Ngoenz ndeu, bak fwngz da sam boux doengzcaez youq, gyoengqde yied gangj sing yied sang, mbouj geijlai nanz, nauh daengz mbwn fan namh loemq lo.

Fwngz hujdengdeng gangj:“Sou boux he ngamq rox gwn, boux he ngamq rox yawj, gij haemz gij hoj cungj dwg gou deng.” Bak caeuq da dingq le mbouj doxyaeng couh doengzcaez naeuz:“Yienghneix cungj dwg vih mwngz ne!”

“Vih gou?” Fwngz engq huj lo, “vihmaz mbouj bang gou guhhong?” Fwngz dingz mbat ndeu, sing haenq gangj bak:“Cungj heuh gou dawz daeuj hawj mwngz gwn, cengqek maz ne?”

Bak dingq le hozndat ndaej gangj mbouj ok vah.

Da raen gijneix, doq da daengx cim coh fwngz gangj:“Mbouj ndaej yienghneix ndaq daeggo bak! Mbouj miz de, mwngz caeuq gou doq mbouj ndaej lix bw!”

“Bi!” Fwngz youh ndaq hwnj- daeuj lo, “mwngz bang bak cengj maz hwet, di faenx he ciemq mwngz, hix heuh gou bang mwngz buen deuz, vihmaz mbouj heuh daeggo bak bang mwngz? Baezlaeng, mwngz dawz haeux hawj de gwn, de bang mwngz buen deuz gij faenx, gou mbouj dam sou lo.”

Da baez dingq couh gienq naeuz fwngz:“Mwngz gangjriu couh baenz, gaej gangj dahraix bw! Raeuz gak boux bonjsaeh mbouj doxdoengz, aeu doxbang doxgap cij baenz!”

“Aeya, caeuq gou gangj dauhleix lo! Gou mizrengz, rox guhhong, gou mbouj baengh sou.” Fwngz doq gangj doq gaemxgienz dub roengz gwnz congz bae.

Seizneix da hix gig ndatheiq, naeuz:“Gij vah neix duh mwngz gangj bw!”

“Duh gou gangj, baenzlawz?” Fwngz buek gangj.

Da engq mbouj fug lo, naeuz:“Coenz vah mwngz gangj dingh?”

“Gou gangj dingh.” Gij sing fwngz sang gvaq gij sing da.

Daj baezneix hwnj, da ndoj haeuj ndaw naengda bae ninz, bak hix haep youq mbouj gwn mbouj ndoet, fwngz nyinhnaeuz bonjfaenh ndaej ceng hingz, daekeiq fwngfwng bae guhhong. Hoeng, aenvih mbouj miz da yawj, maz cungj yawj mbouj raen, cijndei luenh gaem luenh bungq, maz cungj guh mbouj baenz, dauqfanj ndaw fwngz deng bungq, in ndaej de saenzrwdrwd.

Ngoenz daihngeih, bak rox fwngz caengz bae guhhong, couh cam:“Nuengx fwngz, mwngz ngoenzneix baenzlawz caengz bae guhhong?”

“Hai! Gou daengx ndang unq- ngaeungaeu, gizsieng gig manh, hix mbouj rox youq gyawz, lau guhhong youh deng bungq, baenzlawz bae guhhong ne?” Fwngz dap.

“Ha?” Bak gyajcang geizheih naeuz, “mwngz mbouj dwg naeuz mwngz ndang cungj mizrengz ha? Baenzlawz yaep ndeu doq baenz yienghneix?”

Fwngz cij ngaemgyaeuj mbouj han.

Bak raen seizgei daengz lo, naeuz fwngz:“Baenzneix mwngz rox gij vah nuengx da ngoenzlwenz naeuz luba! Mwngz gag naemjnaemj.”

Fwngz simfug lo, gij sing daemqdiddid naeuz:“Gou loek lo, mwngz naeuz hawj gou baenzlawz guh ba?”

“Yienghneix couh yawj mwngz lo.”

“Yawj gou?” Fwngz cam, “seiz- neix gou vanzlij ndaej guh maz dem ne?”

Bak naeuz:“Mwngz bae heuh nuengx da okdaeuj gonq, yienghneix mwngz couh yawj ndaej raen lo. Caemhcaiq lumj doenghbaez nei dawz haeux hawj gou gwn, gou ndaej gwn haeux le, mwngz couh mizrengz bae guhhong lo.”

Fwngz ciuq gij vah daeggo bak gangj bae guh. Dahraix, fwngz baez bae heuh da, yienznaeuz da mbouj caeuq de gangj vah, hoeng da hai da lo, doiqnaj fwngz mbouj laep- saengsaeng lo, doq bienq ndaej ronghsaksak. Bak ndaej gwn haeux le mbouj geijlai nanz, fwngz hix mbouj rox mbouj nyinh mizrengz lo. Aenvih yawj ndaej raen, de bae ra yw daeuj dwk gizsieng, guhhong hix mbouj aeu yousim bungq deng lo.

Daj baezneix hwnj, bak fwngz da doengzcaez boiqhab guh saeh, caiq hix mbouj doxceng lo.