Henz suenmak baihdoeng, miz aen daemz he, ngoenznaengz cuengq- hag le, gyoengq lwgnyez cungj gyaez roengz daemz bae youzraemx guh- angq. Raemxdaemz yienznaeuz laeg, hoeng ndawmbanj lwgnyez sai mbwk bouxboux cungj rox youzraemx ndaemraemx.

Henzdaemz gonimhenj, miz nga he iet roengz lajdaemz daemj raemx lo. Gyoengq lwgnyez ciengzciengz duengh nye nimhenj, benz hwnj gonimhenj, ndonj haeuj ndaw suen- mak bae caeg lwgmak gwn.

Laeng mbanj miz geij bak moux ndoeng faexcoengz, moix bi seizdoeng fwndoek aemq seiz, ndawndoeng dauqcawq hwnj miz raet gak cungj gak yiengh. Ndawmbanj bouxlaux lwgnyez, bouxboux cungj rox dujraet lawz gwn ndaej, dujraet lawz gwn mbouj nbaej.

Ngoenz he haetromh ranz ngamq ronghcingx, bouxlaux lwgnyez couh ra ndaej lamz raet he dauqranz cuengq le, bouxlaux cij bae guhhong, lwgnyez cij bae hagdangz. Mwhhaenx ngoenz sam donq daihgya cungj dwg cawj raet daeuj dang haeux gwn.

Geiq ndaej bi 1976 seizdoeng, gou ngamq ndaej roek bi seiz, ndawmbanj cibgeij boux lwgnyez haj roek bi, heuh dah cihcingh Vangz lauxsae son dou ciengq go、diuqfoux caeuq gangj gojgaeq.

Miz ngoenz he fwn gvaq ndit rongh, Vangz lauxsae daiq dou bae ndoeng laeng mbanj cetyouz. Raen miz haujlai raet hausaksak, dou couh angqvauvau gip raet hawj Vangz lauxsae.

Mwhhaenx ndawmbanj dou miz gouj boux cihcingh, seiq dah haj daeg, seiq dah cihcingh couh youq ranz gou ninz.

Haemhhaenx gwn caeuz sat, Vangz lauxsae heuh gou bae caeuq de ninz. Daengz gyanghwnz gou nyouh rad heuh Vangz lauxsae, mbouj nyi de doengh, ndawrug laepsaengsaeng youh mbouj miz daeng, gou nyouh gaenj couh daejnga’nga hwnjdaeuj. Daxmeh dingqnyi sing daej gou, couh hwnq- daeuj heuh Vangz lauxsae hai dou, hoeng mboujguenj daxmeh baenzlawz hemq, hix mbouj miz saek dah cihcingh ndiu gvaqdaeuj.

Yaep he, gou dingqnyi rog dou sing gangj nauhyied sadsad, aen dou deng geuh haeujdaeuj lo. Gou yawj- raen daxboh diemj aen daeng youz- haeu he, duicangj caeuq geij boux boh’au byaij haeuj rug daeuj, raen geij dah cihcingh gaenq heuj dox- caemq, baenzlawz ngauz hix ngauz mbouj ndiu lo.

“Gyoengqde gwn raet dengdoeg lo, vaiq bae ra haexma caeuq youz duhdaem daeuj guenq.” Duicangj saetsing naeuz. Daihgya doq ning hwnjdaeuj, gou dingq le deng hwk ndaej nyouh rih dangzvaq mbaeq- mbatmbat.

Haemhhaenx daengx mbanj bouxlaux nyaengqfoedfoed caeuq canghyw itheij daeuj bang gyoengq dah cihcingh gejdoeg, baenzhwnz mbouj ndaej ninz.

Haet daihngeih, Vangz lauxsae soengq gou diuz vinj vahoengz he, de naeuz:“Dahmeiz, docih mwngz lo, danghnaeuz haemhlwenz mbouj miz mwngz, dou couh mbouj miz mingh lo.”

Gou song fwngz ciep geu vinj Vangz lauxsae, sim’angq youh ndaeng soemj, raemxda venj rim gwnznaj, daejfwtfwt naeuz:“Docih Vangz lauxsae, neix dwg diuz vinj daih’it gou, caemhcaiq dwg diuz vinj daih’it mbouj miz benq nyib.”

……

“Daxmeh, dauqranz lo.” Dahlwg gou heuh sing he, gou cij fwt singj gvaqdaeuj, gwnznaj gou gaenq venj miz song roix raemxda, gou laeglemx uet bae, fwngz riuj daeh byaek lw, caeuq gyoengqde byaij ok bouq gwn caeuz bae.

Seizneix gwndaenj caeuq seiz lwgnyez gou doxbeij, caen dwg ca ndaej lumj mbwn caeuq dieg.

Gou doq byaij ndawsim doq ngon:

“Dangj yinghmingz lingjdauj,

Laux nyaeq gwndaenj raeuj,

Gaijgwz hailangh daeuj,

Guek raeuz bienqsadsad.

Docih gungcanjdangj,

Hawj bouxmbanj baenzfouq,

Ranzranz miz laeuz youq,

Gwn mbouj you mbouj heiq.”

（2 sat）