Mboengqneix, Duh’anh Yauzcuz Swciyen Anhyangz Siujyoz daengj 20 lai aen hagdangz guh doxdax gangj gojgaeq coicaenh minzcuz doxgiet hwngfat nyauznyauz. Mboengq “Sam Nyied Sam Bouxcuengh”, Hozciz gak yienh gih aeu minzcuz doxgiet cawj- daez gyauyuz yungzhaeuj doenghgij hozdung angqgvaq “Sam Nyied Sam Bouxcuengh” bae. Neix dwg dingz banhfap Hozciz Si doidoengh hozdung cauhlaeb minzcuz doxgiet cinbu.

Geij bi neix daeuj, Hozciz Si ca ndei hong minzcuz doxgiet cinbu, mboujduenh cuknet gij giekdaej doxgaiq、giekdaej sevei caeuq giek- daej swhsiengj cukmaenh gij eiqsik caezcaemh Cunghvaz Minzcuz.

Ciuq cam rox, 2021 nienz, Hozciz Si ceng’aeu 1.2 ik lai maenz cienz- goek hwngfat siujsoq minzcuz gaep baihgwnz, guh 241 aen hanghmoeg, gyamaenh swngj gaep roen lajmbanj caeuq roen canjnieb gungh 205 goengleix; hwnqmoq daemzraemx 2060 lizfanghmij, rag guenjraemx 34 goengleix. Aen si neix gaenxmaenx doeksaed gij cwngcwz leih minzmou minzbinj, daengx bi minzmou minzbinj ciqcienz diepsik 1755.7 fanh maenz, leih daengz 32 aen giyez dieg minzcuz.

Aen si neix laebdaeb haeujlaeg guh hong cauhlaeb minzcuz doxgiet cinbu, gaq giuz hawj gak minzcuz doxgap doxgyau, cuknet gij giekdaej sevei cukmaenh gij eiqsik caezcaemh Cunghvaz Minzcuz. Aen si neix guh aen gunghcwngz “cib bak” cauhlaeb minzcuz doxgiet cinbu, ca ndei senhconz gyauyuz minzcuz doxgiet cinbu. 2021 nienz doxdaeuj, 72 aen danhvei ndaej ancoh baenz aen danhvei yienghndei minzcuz doxgiet cinbu si gaep, beij bigonq demmaj 166%, 2 aen danhvei ndaej ancoh baenz dieggoek gyauyuz minzcuz doxgiet cinbu swcigih daihseiq buek, Ginhcwngzgyangh Gih Daihhaj Siujyoz bauq ndaej aen hagdangz yienghndei minzcuz doxgiet cinbu daengx guek.

Hozciz Si laebdaeb doidoengh baujhoh swnjcienz caeuq cauhmoq hwngfat minzcuz vwnzva, doicaenh hwnqguh aen gyaranz caezcaemh Cunghvaz Minzcuz, cuknet gij giek- daej swhsiengh gij caezcaemh Cungh- vaz Minzcuz. Aen si neix gyalai rengz baujhoh hwngfat minzcuz vwnzva yizcanj caeuq hozdung angqhoh ngoenzciet, geij bi neix daeuj daengx si cauh’ok heiq、diuqfoux、siujbinj、sawveh daengj cozbinj vwnzyi maenh- ndei 260 lai aen.

(Liuz Ginglingz Veiz Dunghcwngz)