Bya heu homhheux, Dahdavanzgyangh gvaengxgvax ngutnyeuj con gvaq ndaw yienh, daj gwnzmbwn yawj doxroengz, Vanzgyangh Mauz- nanzcuz Swciyen gyaeundei lumj veh. Beixnuengx Mauznanzcuz ciuhciuh daihdaih dinghyouq gizneix, gak cuz vwnzva doxgyau doxyungz, vwnzva minzcuz naekna, gag baenz daegsaek. Ndawde, gij dinfwngz deufaex Mauznanzcuz gig mizmingz.

Deufaex Mauznanzcuz faen deufouz、deulou、deuluenz、deugoek daengj. Deufouz youh faen laeg、feuz、sienq sam cungj. Vunzlai Mauznanzcuz guh aen yizsiz “Beizdauq”, haujlai doxgaiq cungj dwg guh deufouz, lumjbaenz: Mauhngeg、faexdwngx、daiz betsien、eij、daengq raez daengj. Deufouz lij aeu bae guh nienzveh faex、gij veh faqdou、gij veh gwnzcauq、gij veh gaiqbeiz、gij veh daengloengz, caemhcaiq deu youq gwnz gyasei faex、ciengz ndawranz daengj guh dajcang, yunghcawq gig lai. Mauhngeg noz Mauznanzcuz couhdwg gij daibyauj ndawde.

Guh mauhngeg noz, genj aeu faexgenq bae guh, ndawrog cungj aeu deugaek. Lwgda caeuq ndaeng aeu deulou, fouq mauhngeg ndeu couh baijok gij dinfwngz deufouz、deuluenz、deulou. Mauhngeg noz faen vwnz、foux、sienh、yak seiq loih, miz 36 dauq 72 cungj siengqnaj, singheiq saenzcingz gak mbouj doxdoengz. Deu fouq mauhngeg ndeu miz cib lai bouh: Faex faen geh、dak faex、gawq faex、donj faex、bauh faex、bit veh、deu faex、sijsaeq gaek、muz faex、gvaq saek, itbuen aeu guh baenz aen singhgiz cijndaej. Gij dinfwngz deu mauhngeg mbouj genjdanh, hong cingsaeq, aeu gig miz naihsim cijndaej.

Canghdajdeu baengh gij dinfwngz dajdeu cienzdoengj, ciuqgaeuq guh caemhcaiq ciuq gij goj Mauznanzcuz gaeuqgeq haenx gag siengj gag deu. Yiengh noz cawjdaeuz dwg aenmauh caeuq fajnaj. Mbouj doengz vunz daep aenmauh mbouj doengz. Lumjbaenz Yahlingz dwg bouxcaizsaenz Mauznanzcuz, aen mauh de deu miz roegleih gamz ngaenzgim haeuj ngaenzbau daengj doz. Fajnaj cix deuok bouxde geijlai bi、yak roxnaeuz ndei daengj. Gyoengqde caemh ciuq gij fuengfap gwnzbiengz gvenq guh bae gaekveh bouxvunz. Deu bouxsai: Lwgda、bwnda bingzbwd dwg vunz cungcig lauxsaed; da byaengq dwk luenzled doed okdaeuj cix dwg vunz singheiq yak; riu cix deu conghbak ngaeunguemnguem; simnyap cix deu najbyak nyaeuqnyatnyat. Deu dahsau: Bwnda ngaeunguem, lwgda saeq, conghbak iq. Gij dinfwngz canghdajdeu ndei raixcaix, vunzlai baez yawj couh rox dwg bouxsaenz roxnaeuz duzfangz、bouxsai roxnaeuz mehmbwk、bouxlaux roxnaeuz lwgnyez、bouxvwnz roxnaeuz vujcieng、hozsiengh roxnaeuz bouxdauh. Luz Youz lij haenh naeuz：“Vunzlaux lwgnyez, gyaeundei roxnaeuz yak- gaeuj, cungj gak mbouj doxdoengz, geizheih dangqmaz.”

Seizdaih moq, gij vwnzva cienzdoengj Mauznanzcuz dauqyienh rengzhoengh. Moix bi diegde lij guh aen ciet faenlungz, yinx daeuj haujlai hekyouz. Canghdajdeu caemh gai ndaej haujlai mauhngeg noz. Lajmbanj guh lijyouz, vunzlai ndaej demsou, gij vwnzva minzcuz caemh laebdaeb ndaej ciepcienz. Bi 2012, gij dinfwngz deufaex Mauznanzcuz ndaej senj haeuj buek daihseiq swcigih gaep feihyiz mingzloeg. Gij dinfwngz deufaex dwg vwnzva cingsaenz beix- nuengx Mauznanzcuz, dwg gij gingniemh swngh- canj swnghhoz gyoengqde, daih cienz daih.

（Doz daj Aen Minzcuz Boz- vuzgvanj Gvangjsih aeu）