Daj bakdoulaux miuhsaenzvangz gvax gvaq gij ciengzhumx, byaij coh laeng miuh seiz, gou engq menh lo, mbouj rox Aulungzgveiz youq mbouj youq ranz? De nyienh mbouj nyienh bang Ahveij? Ngoenzneix de laeuj fiz lwi? Yaek ndaq gou lai dam saeh bouxwnq lwi?

Gwq naemj gwq naemj, gou miz di ndeilau hwnjdaeuj lo, Aulungzgveiz beizheiq ndei seiz, ndaej daeuq de guhcaemz, lumj daeuq duzmeuz iq nei, hawj vunz angqyangz.

Hoeng, danghnaenz bungz de hoznyaek roxnaeuz laeuj fiz, couh aeu haeujsim lo, de couh lumj duz muima, mwngz nyig bwn lumh de, de itdingh rig heuj rig faenz, haep ndaej mwngz naj meng ndang saenz. Gou yied gyawj bakdou ranz de couh yied dungxcieg.

Lauxsaed gangj, lwgsai ndaw- mbanj lumj gou yienghneix hung, lauheiq caiq mbouj miz byawz gamj haeuj ranznamh Aulungzgveiz lo. Aiq dwg gou mbeihung gvaq gyoengqde, roxnaeuz bak van gvaq gyoengqde, de lumjnaeuz lai gyaez gou di, soqlaiz ndiep gou. Mboujnex, ngoenzlwenz gyanghaemh de baenzlawz ciengzsaeq lwnh gij goj siliengz de hawj gou nyi, engq mbouj rox caenndang soengq gou maranz lo.

Aulungzgveiz youq ndawsim bouxhung lwgnyez ndawmbanj, dwg bouxgvaiq he. Hoeng gou daj ndaejnyi gij goj de le, couh nyinhnaeuz de mbouj dwg bouxgvaiq, engq mbouj dwg bouxrwix. Yienznaeuz seizde gou lij caengz rox maz heuhguh aiqcingz, hoeng gou mumjgyumq roxnyinh de gaenq deng cungj rengz yawj mbouj raen he gaemguenj lo, cungj rengz haenx hawj de cengqgengz lix roengz- bae, doeknaiq roengzbae, diuqgah roengzbae, loengloek roengzbae, caemhcaiq deqcaj roengzbae.

Gou rox, gij gungzndoq caeuq haemzhoj ciuhvunz de, ceiq youqgaenj dwg de vih boux dahsau ndeu. Danghnaeuz seizde boux dahsau haenx haq hawj de, seizneix de itdingh miz moengj lwg humx ndang, aiq lwglaux hix ndaej cibseiq haj bi lo, daxmeh de hix mbouj dai ndaej baenz caeux, aen ranz reihnaz de hix mbouj deng gyuen caez, yah gyaeundei sienhsoh haenx hix haengjdingh caeuq de itheij caux aen ranz vuenyungz raeujrub he……

Boux dahsau haenx couhdwg Siu Cuh, mbouj rox Siu Cuh dauqdaej dwg byawz? Doeklaeng lwnh gij goj Aulungzgveiz hawj daiq seiz itdingh yaek cam, daiq itdingh rox ndawmbanj byawz dwg Siu Cuh, byawz dwg Ahgwnh!

(caengz sat)