Ngoenzneix dwg ngoenz singhgiz, gwn haeuxngaiz sat le, dahlwg gou riu naeuz:“Meh, haemhneix mbouj cawj haeuxcaeuz lo, raeuz daengx ranz vunz okrog bae gwn ba.”

Gou naeuz:“Youh okrog bae gwn? Seizneix yienghyiengh hwnj gyaq, gwn donq haeux he sai bae geij bak maenz ngaenz. Danghnaeuz gag cawx byaek dauqranz gag cawj lij ndei gwn youh noix ngaenz.”

Daeglan angqvauvau saet hwnj- daeuj, hemq yatyat naeuz:“Daxmeh, haemhneix gou siengj gwn noh duz- gungq、noh duzyiengz……”

Banhaemh roek diemj lai cung, dou daengx ranz seiq boux naengh ci bae daengz aen bouq gwn haeux ndeu, henzbouq miz aen diemq gai vanzgi lwgnyez. Daeglan baez yawjraen le couh riengjret buet bae gaemdawz aen cungqraemx ndeu mbouj cuengq fwngz.

“Binghbingh, ndawranz vanzgi mwngz gaenq lai lo, ra gizcuengq cungj mbouj miz lo, aen cungqraemx neix raeuz couh mbouj aeu loba.” Gou gangj sat, daeglan couh daejnga’nga lo.

Daeg lwggwiz riu naeuz:“Ngoenzneix de dingqgangj, couh cawx aen cungqraemx neix hawj de ba.”

Daeglan baez dingq, fwngz he uet raemxda, doq daej doq naeuz:“Docih daxboh.”

Byaij haeuj ndawbouq gwn haeux, vunz daeuj gwn haeuxcaeuz nauhyied sadsad, geijcib aen daiz cungj naengh miz vunz ndaetfwdfwd.

Dou naengh roengz senj byaek ndei le, yaep he, geij dah fuzvuyenz couh dawz byaek dawz dang daeuj baij rim gwnzdaiz. Miz raemxdang duzfw、duzgungq、nohgaeq daengj, rangfwtfwt, dou cungj gwn ndaej diemzsub mizfeih.

Dou gwn imq le gwnzdaiz lij lw miz haujlai byaek, gou heuh fuzvuyenz aeu daeh daeuj cang byaek lw yaek dawz dauq ranz. Dahlwg dingqnyi le couh riunyumnyum naeuz:“Daxmeh, lw couh lw lo, mbouj aeu lo, ngoenzcog caiq cawx byaek sien.”

“Sou mbouj gwn gou gwn.” Gou doq gangj doq aeu daeh cang noh lw haeuj daeh. Seizneix gou sawqmwh dauqngeix seiz iq gou.

Mwhhaenx, daengx ranz cib boux vunz, baenz bi hix mbouj miz cib gaen noh roengz dungx. Daj gou roxyiuj hwnj, ngoenzngoenz gwn gij haeuxcuk sawdikdik, yawj ndaej raen daej gu caeuq duz ngaeuz bonjfaenh. Ndaw- ranz roek boux lwgnyez, haetnaengz daxbuz cawj ngaiz seiz, swnhbienh saz lwgsawz lwgbiek haeuj cauq bae, cug le viq okdaeuj, faen baenz roek faenh. Mwhhaenx, dou hix gig dingq vah, banhaet hwnqdaeuj, mboujguenj byawz gwn gonq gwn laeng, hix laux- laux saedsaed gag boux gag gwn faenh swhgeij.

Mwhhaenx ndawdoih gig hoj- ndoq, ndawranz haeux ciengzciengz mbouj gaeuq gwn, gwn donq ngaiz couh heiq donq caeuz, ndawdoih bi he baen ndaej geij gaen youz duhdaem, daengz ciet hung roxnaeuz ndwen- cieng le, ndawdoih cij ndaej gaj duz mou hung he, aen ranz baen ndaej gaen baj noh.

Gou miz song daeg beix sam dah cej, gou dwg boux ceiq iq, ngoenz- naengz gou mbouj yungh guh hong- ranz, cungj dwg daegbeix dahcej guh. Hoeng hawj gou ceiq gwn vi dwg, gou coengzlaiz mbouj ndaej cawx gvaq saek geu buh moq vaq moq, cungj dwg daenj gij buhvaq daegbeix dahcej daenj dinj haenx, fong mbaq youh fong dangzvaq roxnaeuz gyaeujroq dem.

Miz baez he, gou raen daxmeh youh cawx buhmoq hawj dahcej daenj bae hagdangz, gou raen mbouj miz faenh gou, couh ndaeng soemj ndoj haeuj gungz dou bae daej.

Daxmeh umj gou hwnjdaeuj, bang gou uet raemxda, sim’in naeuz:“Lwg iq gvaiq gou, gaej daej lo, ngoenzlaeng daxmeh caiq cawx buh- moq hawj mwngz daenj.” Gou haet muengh hwnz hix muengh, hoeng cig daengz bi moq daeuj daengz, gou hix muengh mbouj raen geu buh moq.

Ndawdoih miz aen suenmak he, geijcib moux gvangq, ndawde miz makdauz、maknganx、gyoij、makgam daengj. Daengx bi seiqgeiq cungj miz lwgmak cug venj rim gwnzgo, gij heiq lwgmak biu ok rog suen daeuj, nyex ndaej gyoengq lwgnyez ndawmbanj yawj ndaej myaiz rihbyoegbyoeg. Hoeng seiqhenz suenmak cungj cuk ciengz roxnaeuz ndaem oen humx ndaej ndaetndwtndwt, ndaw suenmak youh miz boux vunz he hendawz, siengj haeuj suen bae caeg mak gwn gig nanz.

（1）