Byahajndoi lajde miz aen Mbanj- mozvangz ndeu, ndawmbanj miz song beixnuengx, daeggo heuhguh Daeg- daih, daegnuengx heuhguh Daegnyez. Songde lij iq seiz couh mbouj miz daxmeh lo, daxboh dwgrengz ciengx songde hung.

Bi ndeu haicin, daxboh baenz- bingh naek lai yw mbouj ndaej lo. Yaek dai seiz, de heuh song beix- nuengx daeuj naj congz, dingzdingz duenhduenh daengq naeuz:“Lwg ha, boh……boh yaek dai lo, sou song beixnuengx ngoenzlaeng aeu doxndiep doxbang, doxcaez guhhong, ciengeiz mbouj ndaej guh gij saeh cij goq bonjfaenh、gij saeh haih vunz…… geiq maenh! Ciengeiz mbouj……” Daxboh vah caengz gangj sat, song ga baez iet, couh vut ce song beix- nuengx lizbae lo. Hoeng, song da de lij caengz laep, naj de lij mbwng’yaeng’yaeng.

Daegnyez siengsim dangqmaz, daihsing daejnga’nga hwnjdaeuj. Daegdaih daej baenz simcieg, hoeng cix mbouj doek ndaej ok saek ndik raemxda daeuj. De youq ndawsim gag naemj maz saeh mbouj rox, lij caegriu dem ne!

Mbouj gvaq geij ngoenz, de couh nauh caeuq Daegnyez baenranz lo. Daegdaih baengh ndangcangq, nazreih ndei de aeu bae caez, aen ranz、duz vaiz de hix aeu bae. Daegnyez cij baen ndaej aen rienghmou、duz mahenj hung caeuq gaiq reih youh byom youh iq ndeu.

Daengz seiz dajndaem lo, hoeng Daegnyez mbouj miz vaiz bae cae reih, gip baenz de doek raemxda. Duz mahenj raen bouxcawj daej, bi rieng dep gvaqdaeuj, aeu diuzlinx daeuj riz gij raemxda Daegnyez. Daegnyez menhmenh lumh aen gyaeuj duzma, gag danq naeuz:“Duzma ha duzma, mwngz rox daeuj nai gou, hoeng mwngz mbouj rox bang gou bae cae reih ne!”

Duz mahenj lumj rox gij vah Daegnyez nei, ndaekgyaeuj deihdeih coh bouxcawj, youh haenqrengz bi diuz rieng raez de, doeklaeng byaij daengz henz fagcae. Daegnyez sikhaek couh rox duzma yaek guh maz lo, de ngamq daep ndaej ek、venj ndaej cae hawj duz mahenj, lij caengz hat saek coenz, duz mahenj mbouj rox bae lawz aeu ndaej gij rengz daeuj, riengjret couh rag hwnj fagcae byaijndieng- ndieng coh gaiq reih Daegnyez lo!

Duz mahenj cae reih cae ndaej laeg gvaq duzvaiz dem, Daegnyez rex fagcae, lij cengdi gaen mbouj hwnj de! Yaepda, gaiq reih couh cae ndaej dingzlai lo. Mwhneix, gwnzloh cingq- ngamj miz song bouxgaihuq byaij gvaq, songde raen Daegnyez daep ma cae reih, roxnyinh geizheih lai lo, cuengq mbaq rap roengz couh comz gvaqdaeuj yawj.

Bouxgaihuq he riu naeuz:“Daegnuengx, mwngz baenzbag loba? Aeu duzma daeuj cae reih, guhriu lai lo.”

“Gou mbouj miz vaiz, cij miz duz ma he, baenzneix cij ndaej aeu de daeuj cae reih.” Daegnyez dap naeuz.

“A? Duzma lij rox cae reih? Haha! Yienghneix raeuz doxdoj ba! Danghnaeuz duz ma neix caen cae ndaej reih, gou couh soengq song rap baengz neix hawj mwngz, danghnaeuz de guh mbouj baenz, mwngz couh soengq duz ma neix hawj dou ba!” Bouxgaihuq he naeuz.

Doeklaeng Bouxgaihuq de saw lo. Daegnyez cix riu naeuz:“Suenq lo, couh dangq raeuz dwg gangjriu ba, song rap baengz sou, gou mbouj aeu.” Hoeng, bouxgaihuq haenx cix naeuz bouxvunz gangj vah aeu lumj diuzding ding benj, gangj maz couhdwg maz, de ngangz soengq song rap baengz hawj Daegnyez lo.

Song rap baengz ngamq haeuj gyanghongh, Daegdaih couh da’nding lo. De cang guh naj riu daeuj cam Daegnyez:“Daegnuengx, mwngz bae lawz aeu ndaej gij baengz neix daeuj ha?”

Daegnyez sim soh bak cig, lwnh caeuq bouxgaihuq guhdoj gienh saeh neix hawj Daegdaih liux. Ngoenz daihngeih mbwn ngamq rongh, Daeg- daih couh muengz gwed hwnj fagcae, gyaep duz mahenj Daegnyez bae gaiq naz de lo. Doeklaeng de hawj duz mahenj daep ek ndei le, hix mbouj gyaep duz de bae cae naz, song da cij cimyawj diuz loh.

Bouxgaihuq youh daeuj lo, hix lumj ngoenzlwenz nei, caeuq Daegdaih doxdoj. Daegdaih gag caegriu, lij naemj ndaej song rap baengz le bae guh buhvaq maz. Daegdaih sikhaek fad hat duz mahenj, coi duz mahenj vaiq cae naz. Hoeng liuh mbouj daengz, duz mahenj mboujdanh mbouj yamqdin, dauqfanj haeb heuj haeb faenz cienq ndang gvaqdaeuj, saengx hwnj gahengh Daegdaih bae! In ndaej Daegdaih hemq dai hemq lix. De aeu baengz mbouj ndaej, lij deng haep, hozgaek fouzbeij, aeu rin dub dai duz mahenj bae lo.

Bouxgaihuq raen Daegdaih yienghneix diuqgah, bekfwngz riu- haha, duzma hix mbouj aeu lo, rap mbaq rap couh byaij bae lo.

Daegnuengx ganj gvaqdaeuj seiz, raen duz mahenj bonjfaenh deng daeggo dub dai lo, de gig siengsim. De menhmenh umj duz mahenj hwnj- daeuj, daej ndaej yaek dai yaek lix. Mbwn fomx seiz, de nyaenxheiq haem duz mahenj youq gyaeuj reih bonj- faenh.

Miz haet ndeu, Daegnyez ndiep- niemh duz mahenj lai, couh bae moh de gya di doem. De ma daengz gyaeujreih baez yawj, ya, gwnzmoh maj ok go faexcuk iq he! De bae ngauz go faexcuk mbat ndeu, gingqyienz “vavava” miz cibgeij gaiq ngaenz hausaksak daj baihgwnz doek roengz- daeuj! Daegnyez angqvauvau gip gij ngaenz neix hwnjdaeuj, sim naemj: Danghnaeuz moix ngoenz cungj ngauz ndaej baenzlai ngaenz, rom guh cib ngoenz bet ngoenz, couh ndaej cawx duz vaiz ndeu lo!（1）