Gij ceijraed laeng gwnzbiengz Boux- cuengh Cingsih lizsij gyaeznanz, dwg cungj yisuz vwnzva gwnzbiengz, diegde ca mbouj geijlai ranzranz cungj nem roxnaeuz cap ceijraed. Cawz aeubae nem ciengz、dou、cueng、aengingq、daengloengz, vunzlai lij nyinhnaeuz gij ceijraed bohmo、mehsien raed haenx ndaej gyaep yakrwix、 cawz binghnanh、 bauj an’onj、 demgyaeu daengj. Ceijraed diegde lai cungj lai yiengh, gij raiz gak miz daegsaek, ndawde giuhva、 ndaundeiq yinxcaiz、 ndaundeiq vwnzvuj、 ndaundeiq bingzan、 ndaundeiq demgyaeu、 maxgoengsae、 maxgwnzmbwn、 ceijraed doenghduz doenghgo daengj aeu bae guh yizsiz haenx haemq daegbied.

Giuhva

Giuhva dwg mehmizndang ndaej caet ndwen de bae laeng bohmo ra ma haenx, maqmuengh lwg de seng daeuj ndang cangq, majhung baenzgya, baenzseiq gvaq ndaej ndei. Giuhva dwg raezseiqfueng, cungqgyang sam boux vunz yaengx song fwngz, lajdin sam hanzvang guh giuz, lajgiuz cix dwg song duj va, eiqsei naeuz lwgnyez byaij gvaq giuz daeujdaengz gwnzbiengz; baihgwnz bouxvunz miz song aen daengloengz, dwg naeuz gij roen lwgnyez ronghsag lumj daengloengz nei; baihgwnz youh miz sam aen lwggyoux, ndawde miz laeuj, daibyauj lwgnyez caengz doekseng. Song mbiengj giuhva daj gwnz daengz laj cungj miz dujva、mak、haeuxyangz、haeuxrieng、cenjlaeuj、aenvanj、gouhdawh caeuq aen sim ndeu, gonqlaeng mbouj ndaej gaij, neix couhdwg gij seiqvunz lwgnyez.

Ndaundeiq Yinxcaiz

Ndaundeiq yinxcaiz dwg doengh gij vunz cibbet daengz roekcib it de hab yungh. Cungj ceijraed neix luenzli, seiqhenz miz baenz gvaengx heujgawq, cungqgyang dwg diemj luenz ndeu, seiqhenz youh miz roek boux vunz doxheux, gyoengqde yaengx song fwngz sang gvaq aen’gyaeuj, guhbaenz yiengh gouzfuk, naj coh haeuj cungqgyang bae; baihrog youh miz roek boux vunz caemh guh yiengh gouzfuk, hoeng naj coh baihrog, eiqsei dwg haidou yinxcaiz haeujma.

Ndaundeiq Vwnzvuj

Ndaundeiq vwnzvuj dwg vunzlai muengh aeu faenh hong ndei ndeu cij nem haenx. Ndaundeiq vwnzvuj raezseiqfueng, ceiq baihgwnz dwg baenzgvaengx heujgawq luenz, caengz baihndaw dwg roek diemj luenz heux diemj luenz ndeu, neix couhdwg ndaundeiq songzmou; ceiq baihlaj miz sam aen dougungj, song mbiengj gak miz aen lwggyoux ndeu; baihgwnz dougungj dwg boux vunz yaengx fwngz ndeu, gwnzfwngz de dak aen caw ndeu, lajdin dwg sam diuz hanzvang deu va; song mbiengj bouxvunz gak miz duzlungz mbin haenx. Daengx mbaw ceij dwg naeuz “vunz” byaij gvaq “doulungz” baiqraen “vuengzdaeq”, muengh miz faenh hong ndei ndeu.

Ndaundeiq Bingzan

Ndaundeiq bingzan cix dwg dawz lwgnyez beijguh dujva hailangh rengzhoengh ndeu. Cungj ceijraed neix luenzli, gij bawx de miz song caengz heujgawq luenz, song caengz baihndaw cix dwg roek limq va deu hoengq, simva dwg aen luenz saedsim ndeu. Vunzlai nem de dwg mbaenjgouz lwglan an’onj.

Ndaundeiq Demgyaeu

Ndaundeiq demgyaeu dwg caeuq doenghboux seiqcib gouj bi doxbae haenx nem. Aen de caemh luenzli, caeuq ndaundeiq yinxcaiz doxlumj. Roek boux vunz cix naj coh baihndaw, dak hwnj aen ndaundeiq cungqgyang, neix couhdwg naeuz dawz vunzlaux dak doxhwnj, nyienh de ndang cangq、dem fuk、souhyienz raez.

Ceijraed Doenghduz Doenghgo

Gij yiengh ceijraed doenghduz doenghgo caeuq gij caen de doxdoengz, neix dwg muengh vunzlai ciengx maz baenz maz, dajndaem ndaej sou lai.

Seizneix, gwnzbiengz Cingsih lij miz hwngq raed、nem、cap ceijraed, gwnzde ce miz gij maqmuengh boeksaed vunzlai, yienh’ok beixnuengx Bouxcuengh diegde muengh gvaq ndwenngoenz engq ndei, ngawz biengz bingz vunz an’onj、 lwglan baenzvunz daengj. Vihle ciepcienz fatyiengz gij dinfwngz raed ceij, diegde lij hai ban、hai dangzgo raed ceij daengj. Bi 2016, gij ceijraed laeng gwnzbiengz Bouxcuengh Cingsih ndaej senj haeuj buek daihroek swcigih gaep feihyiz mingzloeg.

（Doz caeuq swhliu daj Aen Vwnzva’gvanj Cingsih Si ndaej）