Lij Dauh yienznaeuz miz di lau Cungh Li, hoeng, de manz gvenq le, “mou dai mbouj lau raemx gonj rwed”, haujlai seiz, de cungj siengj banhfap ngaek gvaqbae.

Lij Dauh loenghseg Vangz Cing le, mbouj raen Vangz Cing miz maz fanjying, de laihnaeuz lauxsae moq neix hix mbouj miz maz daegbied, ndigah, couh cuengqdamj caiq baij song baez dem. Hoeng, de siengj loek lo. Vangz Cing lauxsae guenjleix hag- seng gig miz fuengfap.

“Lij Dauh! Mwngz lij apbik doengzhag vuenh diegnaengh daeuj yaeuh lauxsae dem? Sikhaek daeuj gizneix!” Vangz Cing ndatheiq maenj de.

Lij Dauh deng hat ndaej doeksaet yat, boux lauxsae neix mbouj ndei hangz lai bw! De ngeix yaep he, cij coh gyangjdaiz ngohngednged byaij gvaqdaeuj.

De daenj dauq buhnaeng ndeu, gwnz buh caeuq gyaeuj vaq lij venj- veve geij diuz lienh haumyanmyan dem. Aijat byaij hwnj bae seiz, lij rub geij diuz byoem henj gwnzgyaeuj, cang gij siengq seizhwng okdaeuj nyex ndaej gyoengq doengzhag riuhaha.

Vangz Cing doq aeu song da baetmaed daengx gyoengq hagseng, gij sing riu gyoengqde sikhaek dingz roengzdaeuj.

“Lij Dauh, mwngz dwg boux hagseng, mboujdan mbouj roengzrengz hagsib, vanzlij mbouj souj gvidingh hagdangz, byoem raez、nyumx byoem henj、daenj buh gvaiq…… Lauxsae son youh mbouj dingqgangj, Mwngz daeuj hagdangz dauqdaej siengj guh maz?” Vangz Cing lumj hai cungq nei laebdaeb faek de.

“Gou hag mbouj hag gven mwngz maz saeh? Daenj maz buhvaq, mwngz hix guenj gou? Bohmeh gou cungj mbouj guenj gou, mwngz lai saeh maz?” Lij Dauh haxbaenh miz di lau Vangz Cing, hoeng baez dingq gij vah Vangz Cing le, de couh hoznyaek hwnjdaeuj.

“Gou mbouj dwg bohmeh mwngz, ndigah mbouj unj mwngz! Guh hag- seng gou couh aeu dingq gou son, mboujnex couh ok baihrog bae ndwn!” Vangz Cing daengx da hat Lij Dauh.

Lij Dauh baez dingq couh heiq unq roengzdaeuj lo, de mbouj siengj okrog bae ndwn hawj doengzhag ban wnq riu swhgeij.

“Capmax ndwn! Ngeihcib faen- cung! Danghnaeuz luenh gangj luenh doengh, couh lai gya haj faencung!” Vangz Cing rox de vihmaz mbouj okrog bae ndwn, ndigah couh swnh hawj de youq diegnaengh ndwn, liuh dingh de mbouj fanjbuek.

Lij Dauh najsaep, lauxsaed cap- max ndwn, nyinh fad lo.

Roek

“Dingding dungdung……” Aen soujgih Vangz Cing fwt yiengj hwnjdaeuj lo. De mbon ok ciep, laxlawz dwg heuh de bae dienz gij saenqsik bonjfaenh, aenvih gaenj aeu, sikhaek bae cijndaej. De gaenjgip anbaiz ndei hagseng sij cih, couh cacoemj byaij ok gyausiz bae lo.

“Mehmbwk bag neix!” Lij Dauh gig mbouj fug, coh aen ngaeuz Vangz Cing byaij gyae ndaq naeuz.

“Lij Dauh, mwngz lij siengj guh maz? Mwngz gaenq gik deuz geijlai lauxsae lo? Lauxsae neix dwg lauxsae moq, baezneix caiq mbouj gaij, mwngz couh cienjhag, gaej youq gizneix haih vunz! Raeuz gaenq roek nienzgaep lo, mwngz mbouj siengj hag, dou lij siengj hag!” Banhcangj Cungh Li gig hoz- ndat, dwgcaengz ndaq de.

Lij Dauh baez dingq couh mbouj oksing lo. De daj it nienzgaep couh caeuq gyoengq doengzhag neix caez doegsaw, baenzlawz hix mbouj siengj cienjhag. Caiqgangj, lumj de baenz- neix manz, cienj bae hagdangz lawz ne! “Hw! Guenj gou baenzlawz manz, bohmeh gou di he hix mbouj haeuj- sim!” Siengj daengz neix, raemxda de couh rim gvaengzda lo.

Baez yaep da, cib faencung couh gvaqbae lo, gaenq roengzdangz, song din Lij Dauh caeux couh nanq ndaej saenzdiegdieg. Hoeng, seizgan caengz gaeuq, de hix mbouj gamj luenh doengh.

Seizneix de raen gyoengq doengzhag angqangq yangzyangz haeujhaeuj okok gyausiz, gig hoz- haenz, de hix gig ienqhoij. De caen siengj hixnaengz naengh roengzdaeuj yietnaiq yaep ndeu, hoeng, youh lau doengzhag riu de nyinh fad cix guh mbouj daengz, baenzneix caen saetnaj! De laebdaeb capmax ndwn, hanh daj gwnz naj conh okdaeuj, laelulu, daengx ndang haeu hanh liux bae.

“Caen souhcoih!” De yied siengj yied ienqhoij, “Doeklaeng gou mbouj caiq nauhsaeh lo. Lauxsae, mwngz vaiqdi daeuj ba, gou caen nanz dingj lo!” De gag ngeix.

Caet

Mbouj rox seizlawz, Vangz Cing gaenq ndwn youq bakdou gyausiz, gaenq gvaq ngeihcib faencung lo, Lij Dauh vanzlij lauxsaed capmax ndwn, hanh conh buhvaq dumzdwddwd liux. De rox, daeg neix lij miz muengh son ndaej ndei.

“Ndaej lo, mwngz naengh ba.” Vangz Cing haibak. Lij Dauh couh doq rag doiq din innaet naengh roengz- daeuj yietnaiq.

“Baenzlawz yiengh, baeg lai lo ba? Gou bang mwngz nyaenj.” Boux doengzdaiz gig haeujsim de.

“Hai! Gaej dwen lo, song ga lumj mbouj dwg ga gou lo! Bohmeh gou mbouj leixlangh gou, cij goq doxceng; gou hag mbouj ndei, doengzhag riu gou…… Gou couh siengj nauhsaeh dingjbak lauxsae, hawj caezgya lau gou, siengj mbouj daengz, boux laux- sae moq neix……” Lij Dauh gangj dwk gangj dwk couh daej lo.

Vangz Cing dingjlingz dingq haeuj rwz le, ndawsim de hix foekfan hwnjdaeuj. De mingzbeg lo, daeg neix aeu menhmenh dazyinx cijndaej. Lij Dauh maqmuengh bouxwnq haeujsim de, ndigah cungj guh gij saeh daeg- bied.

Vangz Cing mbouj ning mbouj ndwet byaij coh Lij Dauh, rubrub gyaeuj de, bekbek gen de, maz cungj mbouj gangj, couh byaij okbae lo.

Mbouj rox vihmaz, doeklaeng Lij Dauh dinghcaem roengzdaeuj lo, yied siengj yied boiqfug boux lauxsae moq neix. Yienznaeuz geij bi neix de ngaiz fad geq mbouj liux, caeux couh dingj ndaq dingj hat gvenq lo, hoeng, boux lauxsae moq neix vah mbouj lai gangj, dauq muz gij limq swhgeij bae lo.

Bet

Mbouj rox mbouj nyinh, baez yaep da, couh gvaqbae geij ndwen lo. Mboujguenj dwg youq ndaw hagdangz roxnaeuz baihrog, Lij Dauh lauxsaed haujlai lo. Bohmeh de lij dwk denva daeuj docih Vangz Cing son ndaej ndei, Gyoengq lingjdauj caeuq doengzsaeh youq bangunghsiz cungj haenh Vangz Cing miz fuengfap guenj hagseng. Vangz Cing cij riuriu, mbouj gangj vah. Aenvih de rox, neix cij dwg yamq daih’it, lij aeu hawj Lij Dauh lai hag doxgaiq, neix mbouj dwg saeh yungzheih.

Sawqmwh, miz boux hagseng he baegfofo buet daeuj naeuz:“Lauxsae, haxbaenh Lij Dauh youh caeuq bouxwnq doxmoeb lo! De naeuz conghhoz in lai, mwngz vaiq bae yawjyawj ba!”

Vangz Cing baez dingq simgip lumj feiz coemh nei cung ok bae ra Lij Dauh. De doq buet doq mbaenj: Muengh daeglwg iu neix mbouj ok saeh!

Laxlawz, roengzdangz seiz, Lij Dauh raen gij doxgaiq boux doengzhag iq deng bouxwnq ciengj bae, de yaek bang aeu dauq, couh caeuq boux de doxmoeb, doxmoeb seiz deng dub aen hoz, Lij Dauh in ndaej doq maeuq roengzdaeuj. Daeg de raen neix couh cacoemj ndonj deuz lo.

Vangz Cing ra raen Lij Dauh le, doq hongz de luenh angjmaenh doq daiq de bae hawj yihyen cazyawj. Canghyw yawj le naeuz deng sieng di, gvaq geij ngoenz gag ndei, mbouj youqgaenj.

Cuengqhag seiz, Vangz Cing raen Lij Dauh conghhoz in, gwn mbouj ndaej ngaiz, couh daiq de haeuj ranz swhgeij bae cawj noh cuk hawj de gwn. De lij caeuq daeglwg Vangz Cing miz gangj miz riu dem. Lij Dauh gwn imq le, couh dauqbae lo.

“Daxmeh, mwngz yawj, aen nyawh guenyaem gou couhdwg daeggo neix bang gou aeu dauqma bw!” Daeglwg de ngamq ndaej caet bi, dwggyaez dangqmaz.

Vangz Cing baez anj, nyawh neix dwg gvan de youq seiq seiz soengq hawj daeglwg……

Vangz Cing sijsaeq cim, cij raen gij rongh raeujrub de ciuq youq gwnz nyawh, rongrikrik……

（2 sat）