“Guh hongnaz sat guh honghaij, raemx roengz danhaij vat nonsa” “daxboh bae dwkbya, daxmeh ca ndaemnaz”. Vunz Ginghcuz maij eu fwen, okhaij ndaej dwkbya, hwnj hamq ndaej eu fwen. Youq Gingh- dauj, laeng gwnzruz、 danhaij、 gyaeujnaz、lajfaex, gizgiz cungj ndaej dingqnyi singfwen, yaep rwenzraeuh lumj raemxmboq cemcem, yaep caiq goksat cienz bae gig gyae. Ginghcuz caeuq Bouxgun daj ciuhgeq couh doxgyau doxduz, ndigah vunz Gingh- cuz ndaej aeu vah Ginghcuz caeuq diuh Ginghcuz eu fwen, cix ndaej aeu begvah caeuq diuh Bouxgun eu fwen. Gij fwen Ginghcuz loq fukcab, diuhfwen raez, yaemdiuh daemq, coenz fwen miz roek coenz、bet coenz, vunz Ginghcuz heuhguh “eu roekbet”. Fwen faen miz: Fwenhaij、fwen fungsug lijyiz（fwenha、fwenyoux、fwen couxbawx haqsau、fwen guhsang）、 fwen lwgnyez（fwen yauzlanz）、diuh gangjsaeh gangj- ciengq daengj.

Canghdwkbya youq gwnzhaij dwkbya guhhong couh ciengq fwenhaij. Doenghbaez bouxsai okhaij dwkbya lai, eu fwen couh eu lumj 《Fwen Soumuengx》. Mehmbwk cix guh gij hong gyawj haij, lumj swiq haijbei、bumh sae、dub sae daengj, ciengq 《Fwen Mbaetcaz Bumh Sae》daengj. Gaxlaeng, haujlai mehmbwk caemh cauhruz okhaij, lumjbaenz hot fwen 《Fwen Okhaij》couhdwg ciengq gyoengq mehmbwk Ginghcuz okhaij dwkbya:

Raemx haij langh caiq langh, beixnuengx sim’angq caez okhaij;

Vanq muengx dwkbya doh Nanzhaij, bya gungq lai rim cang;

Sing riu beixnuengx sang, dingh dangh dingh, dingh dangh dingh!

Fwenha cix dwg gij go yizsiz, mwh Cietha caeq bouxsaenz cix ciengq, faen coux bouxsaenz、caeq bouxsaenz、 haeuj daiz、soengq bouxsaenz seiq hot. Cawjdaeuz haenh bouxsaenz caeuq cojgoeng, ciengq gij lizsij minzcuz、cienznaeuz gojgaeq、dauhleix guhvunz、hauqswnh ban- laux、beixnuengx huzndei daengj, cungj fwen neix miz 《Fwen Cukhoh》daengj.

Haujlai fwen Ginghcuz cungj dwg fwenyoux. Mwh guhhong roxnaeuz cietheiq, Bouxcoz couh doxcomz doiqfwen, eu gij saeh swhgeij caiq cam gij cingzgvang baihde. Fwenyoux ciengzseiz dajbeij, ciengq gaiq wnq yinxok gaiq caencingq yaek ciengq haenx, diuhfwen bienq bae bienq dauq, ciengq ndaej menh youh unqswnh, lij miz yaembo、yaemsaenz cab youq ndawde. Cawz doq siengj doq eu fwen cam saeh, caemh hwng eu fwen dinghndei lumj 《Soengq Nuengx Ma Ranzmbanj》daengj.

Fwen aeubawx haqsau, lumj dahsau yaek okhaq ciengq 《Fwen Daej Haq》, docih bohmeh ciengx hung、lungz au beix sauj bangrem, sij mbouj ndaej gyoengq beixnuengx daengj. Daxmeh、beixsauj、beix- nuengx cix buenx ciengq 《Fwen Soengqhaq》. Mwh couxyah, fueng vunzsai fueng mehmbwk cungj gak cingj canghfwen, fueng mehmbwk laeb sam aen gvangaj eu fwen buenzcam, canghfwen fueng bouxsai caenh ndaej hingz, cix ndaej haeuj dou ciep bawxmoq.

Fwen guhsang Ginghcuz gig genjdanh, cawz gyonglaz, couhdwg goengdauh niemhmo, vunz ndawranz daej ciengq 《Diuh Gangjdoeg》, cawjdaeuz geqgangj ciuhvunz boux- dai, ciengqok vunzcaen gvaq le, vunz ndawranz dwg baenzlawz siengsim hojyouq.

Vunz Ginghcuz laeng henzhaij youq, fwen lwgnyez caemh gven- daengz haij. Lumj 《Geq Duzbaeu》, gig miz yinxdaeuz. Cungj fwen lwgnyez wnq lumj 《Ngauz Mbonq- muengx》daengj dwg bouxlaux aeu bae lox lwgnyez ninz.

Gwnzbiengz Ginghcuz riuzcienz miz haujlai cienznaeuz lizsij、gojfangz caeuq gak cungj go gangjsaeh, mbangj lai cungj dwg cix gangj cix ciengq, ndigah couh miz siujdiuh gangjciengq. Cungj siujdiuh neix itbuen aeu cihnamz geiq haeuj saw bae, lumj 《Fwen Ginghcuz Senj- dieg》 daengj.

Riengz seizdaih hwngfat, gij fwen Ginghcuz caemh mbouj miz gijmaz vunz bae ciep, couh yaek saetcienz lo. Geij bi neix, cwngfuj gaenxmaenx henhoh caeuq hwngfat fwen Ginghcuz, caemh guh ndaej di cingzcik. Bi 2012, fwen Ginghcuz ndaej senjhaeuj buek daihseiq swcigih gaep feihyiz mingzloeg.