lwgsai hix dwg lwg, lwgmbwk lwgsai hix wnggai aeu doegsaw.” Couh yienghneix, Dahlieng sam beixnuengx cungj ndaej haeujhag doegsaw. Seizneix dahcej dang lauxsae, dahnuengx youq ndawyienh guhhong. Youq Mbanjnazloek, ranz Dahlieng dwg ranz “ndawrungh mbin ok sam duz fungh” ndeu, nyex ndaej ndawmbanj bouxboux dahoengz.（1）