laemx lo! Faexsaenz laemx lo!

Ngoenz ndeu haetromh, gyoengq- vunz Hawvenh couh hemqcaca. Gyoengqde bouxboux doeksaet, boux- boux roxnyinh geizheih.

Gyanghaw Hawvenh miz goraq ndeu, cijaeu daengz gvaq Hawvenh, couh ndaej raen go faex neix, cijaeu raen gvaq go faex neix, mbouj miz bouxlawz mbouj roxnyinh geizheih, mbouj miz bouxlawz mbouj doeksaet damz:“Go faex neix seizlawz maj youq gyanghaw? Vihmaz go faex neix youq cingq gyanghaw mbouj faenz bae ni?”

Goraq neix sang samcib mij baedauq, goekfaex hung lumj aen doengjraemx nei, geijcib bi roxnaeuz geij bak bi maj youq gizhaenx, nyefaex mbouj lai, mbawfaex dauq mbouj noix, bi daengz haemh mbawfaex cungj dwg heuauau, gig noix loenq mbaw. Ciuh dem ciuh roengzdaeuj, vunz gwnzhaw、vunz mbanj gyae mbanj gyawj cungj heuh goraq neix guh faexsaenz.

Aiq dwg lau ciemq roen, lau git vunz bae ci vaij ba, lajgoek goraq mbouj humx saek yiengh, goek faex seiqmienh hoengqcwtcwt.

Hawvenh gek sam ngoenz couh dwg ngoenzhaw ndeu, ngoenzhaw, boux gai byaek、boux gai loz gai lamz、boux gai dangz gai bingj cungj miz. Faexsaenz youq gyanghaw, vunz bae vunz dauq, laj goekfaex ndei guh gaicawx, baez daengz ngoenzhaw, boux guh gaicawx couh ganj caeux daengz lajgoek go faex neix daeuj ciemq dieg guh gaicawx.

Ndwenngeih cibgouj dwg haw- fwen Hawvenh, bi daengz ngoenzneix, boux gyae boux gyawj cungj daeuj youz hawfwen, gyang Hawvenh vunz cien vunz fanh, gyaeujgai daengz rienggai cungj dwg boux bae boux dauq ndaetfoedfoed, laj faexsaenz seng’eiq couh engq hoengh lo.

Bi ndeu hawfwen ngoenzhaenx, laj faexsaenz boux gai boux cawx, boux bae boux dauq nauhyied humhum. “Ciiq nap vunz lo, ciiq nap vunz lo.” Sawqmwh dingqnyi miz sing swenj. Dwg boux naihlaux ndeu youq laj faexsaenz cingq cawx gyoij, deng boux baedauq daemj laemx roengz lo, aen ciiq he ngamq hai gvaqdaeuj, nap deng faj ga naihlaux. Vunz lailai, sing hemq deih, mbouj miz geijlai boux ndaejnyi miz sing hemq, cijmiz doengh boux youq gyawj aen ciiq haenx gag doxnaeuz fwngz gaem fwngz dawz lanz aen ciiq hwnjdaeuj.

Faj gaswix naihlaux deng ci nap sieng cik nyienghdin, lwed laeraeng- raeng, dingqnaeuz youq yihyen yw le cibgeij ngoenz cij ndaej maranz, sai bae haujlai ngaenzcienz.

Daj baez haenx hwnj, gwnz go faexsaenz couh venj miz gaiq baiz ndeu, naeuz mboujcinj youq lajfaex baij dan guh gaicawx lo. Ngoenzhaw daengz, laj go faexsaenz gvengq lo, vunz bae ci gvaq fuengbienh haujlai.

Miz haemh ndeu, gyoengqvunz Hawvenh cingq gwn caeuz, sawqmwh dingqnyi “bum” sing yiengj ndeu, gyoengqvunz gwnzgai bouxboux hai- dou okdaeuj yawj. Laxlawz dwg aen ciiq ndeu daemj daengz goek faex- saenz bae lo, gyaeuj ci mbaep vaih liux, boux haici deng sinz daengz gwnzgai bae, lij ndei, vunz mbouj miz maz saeh. Goek faexsaenz deng ci cung ndaej dek bae, mbawfaex loenq rim gwnzgai, gyoengqvunz gwnzgai raen daengz yienghneix, bouxboux ndang saenz naj heu, cungj mbouj gamj bae gyawj.

Yungyiemj a, goraq neix mbouj hab louz youq gizneix lo, boux baedauq cungj damz, hoeng mbouj miz geijlai vunz rox, vihmaz mbouj faenz go faex neix bae?

Sou mbouj rox lo, go faexsaenz neix miz gojgaeq bw.

Gou ndaej cibseiq bi couh doeg gauhcungh, aen hagdangz neix couh youq gwnz Hawvenh, seizhaenx gyaeujhaw miz aen mboq ndeu, raemx mboq sawdikdik, doeng raeuj hah liengz, seiz rengx mbouj mboek, seiz doek mbouj swng. Gyoengq vunz Hawvenh couh baengh aen mboq neix daeuj gwn yungh. Bien mboq maj miz goraq ndeu, goraq neix mbouj miz bouxlawz rox dwg seizlawz miz, gyoengq bouxgeq Hawvenh cungj naeuz, lij iq seiz couh raen goraq neix lo.

Bien mboq aeu ringonj humx dwk, rin humx mbouj sang, ngamq- ngamq gaeuq vunz guh daengq naengh, boux baedauq baeg le, ndaej naengh bien mboq yietnaiq.

Goraq nanz mbouj nanz couh loenq geij mbaw, baez nanz, ndaw mboq mbawfaex couh lai lo, raemx mboq couh mbouj cingh lo, miz vunz couh naemj faenz goraq neix bae. Dingqnaeuz boux naemj faenz faex haenx cij yienghneix naemjnaemj, caengz dawz fagfouj okdaeuj vunz couh laemx youq gyangroen lo, gvaq- laeng couh dai bae lo.

Lij dingqnaeuz miz vunz ok haj bak maenz ngaenz daeuj guhdoj gvaq, naeuz bouxlawz ndaej faenz goraq neix roengz couh dawz ngaenz bae. Gwnzhaw miz daeg gaujvaq he dwg bouxgyax, de mbouj lau dai, ra fagfouj couh bae faenz goraq, de ngamq raemj geij baez, fagfouj couh mbanq liux, baenzlawz hix raemj mbouj ndaej roengz, de gag bi gyaeuj buet- deuz lo.

Gij saeh neix mbouj rox dwg caen roxnaeuz gyaj, vunz cungj gangj ndaej gig doeksaet, gangj ndaej gig dwglau, gvaqlaeng caiq mbouj miz vunz doengh goraq neix, doeklaeng vunz gwnzhaw couh heuh garaq neix guh faexsaenz. Baez daengz cietheiq, gyoengq vunz gwnzhaw couh daeuj baiq goraq neix, hwnjyieng coemh ngaenzceij, gouz faexsaenz bauj.

Baiq faexsaenz hix mbouj rox lingz mbouj lingz, boux cienz boux, gvaqlaeng miz boux daeuj gouz aeu gvan aeu baz, miz boux daeuj gouz aeu lwg aeu lan, miz boux daeuj gouz gej gungz gej nanh, miz boux daeuj gouz hwnjhag, miz boux daeuj gouz dang daeuz, miz boux daeuj gouz aeu cienzcaiz…… Laj goraq hoenz yieng yied daeuj yied hoengh.

Gaijgwz hailangh le, Hawvenh hwng’vuengh hwnjdaeuj lo, boux guh seng’eiq yied daeuj yied lai, gij vunz mbanj gyawjhaw haenx cungj daengz Hawvenh daeuj guh ranz youq, aen mboq mwhnduj youq gyaeujhaw haenx bienqbaenz youq gyanghaw bae lo.

Aen Mboq youq gyanghaw, boux bae boux dauq, raemx mboq uq lai youh yungyiemj. Daegbied dwg ngoenzhaw, vunz ganj haw mizseiz roengz ndawmboq bae gwn raemx gej hozhawq, miz boux roengz mboq bae swiq fwngz swiq naj, loengh ndaej gwnz mbaeklae ndawmboq dauqcawq dwg nyapnyaj, dauqcawq dwg namh- boengz.

Cwngfuj gietdingh moek aen mboq bae, ciep raemx swlaizsuij hawj vunzlai yungh. Miz vunz couh naeuz, moek mboq couh moek mboq, mbouj ndaej faenz goraq bien mboq bae. Moek mboq mbouj faenz faex, baenz- lawz ndaej. Vunz gwnzhaw naeuz:“Go faex neix dwg faexsaenz, bouxlawz doengh de bouxde mbouj dai myaiz hix conh. Ndaej, bouxlawz mbouj lau dai, de couh faenz ba.”

Moek mboq lo, geij ci rin、geij ci namh couh denz aen mboq bae lo, mbouj miz byawz gamj faenz faex- saenz, faexsaenz couh yienghneix sohnoengnoeng ndwn youq gyanghaw, faen diuz roen guh song mbiengj, aen ci doxbae gvaq mbiengj baihgvaz gofaex, aen ci doxdauq gvaq mbiengj baihswix gofaex, haujlai bi gvaqbae, mbouj raen miz maz saeh.

Baezneix ci daemj faexsaenz, cwngfuj gietdingh baenzlawz hix aeu faenz faexsaenz bae, hawj song cien maenz cingj vunz daeuj faenz. Haujlai ngoenz cungj mbouj miz vunz daeuj guh, doeklaeng, couh daj dieggyae co aen gihdajvat daeuj. Bouxhai aen gihdajvat cingq yaek haihong, gyoengq vunzmbanj、gyoengq vunz gwnzhaw comz daengz laj faexsaenz, humx faexsaenz baenz geij gien, boux gangj neix boux gangj haenx baenzlawz hix mbouj hawj faenz faex. Hemq le geij ngoenz, faexsaenz lij ciuq gaeuq ndwn youq gyanghaw.

Ngauzngauz ngetnget youh gvaq le song bi, ndwencieng youh daengz lo, boux gyae boux gyawj cungj dauqranz gvaqcieng. Lajmbanj nauh- yied dangqmaz.

Ndwencieng coseiq banhaemh, miz daegcoz ndeu bae ranz caencik, mbwnlaep seiz de hai ci gvaq Hawvenh, aiq dwg mbouj rox gyanggai miz go faex neix ba, caj de raen miz go faex neix seiz gaenq guh mbouj gip, aen ci de daemj haeuj go faexsaenz bae, faexsaenz laemx roengz lo, ciiq sinz faen bae seiqlengq, bouxhaici mbouj miz maz saeh.

Faexsaenz mbouj rox bauj mbouj bauj vunz, hix mbouj rox dwg mbouj dwg lumj vunz lwnh baenzde saenz. Baezneix baenz lo, faexsaenz laemx roengz lo, caiq hix mbouj git roen lo.