Sinhvazse Baekging 5 nyied 19 hauh dienh Cunghgung Cunghyangh cungjsuhgi、guekgya cujsiz、Cungh- yangh Ginhveij cujsiz Siz Ginbingz 5 nyied 18 hauh hoiz saenq hawj boux yozcej bouxcoz louzhag dauq guek Nanzgingh Dayoz, doiq gyoengqde miz maqmuengh lailai.

Siz Ginbingz youq ndaw hoiz- saenq naeuz, rox gyoengqsou aeu Lij Sw’gvangh、 Cwngz Gaihgyaz daengj gohyozgyah banlaux guh buengj- yiengh, youq rogguek hag ndaej bonjsaeh le dauq guek guh gohgyau saehnieb, youq aen gangjvei bonjfaenh roengzrengz bauqdap guekcoj、fugsaeh beksingq, aeundaej cingzcik lai, gou roxnyinh sim’angq dangqmaz. Youq mwh Nanzgingh Dayoz laebbaenz 120 hopbi neix, cukhoh caeuq camnai gyoengqsou dem lauxsae hagseng daengx hagdangz、gyoengq yauyouj!

Siz Ginbingz giengzdiuh, gyoengqsou youq ndaw saenq naeuz, seng bungz aen seizdaih hungmbwk dwg gij caijsoq ndei ciuhvunz, bouxcoz louzhag dauq guek aeu gvansim “saeh guekgya”、 rapdawz “cwzyin guekgya”, doenghgij vah neix gangj ndaej baenz. Maqmuengh gyoengq dungzci haenqrengz fatyiengz gij cienzdoengj miznaj louzhag bauq- dap guekgya, gagrox bauqdap guek- gya、fugsaeh beksingq, dingjmaenh ganq vunz son vunz、doidoengh gohgi gaglaeb gaggiengz caiq cauh cingzcik ndei, giendingh vwnzva gagsaenq、gangj ndei gojgaeq Cungguek daiq- daeuz cengguh, vih cienzmienh hwnq- guh sevei cujyi yendaiva guekgya、saedyienh aen loqsiengj Cungguek Cunghvaz Minzcuz fukhwng hung- mbwk ok rengz ok dungxcaiz!

Ndanggonq Nanzgingh Dayoz dwg Sanhgyangh Swhfan Yozdangz 1902 nienz cauhlaeb, 1950 nienz cingqsik dinghmingz baenz Nanzgingh Dayoz, laebhag 120 bi doxdaeuj, buek dem buek vunz louzhag dauq guek louz rizdin buekguh bauq guek vih beksingq roengzdaeuj youq Nanzgingh Dayoz, Lij Sw’gvangh、 Cwngz Gaih- gyaz daengj dwg boux daibyauj ndawde mizmingz. Mboengqneix, 120 boux daibyauj yozcej bouxcoz Cibbet Daih Dangj doxdaeuj daj rogguek hag ndaej bonjsaeh dauq guek daengz Nanzgingh Dayoz guhhong haenx raiz saenq hawj Siz Ginbingz cungjsuhgi, bauqlwnh gij cingzgvang sonsaw ganq vunz、gohyenz cauhmoq daengj, gangjok gij gietsim gien- dingh fatyiengz cienzdoengj ndei、rapdawz sawjmingh hawj guek giengzak.