It

Seiq boux mehmbwk A、B、C caeuq D neix, dwg hujgeiq ndei caemhsaemq, gyoengqde hajcib lai bi, gak boux daj gak aen danhvei duiyouh lo.

Seiq mehmbwk neix ndang reux yienghnaj ndeiyawj. Rox cangndang, rox guh’angq, diuqfoux ciengq go cungj guh ndaej baenz. Lij gyaez guh gaiqgwn dem, dinfwngz dajcawj gyoengqde ak bw, ciengzseiz doxiu bae ranz neix ranz haenx guh gaiq- gwn.

Gij ndwenngoenz duiyouh gyoengqde gvaq ndaej cwxcaih dangq- maz. Miz mbangj vunz haenh gyoengqde rox gvaq saedceij, lingh mbangj cix naeuz seiq yah neix vunz geq sim mbouj geq, miz di fed!

Danghnaeuz coenz vah baihlaeng neix deng gyoengqde ndaejnyi, couh ngaiz hut.

Miz baez ndeu, seiq yah neix youq gwnzhaw byaij, gij cangndang gyoengqde miz di angjda, nyex ndaej vunz baedauq haeujsim.

Bouxsai cungnienz ndeu raen le naeuz:“Geij yah neix, yawj baihlaeng lumj lwgsau, yawj baihnaj baenz yahgeq.”

Yah A ndaejnyi le naeuz:“Mwngz rox mbouj rox gangj vah? Mwngz raen dou gizlawz geq ni?”

Boux haenx naeuz:“Naj nyaeuq mbouj dwg geq ma?”

Yah A naeuz:“Lwgnding ngamq okseng, aen naj nyaeuqyatyat, mwngz gamj naeuz de geq lw?”

Boux haenx ngoemx lo.

Haemhhaenx, youq gvangjcangz diuqfoux, bouxngonz ndeu naeuz:“Seiq yah neix, yienznaeuz nienzgeij laux, hoeng, din fwngz lij linj nw, diuqfoux caemh baenzngonz bw.

Yah B naeuz:“Dou laux? Dou lij saet ndaej diuq ndaej, din fwngz riengjret, dou laux lw? Gyoengqvunz bet goujcib bi haenx, diuq mbouj ndaej byaij mbouj baenz cij heuhguh laux!”

Bouxngonz haenx aenq saeh mbouj ndei, byaij deuz lo.

Ngeih

Miz ngoenzciet ndeu, seiq yah neix doxiu bae dieg funghgingj ndei ndeu ingjsiengq. Bouxboux daenj buh doxlumj——buhhau gen dinj, geu vunjfonx raez daengz gyaeujhoq, bouxboux bwz song geu byoem duengq roengz henzrwz, lij raek hungz- lingjginh dem. Daj gyae yawj bae, gyoengqde lumj siujhagseng nei, dwggyaez dangqmaz. Seiq boux cici haha lumj duz roeglaej ciuz nei, lij baij yiengh gak cungj ingjsiengq, gag guh gag angq, mbouj lwt mbouj langh bouxnden.

Miz bouxnden ndeu raen le naeuz:“Geij yah neix, vunz baenzlai laux lij cangguh lwgnyez, mbouj baenzyiengh di lawz!”

Coenz vah neix deng gyoengqde ndaejnyi.

Yah A naeuz:“Gven mwngz maz saeh?”

Yah B naeuz:“Dou cangguh lwgnyez youh mbouj famhfap, mwngz miz maz gienzleih daeuj gangj- boedboed?”

Yah C naeuz:“Dou maij cangguh bouxlawz couh guh bouxde, dou haengjheiq, mwngz yawj mbouj gvenq couh mbouj yawj.”

Yah D naeuz: “Mwngz simhaenz hix guh ni?”

……

Boux haenx gaenjgip deuz lo.

Seiq yah neix mbouj haengj vunz naeuz gyoengqde geq, hix mbouj fug geq. Hoeng, miz geij gienh saeh hawj gyoengqde maezvaeg.

Sam

Haemhhaenx, Yah A gwn caeuz gvaq le, yaek bae ranz dahnuengx gangjgoj. Dahnuengx hix youq yienh- singz youq, mboujgvaq mbouj caemh aen siujgih.

Okdou seiz, Yah A swnhfwngz dawz daeh nyapnyaj roengz laeuz bae vut. De daj haj laeuz byaij daengz lajlaeuz, byaij gvaq diuz haw hung, youh byaij gvaq diuz haw iq, aiq miz samcib faencung couh daengz aen siujgih dahnuengx youq lo. Ranz dahnuengx youq gouj laeuz, de naengh dendih hwnjbae.

Baez haeuj dou ranz dahnuengx, de cigsoh bae naengh aen daengq henzcongz gwnhaeux, swnhfwngz dawz daeh doxgaiq gyangfwngz ce gwnz congz gwnhaeux, naeuz hozhawq lai lo, heuh dahnuengx aeu raemx daeuj hawj de gwn.

Dahnuengx din fwngz riengjret ndingq cenj raemx hawj dahcej, gaenriengz de doq gej daeh doxgaiq dahcej dawz daeuj haenx, doq cam:“Cej, mwngz dawz maz doxgaiq ndeigwn daeuj hawj gou ne?”

“Bu!” Sing ndeu, amq raemx ndawbak Yah A sawqmwh byoq ok bak daeuj, dahnuengx de raen le maegsaeg lo.

“Nyapnyaj……daeh nyapnyaj ranz gou. Gingqyienz riuj daengz gizneix……” Caengz gangj sat, de riu ndaej gangj mbouj baenz coenz bae,dahnuengx de hix riu daengz raemxda conh.

Seiq

Singhgiz roek ngoenzhaenx, Yah B daiq daeglan ndaej seiq bi bae suenguhcaemz. Gyoengq nyez youq ndawde guh’angq, gyoengq bouxhung youq rogsuen naengh caj. Naengh nanz le Yah B roxnyinh ga naet, couh youq rogsuen youzbyaij. Gwq byaij gwq byaij, mbouj rox mbouj nyinh, daengz ranz lo.

Baez haeuj ranz, goenggvan cam:“Mwngz baenzlawz bouxdog dauq? Daeglan ni, bae gyawz?”

Yah B doeksaet yat, bongx gabi naeuz:“Ya! Daeglan lij youq gizhaenx. Ceddoh lo, gou lumz de bae lo!” Gangj sat, cung okdou bae……

Goenggvan hemq coh baihlaeng de:“Ngoenh dawz mwngz! Danghnaeuz daeglan ok maz saeh, mwngz gaej haeuj ranz!”

Haj

Haemhhaenx, ndawyienh miz yienjheiq, Yah C bae ngonz heiq. Gij heiq haemhneix ndeingonz raeuh, cezmuz lai yiengh. Bouxngonz caenx rim dieg, sing dop fwngz goksasa. Yah C ngonz ndaej maezmwdmwd.

Ngonz heiq gatsat lo, Yah C byaij bae coh giz dieg bingzseiz de daengx denceh haenx, sim de lij ce youq ndawheiq ndeingonz haenx, de doq byaij doq sing daemq ciengq go, saekseiz lij fwngz foux din diuq lumj lwgnyez nei.

Daengz gizdieg daengx denceh, Yah C doeksaet yat:“Denceh gou ni?” De baenq naj cienq laeng yawj seiqhenz geij dauq, hix mbouj raen denceh. “Deng caeg la?” De simgip liux, yawj seiqhenz gizgyae hix mbouj raen denceh. “Caen ngaiz caeg bae lo!” De najhawq liux, laebdaeb naeuz:“Fangz lawz caeg denceh gou bae? Hawj de haici deng boek dai, byaij roen deng daemj dai, gwn raemx deng mbaet dai!”

Doeklaeng Yah C dwk denva hawj 110. Gaenriengz youh dwk hawj goenggvan de, naeuz:“Baeuq, lwnh mwngz gienh saeh ndeu, mwngz gaej ndaq gou nw.”

“Maz saeh vaiqdi gangj!” Goenggvan de naeuz.

“Denceh raeuz ngaiz vunz caeg bae lo.”

“Mwngz ce youq gizlawz ngaiz caeg bae?”

“Gou gwih daeuj ngonz heiq, daengx youq gizdieg bingzseiz daengx haenx.”

“Lwgbaihcaiz mwngz! Vaiqdi bauqgingj!” Goenggvan de gangj sat, gipfoedfoed roengz laeuz, yaek bae yawjyawj.

Roengz daengz lajlaeuz, de anj lo——denceh youq ranz! De riunyaen lo, dwk denva hawj mehyah Yah C:“Mwngz, dinghcinj hai denceh bae ngonz heiq?”

“Gou gwih denceh okdou laya.”

“Bag! Vunzbag! Denceh youq ranz.”

“A……Nanzdauh gou dwg byaij roen daeuj ngonz heiq?” Yah C bak aj roengroeng.

Roek

Haetromh, Yah D cawj ngaizromh ndei lo, vunzranz gwn gvaq ngaizromh le gak boux okdou bae guhhong. Yah D dawz buhvaq vunzranz yaek saeg haenx dwk roengz sijyihgih bae saeg, gaenriengz de nyaengq hongranz. Banringz gvaq le, de cij fwt ndaejgeiq buhvaq caengz dak. Ya! Dwg lumz dak buhvaq, lau buhvaq nyaeuq liux lo.

De gaenjgip bae dak buhvaq, dak daengz geu buh daihsam, roxnyinh miz di mbouj doxdoengz, sijsaeq bae yawj, cij rox gij buhvaq neix caengz saeg, de dwglumz hai sijyihgih lo.

Gij saeh ndeiriu seiq yah neix, mboujdan dwg seiq gienh neix nw, lij miz haujlai dem, youq neix lwnh mbouj caez lo.

Haemh ndeu, seiq yah neix caemhdoih gwn caeuz, gak boux gag dawz saeh ndeiriu swhgeij daeuj lwnh, daihgya riu ndaej dungx in bae. Doeklaeng, gyoengqde doxcam:“Mwngz fug geq caengz?” Seiq yah neix mwngz yawj gou, gou yawj mwngz, mbouj miz byawz ngaek- gyaeuj, hix mbouj miz byawz ngauzgyaeuj……