It

Banringz, bouxhaici Daegvang hai ci bizgaj cang rim huq haenx buet youq gwnzloh ndawndoeng Cib Fanh Daihsan.

Gwnzci cang rim gij huq gwn、huq yungh…… doi lumj bya iq nei. Aen mbanj de miz Bouxcuengh、Bouxgun caeuq Yauzcuz caemhyouq, dwg aen “ranz hung” gak minzcuz ndeu.

Youq gwnzbo iq he gingjsaek gig gyaeundei, Daegvang nyaenx mbouj ndaej dingz ci roengzdaeuj yawjyawj, swnh yietnaiq caeuq diem gaemz heiq singjsien he.

Ranghdieg neix seiqlengq ndoi bya cungj ndaem miz gocoengz、gogveiq、gobatgak, lij miz goraeu caeuq goleux daengj gij faex cab maj youq ndawde. Gaenh di, youq laj gij faexcaz dwg diuz dah seksak lae haeuj ndoeng bae. Caiq gaenh di, couhdwg cibgeij gaiq nazmbaeklae doxdaeb hwnj din bya bae. Gij naz neix aiq dwg baengh gij bya heu raemx saw neix, cij maj ndaej baenz hoengh ba! Daegvang caenhsim mup gij rumz liengz seizhah, daengx ndang soengswt cwxcaih dangqmaz.

Ngoenzneix haetromh Daegvang yaek okdou seiz, yah de daemh daeux ok bakdou daengq de:“Daegvang, menh di hai ci, gaej simgaenj, maenhnet youqgaenj bw!” Daegvang riuhehe han naeuz:“W, gou rox, mwngz cuengqsim.” Mwhhaenx, de rox swhgeij dwg bouxsai ndawbiengz ceiq vuenyungz ndeu lo!

Gij saedceij vuenyungz neix, cibgeij bi gaxgonq Daegvang siengj hix mbouj gamj siengj gvaq.

Mwhhaenx, ranz de gungzhoj, ndawranz maz cungj mbouj miz. Aenvih de ngamq ndaej caet bi seiz, daeggo de doekraemx dai, daxboh de siengsim lai, mbouj geij nanz hix fat bingh gvaqseiq lo. Ndawranz laebdaeb saet bae song boux vunz, engq gungzhoj lo. Meh de siengsim lai, daiq Daegvang buen daengz gwnz byongh bya doiqmienh ndawmbanj bae dap ranz faexcuk gag youq lo.

Daxmeh baenz maiq le, saedceij gvaq ndaej engq dwgrengz. Yienz- naeuz cengqgengz ciengx hung Daeg- vang daengz ngeihcib geij bi, hoeng ndangdaej de hix yied daeuj yied nyieg lo. Aiq dwg aenvih youq diegnyinh baihnamz ndawndoeng neix nanz lai, fat ae youh baenz fungcaep. Baez daengz mbwn fan yaek doek fwn, song gyaeujhoq daxmeh cungj youh gawh youh in, byaij mbouj baenz, naengh mbouj onj, gyanghwnz lij ae daengz bwt yaek dek bae, hojsouh dangqmaz.

Daegvang daj iq couh roxsoq, gig sim’in daxmeh. De rox, danghnaeuz daxmeh caen laemx roengzbae, aen ranz bonjfaenh hix doemq lo. Yiengh- neix, bungz daengz ngoenzhaw, de couh aemq daxmeh byaij sam seiq goengleix bae gwnzhaw hawj canghyw yawjbingh aeu yw. Mizseiz daxmeh dan aeu yw couh ndaej, de couh gag bae haw.

Ngeih

Ngoenzhaenx haetromh, Daeg- vang caeuxcaeux couh gag hwnjdin bae haw bang daxmeh aeu yw lo.

Aen haw iqetet neix seiqhenz ranzmbanj gyae’gyawj cungj miz Bouxgun、Bouxcuengh、Yauzcuz comz youq. Ranghdieg neix liz yienhsingz miz samcib lai goengleix gyae, gyoengqvunz cijaeu gwn ndaej imq daenj ndaej raeuj couh baenz, mbouj miz maz saeh hung, cungj haengj daeuj ganjhaw dajcawx, cagaenj cawx doxgaiq le couh baema lo. Ndigah, aen haw neix baenz haw caeux, hix sanq haw vaiq.

Seizneix gyoengqvunz gaenq miz haujlai vunz daeuj dajcawx lo. Doxgaiq gak cungj gak yiengh venj rim gwnzgyaq, lwgda cungj yawj mbouj bienh. Gyoengqvunz humx youq dan huq, genj huq gangj gyaq, nauhyied raixcaix.

Daegvang dawz yw daxmeh daj gyaeuj haw baema seiz, gaenq daengz banringz lo. Gyanghaet gwn cuk, caeux couh siu liux lo. Seizhaenx, de dingjlingz byaij gvaq bouqfaenj, dingq daengz gyoengq vunzlai doq sup faenj doq gangj riu, gij faenj heiqhom baenz raq baenz raq ndonj haeuj naeng de daeuj, hawj de engq dungxgvat lo.

Daegvang baez lumh daehbuh, mbouj gamj aeu geij maenz ngaenz haenx okdaeuj. Gij ngaenz neix lij aeu bae cawx gaen baj byaekhamz baema cijndaej. De at maenh daehbuh, ndwnj geij gaemz myaiz, couh yamq din vaiqvet byaijdeuz, youzcaih gij fangz iek haenx baenzlawz gyangh dungx lo.

Sam

Baema seiz, ngamq byaij daengz byongh roen, aenvih ndangdaej de nyieg lai, youh dungx iek youh hozhat, Daegvang yied byaij yied baeg, byaij ndaej saemxsax, cadi laemx lo. De riz bizbak hawq baez he, hojsouh ndaej iet hoz cimyawj baihnaj, siengj ra dieg yietbaeg yaep he.

O, baihnaj dinbya laj gocoengz dingjlingz miz gaiq rin hung he, caen dwg “baiqdalaep cingq miz mon” lo! Gaiq rin neix hung ndaej seiq haj bouxsai fwngz rag fwngz got mbouj gvaq, gaxgonq baebae dauqdauq caengz raen gvaq. Aiq dwg doek geij ngoenz fwn hung le, ngamq daj gwnz bya gingj roengzdaeuj. “Caen dwg aen dieg ndei yietnaiq ndeu!” Daegvang song da sikhaek ronghliklik, angq- vauvau gvaqbae.

Daegvang ndonj haeuj laj gocoengz, naengh roengz gwnz rin hung bae, yawjraen lij miz geij mboengq faexcoengz deng rin hung dub goenq doek roengzdaeuj. Gocoengz caeuq cukmoeg cungj gig mwnnoengq, de naengh youq gwnz rin hung, mup gij iengcoengz caeuq gij liengz faexcuk, fwt sim sangj dangqmaz, engqlij lumz gij baeg caeuq dungx iek lo.

Gyae yawj aen Mbanjcuengh doiqnaj dinbya haenx, gij sing riu lwgnyez loeklak cienz daeuj, de nyaenx mbouj ndaej ngeix daengz gij saeh seiz iq swhgeij.

Geiq ndaej seiz lij iq, Daegvang ngoenzngoenz caeuq gyoengq doengz- doih ndonj haeuj laj gofaex bae guhcaemz, seizneix doengzdoih miz bohmeh guhcawj, gaenq cauh gya baenz dangq…… Swhgeij gaenq ngeihcib sam bi, ndang byom godog, seizneix lij gag naengh youq ndaw- ndoeng henzloh cienh lumj duzmoed nei. De najbyak baez nyaeuq, ngaem- gyaeuj yawj song fwngz guhhong cocad、gvancez doeddad, sim de lumj miz raemxlangh dongj mbouj dingz.

“Duz dairaq mwngz! Mwngz deuz! A——” Ndaw caz faexcuk cienz daeuj sing hemq lwgmbwk caeuq sing doxfwd. Lwgmbwk lumj deng goemq bak ndaet hoz, wzwz azaz mbouj caiq gangj ok vah lo.

“Mwngz hemq? Caiq hemq gou couh ndaet dai mwngz bae!”Sing bouxsai ndeu haeb heuj haeb faenz haep dwk.

Daegvang ndawsim baez anj, miz cungj mbouj gitleih ndeu yungx hwnjdaeuj. De sikhaek vut roengz gij doxgaiq ndawfwngz, swnhfwngz lab hwnj diuz faexcoengz ndeu cung gvaqbae……

Daegvang caenhrengz rag hwnj bouxsai caemj youq gwnzndang lwgmbwk haenx, doi coh henz bae, yaengx faex couh moeb……

Gouq ndaej dahlwg lo. Dah haenx dwg dahsau henz mbanj Yauzcuz. Bouxsai haenx yaek sieng dahsau, deng gaemh bae gyaeng lo. Hoeng aenvih Daegvang moeb bouxsai haenx sieng naek lo, hix deng gaemh bae gyaeng.

Yienghneix, dahsau Yauzcuz vihliux docih Daegvang, gij saedceij Daegvang mbouj youq ranz haenx, couh ciengzseiz caeuq daeggo daeuj ranz Daegvang bang guh di hong reihnaz, lij haeujsim ciuqgoq daxmeh Daegvang dem.

Youq duenh seizgan baebae dauqdauq, dahsau menhmenh rox gij saeh caeuq Daegvang mizgven haenx, daxmeh Daegvang hix ndei gangj vah, hawj de gingqyienz roxnyinh lumj youq ranz swhgeij nei cwxcaih. Doeklaeng Daegvang maranz le, de lij ngoenzngoenz mbouj cingj gag daeuj, muengz nyaengq dwk, lumj bouxcawj ranz neix nei.

Vihliux mingzdaeuz dahsau ndei, Daegvang gienq de naeuz:“Dah iq, docih mwngz sinhoj daeuj bang ranz gou baenz nanz, gou ranz hoj mbouj rox baenzlawz bauqdap mwngz. Seizneix, gou gaenq maranz lo, baenz lai bi gou boux dog ndeu hix guh ndaej, mwngz gvaqlaeng couh mbouj yungh caiq daeuj bang guhhong lo, docih mbouj liux bw!”

Dahsau neix sim’in lai, de cij yaengyaeng gangj coenz ndeu:“Mwngz gouq gou lo, di hong neix dwg gou wnggai guh law.” Daegvang yied gienq de deuz, de dauqfanj engq haengj daeuj, caemh engq gaenxguh lo.

（1）