Daihngeihcib Gij Ywdoj Yw Deng Ngwzdoeg Haeb

Dou doeknaiq byaij deuz lo.

Geij naed maknganx ndawbied, deng gou bibuengq ndaej naeng dek raemx lae, gou baez hozndat, hixnaengz cungj dauj roengz ndawmieng henzroen bae caez, dawz aen bied hoengq he maranz.

Daiq raen gou dauqma sing he hix mbouj dwen, gipmuengz daj ndaw ranzcauq dawz lwgmaenz okdaeuj hawj gou gwn.

Gou saedcaih gwn mbouj roengz, coux gvaqdaeuj cuengq youq gwnzdaiz.

“Vaiqdi gwn ha, lij ndatfwifwi ne!”

“Ahveij deng ngwzdoeg haeb lo.” Gou gangj.

“Maz? Ahveij?”

“W!”

“Seizneix ne?”

“Gaenq youq ranz de lo, daxmeh de bang de sup lweddoeg okdaeuj.”

“Duzyou baujyouh, Simjmehveij mingh hoj, lij coz couh deng maiq lo, Ahveij dwg gij mingh de ha.”

“De mbouj deng dai ne.” Gou haeb gaemz lwgmaenz ndeu, doq nyaij doq dap.

“Daengz ndawsuen bae ra meh mwngz dauqma, Ahbyauh, vaiqdi gwn gwq.”

“Guh maz?”

“Heuh meh mwngz bae yawjyawj Ahveij ha.”

“Meh gou youh mbouj rox maz ywdoj—— deng lo, daiq, wnggai bae ra Aulungzgveiz ha, de rox baenzlawz yw ne.”

“Deng, deng, cengdi couh lumz lo, mwngz couh bang Ahveij buet bae ra Aulungzgveiz ba, deng ngwzdoeg haeb mbouj dwg gangjriu.”

“Gou doq bae.”

Gou cuengq roengz lwgmaenz, ndwn hwnjdaeuj couh buet ok bakdou bae.

“Gwn lwgmaenz le caiq bae luba……”

Daiq youq baihlaeng hemq, gou dwg bouxhozgaenj, baez ngeix daengz couh aeu guh, baenzlawz ndaej caj daengz gwn lwgmaenz liux cij bae ne? Bulu couh yat gvaq giemxdou lo.

Gou riengjret ndonj gvaq ndoengfaexnganx, gvax gvaq geij aen ranz, gaenq muengh ndaej raen gij yiemhmbwnj sang’vidvid miuhsaenzvangz lo, gou menh roengzdaeuj doq diemheiq geij baez le, caiq laebdaeb buet.(caengz sat)