Daegdaih raen Daegnyez ndaej baenzlai ngaenz dauqma, roxnyinh haengjdingh mbouj dwg daegnuengx baengh guhhong ndaej, de youh miz cawjeiq rwix lo. De haep Daegnyez naeuz:“Hwk! Mwngz gungz ndaej lumj laeng duzfw nei, diuz bwn he cungj mbouj miz, gij ngaenz neix dwg caeg aeu faenh gou! Vaiqdi boiz dauq hawj gou!”

Daegnyez couh lwnh gij ngaenz daj gwnz go faexcuk doek hawj daeggo Daegdaih nyi.

Haemhde seiz gaeq haen, Daeg- daih couh lumhlaep caegcaeg ganj bae diegmoh duz mahenj, siengj ngauz aeu ngaenz. Hoeng fwngz de ngamq bungq faexcuk, sawqmwh yiengj sing “gululu”, daj gwnz faexcuk loenq roengz baenzboengj rin roengzdaeuj, gaiq rin neix hung lumj gaemxgienz nei, moeb deng ndang de bae. De in ndaej hemqcakcak, de hozhwnj dangqmaz, loek go faexcuk bae lo!

Daegnyez rox le gig sim’in, de buq faexcuk baenz diuz, san baenz aen loengz he, banhaemh cuengq youq lajcongz. Ranzrongh seiz, de hwnq- daeuj yawj coh lajcongz. Ndawloengz coux rim gyaeqgaeq hung bae! Daegnyez angq ndaej diuq hwnjdaeuj! De gag naemj: Gou ngoenz gwn aen gyaeq he, gizyawz rom comz gij gyaeq neix roengzdaeuj caiq dawz bae gai, gij ngaenz gai gyaeq ndaej rom roengzdaeuj, doeklaeng dawz bae cawx duz vaiz ndeu dauqma.

Daegdaih raen Daegnyez mbouj ciengx gaeqmeh hix miz gyaeq gwn, couh bae cam Daegnyez. Daegnyez youh lwnh hawj Daegdaih gij gyaeq de gwn daj gyawz ndaej. Haemhde, Daegdaih couh bae caeg aeu aen loengz Daegnyez lo. De dawz aen loengz lumj dawz aen dijbauj nei, haeujsim cuengq youq henz swiz, doeklaeng couh ninzndaek lo.

Ranz ngamq rongh, de couh ndiu lo, baez siengj daengz yaek ndaej gwn raemxdanggyaeq mizfeih lo, ndawsim de diemzsubsub. De doq iet fwngz lumh haeuj ndawloengz bae aeu gyaeq. Byawz siengj daengz, ndaw- loengz coux rim le gij haex duzma niuneknek! Fwngz de haeu dangqmaz, de hozndat raixcaix, vut aenloengz ok bakdou bae, hwnj feiz couh coemh aenloengz bae lo.

Daegnyez roxnyinh hojsik lai, de aeu gaiq baengz he suek gij daeuh aen loengz ndei, haem youq goek bya mbanj laeng.

Ngoenz daihngeih, Daegnyez bae dieg haenx yawj. A! Gwnzmoh aen loengz maj ok go lwggyoux he! Gaeu gyoux baenz song aen gyoux hung lumj aenloz nei! Daegnyez yawj go lwggyoux youh naemj: Ndaej song aen gyoux hung neix youh miz maz yungh ne? Gwn mbouj ndaej, hix gai mbouj ndaej ngaenz. Ai, daeggo cungj mbouj nyienh gou gvaq ndaej ndei, cungj haih gou, seizneix ndwenngoenz gou lumj gaxgonq nei gungzhoj. Baenzneix gou mboujyawx ndonj haeuj ndaw lwggyoux bae ninz dai suenq lo. Doeklaeng, de couh youq aen gyoux he hai aen congh ndeu, doeklaeng couh ndonj haeujbae lo.

Daegdaih lau Daegnyez youh miz caizheiq ndei, geij ngoenz neix cungj raeblaeng gaenriengz Daegnyez, haet- neix hix dwg yienghneix. Seizneix de raen Daegnyez yienghneix guh, de hix sikhaek ndonj haeuj aen lwggyoux wnq bae.

Dauq gangj, gwnzbya mbanj laeng miz aen gamj he, miz duz lingzsaenz youq ndaw. De dwg vuengzlingz, lajfwngz de miz boengj duzlingz iq. Gyoengqde daj gwnzmbwn roengzdaeuj, guenj gij saeh gwnz- biengz, ceih yak fad rwix, bang boux deng giengq deng hangz guhdaeuz.

Ngoenzneix, duz vuengzlingz raen laj bya miz song aen lwggyoux hung, noix raen neix bw! De roxnyinh geizheih, couh heuh gyoengq duzlingz iq roengz bya bae ram lwggyoux haeuj ndawgamj. Vuengzlingz raen ndaw lwggyoux miz vunz, couh heuh boux he okdaeuj cam. Boux de cingq dwg Daegnyez, de couh lwnh gij saeh ginggvaq hawj vuengzlingz nyi.

Vuengzlingz siengj yaep he, naeuz:“Mwngz gwn haemz gwn hoj lai lo, baenzneix gou hawj ngaenz hawj mwngz bae cawx duzvaiz dauqma cae reih ba! Daeggo mwngz sim yak sim doeg lai lo, mboujguenj de caeuq mwngz dwg song aen lwggyoux caemh diuz gaeu he, couh mbouj hawj de dai lo! Hoeng, de aeu deng mboengj goujcib gouj baez cijndaej!”

Daegdaih deng heuh okdaeuj, cigsoh deng mboengj goujcib gouj baez, bak de rwz de oklwed liux, daengx ndang hix mbouj miz saek giz naeng lij baenz gaiq, de yaek dai sadsad lo!

Daegnyez lumhlumh aen sim- daeuz, raen lij diuqdetdet, de goq mbouj ndaej lingx gij ngaenz vuengz- lingz hawj, gipmuengz aemq Daegdaih roengz bya bae lo.

Byonghhwnz, rug Daegdaih lij diemj daengyouzhaeu. Daegdaih dauqdaej ndaej ndiu gvaqdaeuj lo, raen bonjfaenh ninz youq gwnzcongz, Daegnyez cingq bang de oep yw; gwnzdaiz henzcongz lij miz gij raemxyw、raemxdanggyaeq.

Daegdaih yawj Daegnyez baeg dangqmaz lij ciuqgoq bonjfaenh, gag siengj: Daegnyez sim baenz ndei ha, gou baenzlai baez haih de, de seizneix lij yienghneix dwgrengz bang gou goq gou, gaxgonq wnggai dingq gij vah daxboh.

Daegdaih gag naemj bae naemj dauq, fajnaj gag nding daengz goekrwz bae, de gaem fwngz daegnuengx, daejsebseb hwnjdaeuj……

Daegnuengx raen daeggo yiengh- neix, hix rox daeggo roxsoq lo. Daj baezneix hwnj, song beixnuengx youh angqfwngfwng comzyouq ranz ndeu lo. Songde doxndiep doxgyaez, doxbang doxgoq, caj cungj baenzranz miz lwg le, cij vuenyungz baen ranz.（2 sat）