Gou dwk dienhvah hawj daxmeh, lwnh de ngoenzcog gou yaek dauqranz caeuq de gvaqcieng.

Caenhgonq binghraq haenq, daxmeh cam gou seizneix dieg gou baenzlawz yiengh. Gou naeuz dieg gou gizneix mbouj raen miz vunz deng raq.

Ngoenzneix dwg liggaeuq ndwen- lab ngeihcaet lo, gyoengq vunz ranz- nden cungj dauq ranzcoj gvaqcieng, ranzranz gven dou, gou boux ndeu youq neix, seiqlengq caemrikrik. Gou mbouj naemj baenzlai, gietdingh ngoenzcog couh maranz.

Ngoenz daihngeih haetromh gou couh okdou lo, naengh gunghgyauhceh hwnj banci, hwnjhwnj roengzroengz, vuenh le geij baez ci, gou daeuj daengz cunhgunghsoj, gou naemj haeujbae bauq gou daj gyawz dauq.

Sawqmwh, dingqnyi baihlaeng miz vunz heuh:“Vasaeq, mwngz dauqranz caeuq meh mwngz gvaqcieng ha.”

Gou cienqndang yawj, dwg Sam- ngawz. Samngawz dwg boux ranz- nden gou. De naengh aen cisamloek he, gwnzci doz rim nyapnyaj.

Samngawz youq ndaw fuengzcug baiz daihsam, vunz cungj baenzneix heuh de. Caengz caj gou dapvah, Samngawz youh naeuz:“Vasaeq, seiz- neix mbouj miz ci lo, danghnaeuz mwngz mbouj yiemz, goj ndaej caeuq gou naengh cisamloek bae ranz.”

Gou naemj: Liz ranz lij miz duenh loh gyae he, naengh aen ci neix cungj beij byaij loh ndei.

Samngawz diuq roengz ci, raih hwnj laeng ci bae, beuj gij nyapnyaj gvaq mbiengj ndeu bae, dawz aen loengx gou cuengq ndei, riuhehe naeuz:“Vasaeq, mwngz caeuq gou caez naengh baihnaj ba.”

Samngawz bohmeh gvaqseiq caeux, de caeuq dahnuengx de Valaux caez youq. Dahnuengx Samngawz beix gou song bi, aen mingzcoh de caeuq aen mingzcoh gou cih byai cungj miz cih “花”, song ranz dox- gyawj, dou song boux youh guhdoih ndei, bouxwnq lau heuh loeng, couh aeu Vahcuengh heuh dahnuengx Samngawz guh Valaux, heuh gou guh Vasaeq.

Samngawz maj ndaej daemq youh ndaem, daengz nienzgeij aeu yah, cungj mbouj raen miz dahsau daeuj douh. Cig daengz seiqcib haj bi, miz vunz gaisau mehyah daiq daeglwg he hawj de.

Mehyah haenx naeuz Samngawz:“Aen ranz mwngz gaeb youh naeuh, daeglwg gou mbouj nyienh daeuj neix, mwngz rom ndaej cienz bae dieg gou guh ranz ba.”

Samngawz mbouj gamj euq, ciengx mou ciengx bit gaeq gai ndaej cienz le, couh hawj mehyah dawz bae gizde guh ranz. Guh ndaej ranz le, mehyah mbouj caiq yamq din haeuj ranz Samngawz lo.

Samngawz faen ngaenz mbouj nem ndang, de ngoenzngoenz gwih aen cisamloek bae henz goengloh ndawbo nyapnyaj gip nyapnyaj gai aeu cienz, cang rim ci couh doz dauqranz cug yiengh faenloih, ngoenzlaeng caiq doz bae haw gai. Gij hong neix youh uq youh haeu, bouxwnq gvaq henz cungj mbaetheiq nyaenj ndaeng buetdeuz, Samngawz ngoenzngoenz angqfwng- fwng bae ndawde saiq bae saiq dauq, de naeuz, gijneix mbouj yungh cienzbonj, baenz guh.

Geij ngoenz cieng dinjdet gvaqbae lo, gou naeuz:“Meh, geij ngoenz neix gou youh okbae lo.”

“Mwngz youq ranz hix mbouj rox guh maz, couh bae ba.” Daxmeh naeuz.

Ngoenzcog couh lizhai ranz lo, daxmeh nyaengqnyaennyaen suek faengx, naeuz hawj gou daiq geij aen faengx bae, gou hix nyaengq daeb buhvaq cang haeuj aen loengx.

Seizneix, miz geij boux vunz yamq din haeuj ranz daeuj. Gou rox dwg gij vunz ndawyangh ndawcunh. Gyoengqde naeuz: “Ngoenzlwenz aen singz mwngz youq haenx miz boux vunz ndeu deng raq lo, geij ngoenz neix mwngz caengz bae gizde gonq, youq ranz gekliz aen singgeiz ndeu cij ndaej, yihyen ngoenznaengz baij vunz daeuj guh hwzsonh.”

“Gizde caengz miz vunz deng raq gou couh dauqranz, daengz ngoenzneix gaenq ndaej gouj ngoenz lo.” Gou naeuz.

“Binghraq fouzcingz, aeu re cij ndaej, mboujnex deng lah couh saeh hung lo.” Miz vunz dap naeuz.

Caengz hawj dou naemj baenzlai, gyoengqde geij boux couh youq bakdou ranz gou diep buengj nem fungdiuz lo.

Ndawmbanj goenj lo, bouxboux cungj daeuj bakdou yawjngonz, yawj sat youh ganjvaiq byaijdeuz.

“Gizde miz vunz baenzbingh lij dauqranz.” Aen sing Goengngeih gangjvapvap.

“Lauheiq de hix deng lo, raeuz gaej bae gyawj ranz de bw, deng lah couh boihseiz lo.” Buzseiq naeuz.

Goengngeih caeuq Buzseiq song boux neix, bingzseiz ndawmbanj miz di saeh, cungj gyaez ceng gonq okdaeuj vab geij coenz.

“Simjcaet boux ndeu youq ranz, Vasaeq hix siengj dauqranz, mehlwg doxcomz gvaqcieng ne, gizde caengz miz bingh de couh dauq lo, ngoenzde lij caeuq gou naengh cisamloek caez dauq.” Samngawz naeuz.

“Mwngz rox maz, vunz gangj maz mwngz gangj maz!” Goengngeih sing hung hongz naeuz.

Gyoengqvunz dingqnyi Goeng- ngeih caeuq Buzseiq sing hung gangj vah, cungj byaij gvaqdaeuj, ndei rwix cungj lwnh. Lwnh sat le, gyoengqde cungj sanqdeuz lo, cij miz Samngawz lij youq.

Samngawz ngoenzngoenz bae gip nyapnyaj, gyoengqvunz yiemz de ndang uq ndang haeu, mbouj nyienh caeuq de guhdoih. Gyoengqvunz gangjgoj, Samngawz baez daeuj daengz, cungj deng hongz geij coenz.

Gou caeuq daxmeh gvendou youq ranz, dingq gyoengqvunz youq rog ranz lwnhnyaengnyaeng, ndawsim luenh- lablab, seizneix miz gij saeh neix, gou dauq muengh Samngawz ngoenz- ngoenz okdaeuj gangj saek coenz, ndawsim roxnyinh soeng di.

“Simjcaet Vasaeq, seizneix sou mehlwg mbouj ndaej bae gyawz, sou yaek cawx maz doxgaiq, gou doz nyapnyaj bae haw gai, swnhbienh bang sou cawx.” Samngawz youq rog ranz hemq naeuz.

“Daegsam, seizneix caengz aeu cawx maz, daengz seizlawz yaek cawx, gou lwnh mwngz nyi.” Daxmeh youq ndawranz han naeuz.

“Daeggo Valaux, bouxboux cungj deuz gyae, mwngz daeuj gyawj dou, mbouj lau deng binghraq lah ha.” Gou gek conghcueng naeuz.

“Mwngz gaenq dauqranz baenzlai nanz lo, danghnaeuz deng raq caeux couh lah doh mbanj lo, caiqnaeuz, cwngfuj gaenq mienxfeiq hawj raeuz daj yimyauz gvaq, re ndaej binghdoeg mbouj haeuj ndang bw.” Samngawz youq rogcueng riu naeuz.

Dingqnyi sing Samngawz, aen sim gou sawqmwh roxnyinh raeuj raixcaix.

Yihyen geij boux canghyw ngoenzngoenz hai ci daeuj ranz gou bang mehlwg dou guh hwz- sonh. Canghyw baez daeuj daengz, gyoengqvunz cungj daj ndawranz byaij okdaeuj yawj.

Aen suenbyaek youq henzranz, daxmeh ngamq riuj aen swxbyaek haeuj suen, couh dingqnyi Goengngeih swenj naeuz:“De haidou okdaeuj lo, lau binghraq lah vunz bw.”

“Yienghneix gekliz miz maz yungh, cwngfuj mboujyawx rag songde bae yienhsingz gekliz cij ndaej.” Buzseiq dap naeuz.

“Canghyw ngoenzngoenz daeuj guh hwzsonh hawj songde, danghnaeuz caen deng raq, songde lij ndaej youq ranz ha?” Samngawz naeuz.

Goengngeih、Buzseiq caeuq vunzmbanj mbouj miz vah gangj lo.

“Simjcaet Vasaeq, ngoenzneix gou youh doz nyapnyaj bae haw lo, sou yaek cawx maz doxgaiq?” Samngawz byaij daengz rogranz naeuz.

“Cungj dwg binghraq guh yak. Daegsam ha, mwngz bang gou cawx di doxgaiq ngoenzyungh he hawj gou ba, gou aeu cienz hawj mwngz.” Daxmeh doq gangj doq bae hai dou, gaenq mbouj raen ngaeuz Samngawz lo.

Banringz, Samngawz dauq ranz lo, de gaem aen daehgyau ndaem he ndenq hawj daxmeh. Daxmeh naeuz:“Mwngz lumz aeu ngaenz lo.” Sam- ngawz riu naeuz:“Di ngaenz neix suenq maz.”

“Gosam, docih mwngz lo.” Raen Samngawz byaij bae, gou heuh naeuz. Gaxgonq, gou mbouj heuh Samngawz guh daeggo gvaq, seizneix, baez daih’it baenzneix heuh de.

Samngawz baenqgyaeuj gvaq- daeuj, miz di doeksaet, coh gou riuriu, mbouj gangj maz.

Fung ranz caet ngoenz, ngoenz youq mbouj onj, haemh ninz mbouj ndaek, caen dwg gvaq ngoenz lumj gvaq bi. Ngoenz daihbet, gij vunz ndawyangh ndawcunh daeuj ranz bok deuz mbaw buengj caeuq fungdiuz, aen sim gou soeng lo, lumjbaenz cuengq roengz cien gaen naek.

“Vasaeq caen mbouj baenzbingh bw, youq ranz gekliz ndwi ne.” Dingqnyi Goengngeih youq rogranz naeuz.

“Raeuz mbouj yousim deng lah lo, yaep neix, gou naemj bae ranz Simjcaet aeu di byaeksoemj.” Buzseiq riu dap naeuz.

“Boux ndeu fouzsaeh, ranzranz an’onj.” Samngawz naeuz.

Gyoengqvunz hix caez gvaqdaeuj, naeuz haemhneix gaj bit gaj gaeq goenghoh cij ndaej.

Bingzseiz bouxboux cungj najriu, dan yawj rog hix mbouj rox sim vunz baenzlawz yiengh, mbat saeh neix, rox caez lo.