Vunz baihnamz maij gwn faenj. Youq Cenzcouh Yen youq, gyanghaet baez singj, doq aiq nyouq raen gij heiq hom faenjhungzyouz. Doengxhaet, byaijhaeuj aen diemq iq henzgai, heuh aeu vanj faenj ndatfwdfwd ndeu naengh roengzma menhmenh gwn, ngoenzmoq vunz Cenzcouh couh daj vanj faenj ndeu hainduj.

Baenzlawz Guh

Faenjhungzyouz Cenzcouh, mbouj ndaej noix faenjsaeq、hungz- youz、raemxdang duhhenj aeuq ndokmou.

Gij bouhloh guh faenj mbouj genjdanh, daj haeux bienqbaenz faenj, gij raemx guh faenj caemh gig youqgaenj. Raemx mbouj ndei, faenj caq okdaeuj heih soiq, miz heiqsoemj. Haeuxciem cimq raemx, seizhah cimq ngoenz ndeu, seizdoeng cix aeu cimq song sam ngoenz. Deq haeuxbieg cimq dumx doh, couh vaxok swiq cengh, muh baenz giengh, raenx guh baenzngauq luenzled, couh cuengqhaeuj raemxgoenj bae cawj. Deq baihrog cug baihndaw lij maqhuz ndip couh vaxhwnj cuengqhaeuj raemxcaep bae. Cib faencung gvaqbae couh dwkhaeuj aen gihdajgyaux gyauxyinz. Ndaej le gaenx guh baenz diuz loq luenz ndeu dwkhaeuj aen gihcaqfaenj bae, gu raemx goenj ndeu couh do youq baihlaj, faenjsaeq youq ndawgu cawj faencung ndeu couh vaxhwnj langh caep. Gij faenj ngamq caqok haenx, raezrang、saeqset、yinzfwd、mbouj heih soiq.

Cienq hungzyouz caemh gig gaujniemh gij goengfou cangh- guhfaenj. Youz ndat lai roxnaeuz mbouj gaeuq ndat、cienq nanz lai roxnaeuz cienq mbouj gaeuq, gij feihdauh caeuq gij saek hungzyouz couh mbouj deng. Lwgmanh hoengz gvaq raemx baez cawj, dawz ceh ok, gya gyu muh baenz mba. Nda rek cuengq youzduh, youz ndat couh raix mbalwgmanh, ceuj yaep ndeu doq dem raemx, aeu ndau mbouj dingz, aiq cienq baenz haj roek diemj cung cijndaej. Deq gij gienghlwgmanh mbouj nem fagcanj, hungzyouz couh cienq baenz lo. Gij hungzyouz guh ndaej ndei haenx hoengzfwg ronghcingx、youh hom youh rang.

Raemxdang duhhenj aeuq ndokmou cix dwg aeu ndokdoengzmou、duhhenj、hing、daeuhseih、maklozhan daengj liuh gya raemx bae cienq.

Faeg nohmou soiq le, coux vanj gya liuh、gya di raemxdang caeuq gyaux, aeu raemxdang goenjbyoetbyoet haenx cung haeujbae, nohmou couh cug lo. Neix dwg aeu bae boiq faenj.

Gij faenj ngamq caq ndei haenx aeu raemxgoenj baez romx couh cang vanj, dwk nohsoiq、coeng caeuq byaekhom, daek beuz raemxdang rwed haeujbae, gajlaeng caiq rwed hungzyouz, vanj faenjhungzyouz ndeiyawj、homfwd ndeu couh guhbaenz lo. Hwnjdaiz doq nip gaemz faenj haeujbak, caiq boep gaemz raemxdang he, faenj nyangqnyed、duhhenj biqbuqbuq、raemxdang homfwd singjsed, cix mbouj manh lai, youh sangjbak youh sek. Hawj vunz gwn vanj ndeu youh siengj gwn vanj daihngeih dem.

Cienzgangj

Faenjhungzyouz Cenzcouh lij miz aen goj ndeu. Cienzgangj, Cenzcouh miz boux lwghauq heuhguh Dangz Gozcungh. Bi ndeu seizdoeng, daxmeh de baenzbingh, gwnhaeux mbouj roengz. De heiq raixcaix, couh hwnjyieng gouz bouxsien Cangzngoz coengh de. Cangzngoz son de aeu sam cungj doxgaiq manh (lwgmanh、hing、ho) laeng Cenzcouh guh hungzyouz ma boiq faenj, neix couhdwg faenjhungzyouz. Cungj faenj neix sangjbak ndeigwn, gwn sat aenndang raeujrubrub. Daxmeh de gwn le sam baez, bingh couh ndei lo. Saeh neix cienz daengz gwnzbiengz diegde, gyoengqvunz cungj haenh Dangz Gozcungh hauqswnh, youh bae ranz de hag baenzlawz guh faenj. Faenjhungzyouz couh yienghneix cienz daengz seizneix.

Doiq vunz Cenzcouh ma gangj, faenjhungzyouz couhdwg gij feihdauh ranzmbanj. Daj baihrog ma daengz Cenzcouh, gwn vanj faenj- hungzyouz ndeu, couh roxnyinh caen ma daengz ranzmbanj.

（Cenzcouh Yen Yungzmeiz dij、 Luz Yizyauj hawj doz）