Sanhniengzvanh, baihnamz dep Bwzbuvanh, baihlaeng ing Byavuh- leizsanh, daj baihgyae yawj bae, de couh ninz youq benq faexhoengz mwncupcup ndawde. Gij sa gwnz aijsa youh seuq youh bieg youh unq, ndwn gwnz ngauq rin loet, yawj daengngoenz hwnjroengz. Mbanj- dwkbya henzhaij miz 600 lai hoh, ciuhdaih baengh dwkbya gvaq ndwenngoenz, cauhbaenz gij fungsug miz daegsaek haenx.

Sanhniengzvanh cienz miz haujlai goj. Gij coh Sanhniengzvanh couhdwg daj aen cienznaeuz ndawde daeuj: Dieg neix gaxgonq miz sam daegmbauq youqdingh, gyoengqde caemh aen ruz ndeu、fan muengx ndeu、aen mbonq ndeu, doxndiep doxbaengh doxhuz gvaq ndwen- ngoenz. Ngoenz ndeu, sam mehsien daj gwnzmbwn roengzdaeuj, raen aen haij gizneix miz daegsaek, sam lwgmbauq youh gaenx youh baenz- mbauq, siengj haq hawj gyoengqde. Nyawhdaeq rox le, caenh hawj gyoengqde youq lajbiengz sam bi. Geij bi neix, sam bouxgvan ok haij dwkbya, sam mehyah youqranz san re, seng lwg son lwg, ndwenngoenz gvaq dwk angqfwngfwng. Sam bi gvaqbae, nyawhdaeq mbouj raen sam mehsien ma, hujdengdeng, doq ci rumzlaux, nauh haijlangh, dwk fan aen ruzdwkbya gyoengqde bae. Sam mehyah raen yienghneix, doxcaez ndwn henzhaij caj bouxgvan, caih rumz ci langh bongx, ngoenz dem ngoenz, bi gvaq bi, sam bouxsai cungj mbouj raen ngaeuz. Sam de couh bienqbaenz sam ndaek rinvah- ganghnganz sohngaengngaeng bingz- baiz haenx, neix couhdwg “Rin- sanhniengz” lo. Gvaqlaeng vunzlai ciengzseiz aeu va、yieng、lab bae caeqbaiq Rinsanhniengz, yienghneix bae danqhaenh lwgsau gyaeundei caeuq gij doxgyaez giendingh mbouj bienq haenx.

Aijsa Ronghndwen henzhamq Sanhniengzvanh raez 1.5 goengleix, gij sa unqnemnem, deng ndoeng- faex beix dwk. Gij rin henz aijsa、raemxfeuz daengjbyoengbyoeng, gak cungj gak yiengh: Lumj duzromh ajfwed、duzhaijswh boemzyouq、duz- ngozyiz ngiengxgyaeuj、duzgingh hung angq raemx daengj, caen lumjlili. Beijnaeuz Rinmoumeh, daj baihhenz yawj lumj duz moumeh boemzyouq ndawhaij, geij ngauq rin iq luenzlulu lumj moulwg ai youq henzndang moumeh. Cienzgangj, seiz fwzmeumeu haenx, gizneix miz duz- haijcez maj gig lai, hung lumj aenbat, doengh duz de coemjgwn duz moulwg youq henzhaij guhcaemz haenx, moumeh vih hoh moulwg deng dai bae, gyoengq moulwg cix yaek gouq duzmeh caez saet roengz haij bae.

Lij miz Aijbetsien, cienzgangj betsien youz Namzhaij, youq neix yietnaiq, dingjlingz daj gyoengqvunz comzyawj ndawde yawjraen sam mehsien. Betsien mbouj gamj loh gij saeh neix, doq vaiqvaiq deuz bae. Dahsau daegmbauq ndawmbanj cungj gyaez bae Aijbetsien naengh- naengh guhyoux, yienghneix le vunz caemh heuh neix guh Rinfunglouz.

Gizneix dwg ranzmbanj Cunghvaz Bwzhaijdunz, gyawj haij couh ndaej raen duzde lo. Mbangj- baez canghdwkbya okhaij, bwz- haijdunz couh boenq aenruzbya, caeuq vunz guhcaemz, vunz caeuq doenghduz huzndei caemhyouq. Canghdwkbya haengj haijdunz dah- raix, mbouj sieng duzde gvaq, dang duzde baenz vunz ndawranz. Dingq- naeuz, canghdwkbya lij ndaej daj gij dungcoz duzhaijdunz rox aen mbwn dwg mbouj dwg yaek bienq lo, dauqma re rumzhaenq daengj.

Raemxcauz Sanhniengzvanh caemh gig mizmingz, itbuen haj daengz caet ngoenz baenz mbat, moix mbat lienzdaemh sam daengz haj aen cungdaeuz. Daj baihgyae yawj, raemxcauz lumj diuz saibieg raez- rangh ndeu vanggvaq gwnzhaij, cung daeujrumrum. Youq baihhenz yawj, raemxcauz lumj rumzlaux gienj hwnj vanae, mboujduenh bienq sang caiq cung doxroengz, dongj rin henzhamq, raemxhaij dauqcawq sinz, sing gok- sagsag.

Youq Sanhniengzvanh, vunz ndaej vat saehaij、epbya、gaeb duzbaeu, riengz canghdwkbya okhaij dwkbya、soure daengj, daejniemh gij ndwenngoenz mbouj doengz. Youq henzhaij, yawjcoh baihgyae, haij mbwn doxnem, raemx fwj doengz saek, goengqbya mumjgyumq ndaej raen. Aenmbanj baihhenz, gaeq haen ma raeuq, hoenzngeungeu. Caj binghraq gvaqbae, daeuj Sanh- niengzvanh guhcaemz ba, daeuj dingq raemxcauz hwnjroengz, yawj ruzbya baedauq, cwxcaih lai lo.

(Swhliu daj Ginhcouh Si Gvangjden Dijyuz Caeuq Lijyouz Giz、Aen Gingjgih Sanhniengzvanh aeu)