Seiq

Ndwenngoenz lumj daeuq, bi lai baez yaep da couh gvaqbae lo. Song bouxcoz couh yienghneix doxbang doxbaengh, caemh haemz caemh hoj, yied byaij yied gaenh. Ndaw reihnaz cungj ce miz haujlai gij angq riu songde.

Bet nyied cibhaj haemhhaenx, song boux de doxiu daengz laeng mbanj gwnzbya bae baiq ronghndwen.

Haeuj haemh, ronghndwen lumj raemx sawdikdik, songde ciuq fungsug Bouxcuengh dawz nyiedbingj、mak- bug、makbingzgoj daengj gijgwn baij youq gwnzndoengj, youh diemj dawz sam diuz yieng cap hwnj gwnz makbug bae, ndingq caz gingq laeuj……

Youq laj ronghndwen, songde dinghsim lwnh gojgaeq, dingq duz daekgaeuj yiengjvetvet, simmaez gij hom gocoengz、 go’gveiq、 gobat- gak…… Mbouj rox mbouj nyinh couh daengz gyanghwnz lo.

Daegvang lau dahsau dwgliengz, couh duet buhrog bax hawj dahsau, yaek soengq de baema. Dahsau mup dawz gij feihdauh gwnzbuh Daegvang, najnyaenq lo, ndawsim raeujrubrub. De najhoengz dawz ok diuz saihwet saek lengj gyaeundei swhgeij, vaiqvet cug gyanghwet Daegvang bae. Saihwet neix dwg gij huq dinghcingz dah Yauzcuz, dahsau yungh haujlai seizgan cij damq baenz, aeu soengq hawj daegyoux. Daegvang got dahsau gyaeundei unqswnh neix haeuj ndaw- rungj……

Neix aiq couhdwg “yienzfaenh ndei, mehmbwn dingh” luba. Daeg- mbauq Bouxcuengh Daegvang caeuq dah Yauzcuz gyaeundei neix caen baenzranz lo!

Daegvang caeuq mehyah Yauz- cuz doxgyaez doxgingq. Roek bi ndawde, sam boux lwgnyez couh laebdaeb doekseng lo. Ndawhongh iq, ciengzseiz cienz ok gij sing lwgnyez doxgyaep guhcaemz riuhehe, nauh- yied dangqmaz.

Haj

Hoeng, gwnzmbwn rumz fwn nanz liuh. Siengj mbouj daengz youq ngoenz seizhah he, banringzgvaq, Daegvang hwnj bya gvat iengcoengz, bungq gwnzmbwn fwt bienq, fwjlaep cw mbwn, byajraez gvaq le, mbouj geij nanz couh doek fwnraq lo.

Mehyah de hawj lwg iq gwn cij le, gyaudaih gyabuz daiq ndei sam lwgnyez, couh soemh fwn haeuj bya soengq yijyih bae hawj Daegvang. Byawz rox, Daegvang dauqfanj daj roen iq bae ranz lo. Daegvang dauq- ranz mbouj raen yah de, laihnaeuz de haengjdingh hix gig vaiq couh dauqma.

Daegvang caj baenz aen cung- daeuz hix mbouj raen yah de dauqma, ndawsim cij roxnyinh saeh mbouj ndei lo. De yousim dangqmaz, sikhaek cung haeuj ndawfwn bae seiqlengq ra yah de.

Mwh de youq laj bangxdat ra raen yah de byanj laemx daimaez seiz, de simsenz yaek rueg lwed bae!

Fwn hung lienz doek sam ngoenz sam hwnz, mehyah deng sieng hix ninz youq yihyen sam ngoenz sam hwnz. Ngoenz daihseiq, fwn menhmenh iq lo, mehyah de cij menhmenh singjsak gvaqdaeuj.

Mboengq saedceij haenx, Daeg- vang youq ndawsingz yihyen haeujsim dajleix yah de, daxmeh youq lajmbanj bang daiq lwgnyez. Hoeng, gyoengq lwgnyez ngoenzngoenz daejsebseb yaek ra daxmeh, hawj Daegvang simlig naetnaiq engq sinhoj lo.

Mizseiz, de baeg lai, saedcaih dingj mbouj ndaej, cij boemz youq henz mbonq yah de laepda yietnaiq yaep ndeu.

Mehyah ok yen le, gaswix vej lo. Yawj geij laeq lwgnyez ngoenz doek ngoenz majhung, yah de roxnyinh swhgeij nangq hoj ndawranz lo. Ndigah, simcingz de yied daeuj yied fanz, vah hix noix gangj lo, cingsaenz gig mbouj ndei…… Ndaw gyanghongh gij sing riu hix noix raen lo.

Daegvang ngoenznaengz hwnj bya bae gvat iengcoengz、 sou batgak, roengzrengz ra di cienz ciengxgya, gig noix miz seizgan caeuq lwgnyez gangjgoj guhcaemz. Daegvang mbouj lau gwn haemzhoj, de lau yah de siengj mbouj hai, engq lau lwg iq……

Song bi gvaqbae, gyoengq lwg- nyez majhung lo, gaenq daengz seiz doegsaw lo, hoeng, aenvih bae hag- dangz loh gyae, mbouj miz vunz ciepsoengq, ndigah, sam lwgnyez cungj lij caengz ndaej hwnj hagdangz gvaq.

Aenvih ranz ndeu gag youq ndawbya ndawlueg nanz lai, mbouj ndaej caeuq bouxwnq gangjgoj lai, sam lwgnyez cij rox gangj Vahcuengh caeuq Vahyauzcuz bonjdieg, gig lau raen vunz najmoq. Baez miz vunz daeuj couh ndoj haeuj laeng bakdou bae, daj gehdou caeg liuq. Raen geij boux lwg baenz neix, Daegvang sim’in dangqmaz.

Roek

Cig daengz bi 2017, guekgya cienzmienh saedhengz gij hong banggungz. Ndawyienh anbaiz haujlai ganbu roengz gak aen yanghcin Mbanjcuengh Mbanjyauz bae dang daih’it suhgi, cijdauj caeuq bang- coh gyoengq vunzmbanj gungzhoj duetgungz bienq fouq.

Daxmeh daegvang ndang canz, mehyah de baenz bingh, lij miz sam boux lwgnyez, baengh de boux he guh hong reihnaz ciengxbak, ndigah de dwg ranzgungzhoj. Boux bangfuz ganbu de dwg Laujcangh.

“Banggungz sien rex ceiq gonq, banggungz bietdingh rex gvai” neix dwg gij vah Laujcangh ciengzseiz venj youq henz bak. Laujcangh bingzciengz gunghcoz gig nyaengq, hoeng gij hong fuzbinz de yaep ndeu hix mbouj cuengqsoeng gvaq.

De ngoenznaengz gyanghaemh gig caeux cij rag aen ndang naet de maranz, haeuj ranz seiz, baihrog gaenq mbwnlaep lo. De vut daeh roengz sahfaz bae, baez naengh ndang couh unq ndaej mbouj siengj doenghdanh. Mehyah de lau de ndangdaej nanz dingj gij hong baenz naek, ciengzseiz daengq de:“Mwngz baenz buekmingh guhhong, aeu haeujsim ndangdaej cijndaej bw!” De cungj riu han:“W, w, gou rox.” Gangj liux de youh laebdaeb ngeixnaemj gij saeh baenzlawz bang- fuz ranz Daegvang.

“Aeu siengj banhfap bang de ra cienz hwnq ranz gonq, caiq bang soengq geij lwgnyez de bae doeg- saw……” Laujcangh ndawuk baenq mbouj dingz.

Laujcangh sien bang sam boux lwgnyez Daegvang ra hagdangz ndaw- singz bae hwnjhag, gwn youq cungj youq hagdangz. Daengz singhgiz haj banhaemh cij dauqma ranz. Gij saeh lwgnyez Daegvang yousim de gaijgez lo.

Laujcangh lij bang mehyah Daegvang lienzhaeh canzlenz ndaw- yienh aeu ndaej eijloek daeuj naengh, fuengbienh yah de haeujok. Cwngfuj hawj Daegvang cienz daeuj hwnq ranz moq le, Laujcangh youh bang cingj gisuzyenz son Daegvang youq laj ndoengfaex ciengx gaeq……

Couh yienghneix, ginggvaq Lauj- cangh geij bi caenhsim bangfuz, ranz Daegvang mboujdanh ndaej duet- gungz, vanzlij yied gvaq yied vuengh dem.

Saedsaeh, neix couhdwg aen ngaeuzsuk daengx guek gak dieg duetgungz baenz fouq ndeu. Gij hong duetgungz bienq fouq daengx guek raeuz mboujdanh guh ndaej netsaed, caemhcaiq guh ndaej gig miz cingzyauq.

Bi 2020, guek raeuz caen guh daengz cienzmienh duetgungz lo. Hoeng, Siz Ginbingz cungjsuhgi naeuz:“Gak boux beixnuengx duetgungz cij dwg saedceij vuenyungz yamq daih’it, neix engq dwg giz dieg hwnjdin swnghhoz moq、buekguh moq raeuz.” Ndigah, youq laj cwngcwz ndei aen dangj caeuq guek raeuz, daengx guek youq gwnz giekdaej cienzmienh hwnq baenz siujgangh sevei, cungj cingq daihlig doicaenh gij hong saenqhwng lajmbanj. Gij saedceij lwgminz Bouxgun、Bouxcuengh、 Yauzcuz daengj gak minzcuz engq vuenyungz lo.

Yah Daegvang raen saedceij yied gvaq yied miz muengh, de couh caeuq Daegvang caez youq ndawranz guh “nungzgyahloz”, vanzlij hai aen bouq gai huq ndeu dem. Yienghneix bouxvunz youq ndawranz miz saeh guh, ndawranz hix ndaej demsou.

Daegvang angqfwngfwng laeb- daeb hai ci rag huq. De itloh doq ngeix hoj siengj van, doq hai soujgih dingq sinhvwnz——

“Saedhengz saenqhwng lajmbanj doxdaeuj, guek raeuz gizgiz gingjsaek hwngfwdfwd: Baenz aen baenz aen canjyez fazcanj hoenghhwd yienh okdaeuj; baenz diuz baenz diuz loh suijniz doeng haeuj gak dieg gak mbanj bae; baenz aen baenz aen ranzlaeuz yienghmoq miz minzcuz daegsaek lumj fwncin gvaq rangz nyaz nei ndonj hwnjdaeuj! Hoeng, beij gij gingjsaek neix engq gyaeundei dwg gij lwgda siengj hag doxgaiq lwgnyez youq ndaw hagdangz…… Daengx guek lwgminz gak minzcuz lajmbanj raeuz gaenq vuenh ndokndang lo, gij va vuenyungz cingq hai rim seiqlengq, lwenq da ronghsag!”（2 sat）