Gou aeu lwgfwngzyinx fwngzgvaz deq youq naengbak, hawj songde gaej oksing, hoeng songde cix mbouj leixlangh gou, lumj henzndang mbouj miz vunz nei hemq:

“Ai, Ahveij, in mbouj in?”

“Baenzlawz yiengh lo? Mbouj deng doeg ba?”

Bang lwgnyez dou cungj dacaengz songde, daegbied dwg Ah- giuh, sing sep dangqmaz lij doq cam doq caenx haeuj ndawding daeuj, gou haemz mbouj ndaej riuj de hwnjdaeuj vut ok bakdou bae.

“Ahbyauh, bohgoux mwngz youq ranz lwi?” Simjmehveij mbouj sup lweddoeg lo, ngiengxgyaeuj hwnjdaeuj simgaenj cam gou.

“Ngoenzlwenz ndaejnyi de caeuq daiq gou gangjgoj, ngoenzneix de aeu haeuj ndawsingz bae, lumjbaenz gyanghaet neix de couh bae lo, gou hwnqdaeuj couh mbouj raen de gvaq lo.”

“Bohgoux mwngz dwen de seizlawz dauqranz lwi?”

“Simjmehveij mwngz baenzlawz rox daiq gou cam de lo, de naeuz banringz yienghneix cij dauqdaeuj.” Gou mbouj rox seizneix Simjmehveij yaek ra bohgoux gou guh maz, mbouj wnggai haeujsim gij baksieng Ahveij gonq?

“Baenzneix ha, gyo’mbaiq lo!” Simjmehveij yawj dou, gvaengzda riengx rim raemxda naeuz:“Aiq mbouj deng doeg, sou baema ranz ba.”

Gou byaij gyawj yamq ndeu, sijsaeq yawj fwngz Ahveij, de aeu fwngzswix doz gengoenh fwngzgvaz, lwgfwngzyinx cug saivaq Ahgunh, byai lwgfwngz miz baksieng, lij lae lwedledled, de gig da’ngwnh yawj gou, haep naengbak gaenjgaenj, coenz vah ndeu hix gangj mbouj okdaeuj.

“Ndei lo, gyo’mbaiq sou lo.”

Simjmehveij ndwn hwnjdaeuj lo, baenq ndang gvaqbae vadvad fwngz coh dou, gij eiqsei dwg mbouj ndei caiq ce dou youq ndawranz lo, caezgya cijndei laebdaeb byaij okbae, boux- boux cungj gig doeknaiq, haepbak mbouj oksing.

(caengz sat)