mbouj sang, ndigah gyoengq vunzmbanj heuh de guh Augizdaemq. De daemq couh daemq di, hoeng mbouj dwg cien daemq fanh daemq, miz mij haj daih geij, couh dwg bouxvunz maj ndaej bangq, baenz bak seiq geij gaen naek, yawj hwnjdaeuj couh raen daemqdwd, lumj ndaek doenfaex nei.

Augizdaemq rox di saw, doenghbaez ranz de guh ndaej gwn, haemq miz cienz, lij iq ndaej haeuj hagdangz bae doeg geij bi saw gvaq. “Ciuhgeq lwg bouxak, cungj haeujhag doegsaw, caih mwngz seiqdaih lawz, doegsaw cij dwg soq.” Ranz Augizdaemq cungj rox soengq de doegsaw lo, hoeng de cix mbouj haengj yawj gij saw ndaw hagdangz, bienbien maij naeq gij Sawndip dauhgoeng caeuq gij sawheiq sawfwen ndawbiengz lablab cabcab haenx. Mwh gag youq, de haengj haibak eu fwen ngwngngwng, lij hwnj fwngz hwnj din fouxyuk fouxyak dem. Siujhag mbouj doeg sat couh dauqranz guhhong lo.

Cungguek moq laebbaenz le, vunzmbanj cungj deng gyahaeuj gauhgizse, riengzlaeng youh ndaej gvihaeuj aen swnghcanjdui yinzminz gunghse. Augizdaemq “ngoenz lumj bae guh hoiq, cimh doih aeu goengfaen, gwndaenj cungj mbouj baenz, deng ngaiz haemz ngaiz hoj”. Mwh ndaejhoengq, de lij haengj gag haeujmaez yawj gij sawheiq Sawndip haenx, saekseiz hix cimh saw aeu gij diuhfwen bonjdieg eu roengzbae, gag eu gag angq, hix caen eu ndaej maqhuz lumj yiengh. Gij sawheiq ceijsa aeu mauzbit raiz de, cungj dwg gij gojgaeq mizyinx ndawbiengz, bonjbonj gaeuqguetguet, lauheiq cungj geq gvaq goengcoj bae, cix mbouj rox daj gyawz ndaej daeuj. Ndawsaw gij ciengqswz coenzcoenz cienzbouh yungh fwen bien baenz, doeg roengzbae roxnyinh swnhluetluet, yinhlwd gaemhgyaeuj、gaemhhwet、gaemhdin gizgiz guh ndaej ndeindindi, bingzcaek hix aeu ndaej cingjcingj caezcaez, caen dwg bonjsaw yisuz gyaqcig sang, gvaiq mbouj ndaej Augizdaemq gyaez baenz mbouj sij cuengq fwngz. Gij saw neix gangj byot bae, “mbouj geij boux rox yawj, doeg bae hawj vunz nyi, vunz yaek maez yaek fiz, rwz rox bi rox doengh”.

Doengh bi guhhong swnghcanjdui haenx, gyoengq lwgnyez doegsaw daengz mwh nyaengq dajndaem dajsou ndaej cuengq “gyajnungzmangz”, anbaiz bae guh gij hong haemq mbaeu ndawdoih, lumj cimz duhdoem、dak haeux、ndaemnaz doengh gijneix. Mwhde, gyoengq lwgnyez gag guh cuj ndeu, mbouj hawj bae gyonj gyoengq bouxlaux, lau gaz fwngz gaz din, youz duicangj baij boux guh ndaej hong ndeu bae daz lwgnyez guhhong. Augizdaemq ceiq ndaej baij bae daz lwgnyez guhhong lai lo. Vihliux hawj gyoengq lwgnyez dwgrengz guhhong, Augizdaemq couh doiq gyoengqde naeuz:“Daihgya guhhong roengzrengz di, yaephe gou eu fwenheiq mizyinx hawj sou nyi, bouxlawz mbouj roengzrengz guh couh mbouj miz faenh!” Gyoengq lwgnyez cungj maengxangq ndaej diuq hwnjdaeuj hemqhuhu. Augizdaemq ciu neix lingz dahraix, gyoengq lwgnyez cingqcaen haenqrengz guhloedloed, bouxboux hanh roenx hanh rih. Daengz mwh yietbaeg, Augizdaemq couh hix gangj hix eu raix dungx goj sawheiqfwen de okdaeuj, lumjbaenz 《Fuk Man Ndeu》《Yahmui》《Dahgyax》《Bohgenj》, gangj ndaej miz sing miz saek, eu ndaej youh set youh rwenz, hawj gyoengq lwgnyez dingq ndaej maezmwdmwd bae. Vunzmbanj cungj haenh Augizdaemq daz lwgnyez guhhong baenz!

Doengh bi gaenj haeuxgwn haenx, vunzlai cungj mbouj ndaej gwn donq imq, dungx iek ndaej da cungj raiz, bouxboux mbouj miz maz simgei guhcaemz, doengxngoenz cungj bae ndawdoengh ndawbya vet ra raghaz、goeksamsok、goenqgyoij、maenzhaeuxremj doengh gijneix daeuj dienz dungx. Augizdaemq caemh mbouj ndaej gwn donq imq, hoeng de ciuqyiengh haengj yawj gij saw gaeuqguet de, saekseiz lij dawz bit raizraiz vehveh dem, lumj mbouj rox dungx iek nei. Miz vunz lij laihnaeuz de miz bonjsaeh gag ra ndaej gaiqgwn ne.

Mwh haenx caengz miz densi yawj, engq mbouj miz soujgih loengh guhcaemz, vunzlai ndaejhoengq cungj dwg comz youq laj goreiz gyangmbanj hung gangjgoj gangjboq. Nanz mbouj nanz Augizdaemq hix bae. Baez ndeu, gyoengq vunzmbanj cingq gangj ndaej mizyinx, miz boux he daeuq Augizdaemq naeuz:“Augizdaemq, mwngz rox eu fwen, ciengzseiz eu hawj gyoengq lwgnyez nyi. Mwngz hixnaengz caemh eu di hawj dou daihgya dingqdingq gvaqyinx vei!” Yienghneix, Augizdaemq couh youq dangqnaj vunzlai langh sing guhfwen hwnjdaeuj.

De eu gij fwen ndei daj ciuhgeq louzcienz roengzdaeuj haenx, eu gij fwen daj gwnz hawfwen sam nyied sam cimh vunz gip ndaej haenx, caemh eu gij fwen gag guh de. De gag guh fwen hix guh ndaej ndei guh ndaej soh, gij fwen de miz senhconz gij cingsaenz coenzvah Mauz cujsiz, lumj baenz——“doengh boux gungcanjdangj, couh dangq naed ceh ndei, lwgminz dwg namhnaez, ndaem bae rox okrag”; caemh miz danqhaenh Cungguek Gungcanjdangj gwzming ndaej hingz, daiqlingx daengx guek lwgminz hwnqguh aen biengz sevei cujyi miz gwn miz daenj, lumj baenz——“gyo miz gungcanjdangj, gaijfang ndaej guh baenz, daengx seiqgyaiq caez raen, laebbaenz Cungguek moq. Dangjyenz daeuj okdaeuz, daiq raeuz gaij diendeih, daengx guek caez haengjheiq, caux ndaej aen biengz miz”.

Augizdaemq baez ndaejhoengq couh daeuj laj goreiz gyangmbanj guh fwen, de baez guh fwen couh miz vunz comz daeuj dingq de eu, caemhcaiq ciemh ngoenz ciemh miz vunz daeuj lai, humx laj goreiz gvaengx dem gvaengx ndaetndwtndwt. De ukgyaeuj gvai, guh fwen sohluetluet, aen sing de hix ndei, rwenzrwz dangqmaz. De guh lai le, daengx mbanj lauxlaux oiqoiq cungj gyaez dingq de eu. Seizhwngq, de eu youq laj goreiz; seiznit, de eu youq henz doifeiz ndawranz, lox ndaej gyoengq vunzmbanj daeuj caenx ndaej ranz rimsad. Yah de naeuz de, guhlawz baenzneix hwnjyinx ne? De riuhehe naeuz:“Hw, neix mwngz couh mbouj rox lo, guh fwen ndaej dingj iek.”

Doeklaeng, gauj “vwnzva dagwzming”, buq “seiq gaeuq”, gij fwen raeuz deng naeuz dwg gaiq “seiq gaeuq”. Vihneix, Augizdaemq deng dawz bae youzdaeuq, gwnzgyaeuj daep aen mauhceij soemswd ndeu, fwngzswix riuj aen laz ndeu, fwngzgvaz dawz gyaengh faexroq ndeu, najaek hoij gep benj nem coij saw hung ndeu——dwk roengz boux daibyauj funghgen vwnzva gaeuq. Song boux minzbingh apsoengq de youz mbanj gvaq mbanj, de doq roq laz doq coh vunzlai “nyinh loek”:“Gou coihyak doeng dien, boqcienz vwnzva gaeuq, mbouj gag swiq ukgyaeuj, okdaeuj gyuek haih vunz……” “Nyinh loek” couh “nyinh loek” lo, hoeng Augizdaemq ndawhoz cungj mbouj fug, saeh gvaq le lij gag damz ndaq song boux minzbingh haenx:“Song ndaek dangq duzfangz, yiengh vang lumj duzguk, cingqsoq gyaengh faexnduk, vunz huk mbouj rox fwen.”

Caiq doeklaeng, daengx guek gaijgwz hailangh, Augizdaemq nienzgeij hix geq lo. Baihgwnz aeueiq gij fwen ndawbiengz, lij daegdaengq heuh Augizdaemq bae ndawyienh haihoih dem, daep aen mauhnyangj “boux swnjcienz feihvuzciz vwnzva yizcanj” hawj de. Augizdaemq haengj haeujrwz saeh moq hingzsi moq, de yawj densi yawj bauqceij baez raen daengz maz cingsaenz moq baihgwnz, sikhaek guh baenz fwen, eu hawj vunzlai nyi——

“Dangj raeuz bonjsaeh laux,

Ndaej caux biengz vuenyungz,

Guekgya baenzneix hung,

Ndaej bang gungz gvaq doh.

Heuh raeuz caemh diuz sim,

Yaek yamqdin baenaj,

Buetbongh doq fad max,

Mauhgvaq guek baihsae.

……”

Gyoengq vunzmbanj baez dingq gvaq gij fwen Augizdaemq, maz cingzgvang dangj raeuz guek raeuz caeuq saeh hung gaenhgeiz gwnzbiengz cungj ndaej roxyiuj seuqsat.

Miz vunz yaengx aen lwgfwngzmeh haenh Augizdaemq naeuz:“Ak ho, ndaej dingq gij fwen mwngz, cungj ak gvaq ndaej bae senhgyangjvei dingq doengh boux guh gangjgaij haenx bae.”

Augizdaemq bi gyaeuj naeuz:“Ei, mbouj ndaej luenh vab bw, doengh boux de cungj dwg lauxhangz dwg bouxsae, gou ne, cix dwg boux vunz lajmbanj bingzciengz ndeu.”

Boux vunz haenx riu naeuz:“Mbouj dwg luenh vab bw, eu fwen cungj beij gangj vah ndei dingq lai vw!”