Bakdou ranz Aulungzgveiz hai dwk, de lij youq ranz, gou laeglemx byaij daengz bakdou, cingq siengj haibak heuh de, sawqmwh ndaejnyi de youq ndawranz swenj sing he, hwk ndaej gou doq ndoj haeuj henzdou bae.

“Okbae! Gaej haeuj ndawranz gou daeuj!”

Gij sing swenj Aulungzgveiz dungxliengz raixcaix, dwg mbouj dwg de youh gwn laeuj lo? Lwgda de raeh lai lo, gou ndoj youq henzdou mbouj gamj diemheiq, caen siengj doq buetdeuz lizbae.

“Lij ndwn youq gizneix guh maz? Deuz ha! Vaiqdi!”

Aen sim gou diuqbubbub, cingq yaek yamq din buetdeuz, fwt ndaejnyi ndawranz miz bouxwnq gangj vah, gou sikhaek daengx roengzdaeuj, yienzlai de mbouj dwg hat gou, gou dep henz fajciengz, nyengrwz sijsaeq caegdingq.

“Lungz Byauh, nanzdauh mwngz cungj mbouj miz saekdi liengzsim?”

“Liengzsim?” Gij sing co Au- lungzgveiz, “byawz miz liengzsim? Hahaha……”

Gij sing riu hawj vunz mbei dek ndang saenz, ca mbouj geijlai saenz deng fajciengz, doeklaeng, ndawranz caemrwgrwg, gou cingq yaek ning, cix deng gij sing gangj vah cienz okdaeuj haenx nyengh baez he lo.

“Gou baenzneix caenndang daeuj gouz mwngz lo, mwngz dapwngq luba……”

“Hix miz mwh mwngz daeuj gouz gou? Mwngz rox mbouj rox ngeix hwnj mwh bouxwnq gouz mwngz ne? Hw!”

“Mwngz lij caengz lumz gij saehgonq gaenq gvaq ndaej cib lai bi, heuh gou gangj maz cijndei ne?……”

Sawqmwh, gou ndaejnyi gij sing daejfwtfwt, caeuq gij sing haxbaenh Aulungzgveiz riuhaha fanj doxdauq.

“Hix ndei, dou dauj gij vah ndawsim okdaeuj caez aiq cij cwxcaih di, bihaenx byawz hawj mwngz hwnj bya bae——”

“Gou bae Yanghgangj lo! Byawz naeuz gou hwnj bya bae?” Au- lungzgveiz maenjhumhum hwnjdaeuj.

“Caezgya cungj baenzneix gangj——”

“Gou dak Buzsimjsam cienz vah hawj mwngz, naeuz daih’iek song bi dauqma.”

“Buzsimjsam lawz?”

“Bouxyah biz he, meh gou dak de bae ranz mwngz guhmoiz.”

“Ha, dwg bouxyah biz haenx? De dwg vih ranz bouxwnq daeuj guhmoiz, baenzlawz dwg meh mwngz dak ne?”

“Baenzbaenz de gaenq dai lo. Gou mbouj caeuq mwngz gangj doenghgij vah mbwq neix, gou cij cam mwngz, gou dak de cienz vah hawj mwngz, mwngz vihmaz mbouj caj gou?”

“Maz vah? De gaenbonj mbouj lwnh hawj gou gvaq ha!”

“Ha……”

“Gvaq bi ndeu, dingqgangj mwngz youh mbouj guh saeh lauxsaed, caemhcaiq boux mehmoiz haenx youh baenzngoenz daeuj ranz gou, bohmeh gou hix roxnyinh de gangj ndaej deng, doeklaeng——”

(caengz sat)