Sam nyied sam dwg aen ciet youqgaenj lai aen minzcuz gih raeuz, ndawde sam nyied sam Bouxcuengh ceiq miz daibyaujsing. Gak dieg gih raeuz cungj riuz miz doengh aen goj mbouj doengz gvendaengz sam nyied sam. Lumj Vujmingz, Bouxcuengh diegde vihliux caeq Mehlungz, ngoenz sam nyied cosam cungj aeu guh yizsiz caeqbaiq, eu fwen haenh Mehlungz, nanz le couh baenz hawfwen; Denzyangz Gih Byagamjcuengh caemh miz hawfwen, hoeng cawjdaeuz haenhdanq Baeuqroxdoh; Yizcouh Gih guh ciet neix cix dwg vihle geiqniemh Cejsam; rangh dieg baihcungqgyang Guengjsae lij miz gij goj Nuengxva, baihsae cix miz gij sibsug buizcaeq Veiz Dazgvei daengj.

“Bi’gvaq raemxdah laehoho, fwen gou saek duenh gouj diuz dah”, dwen daengz sam nyied sam, daihgya aiq couh ngeix daengz eu fwen lo, cingqsoq cawzok eu fwen, gwnzbiengz gih raeuz gvaq sam nyied cosam lij miz lai cungj hozdung, lumjbaenz guh haeuxnaengj hajsaek、dwkmoh、bau aendom、ciengj bauqva、diuq foux faexsaux、yienj Heiqcuengh daengj.

Haeuxnaengj Haj Saek

Ngoenzciet caengz daengz, vunzlai couh bae ndoi mbaet mbawraeu、hinghenj daengj dub soiq cimq raemx aeu bae nyumx haeuxcid, guh baenz haeuxnaengj hoengz、henj、ndaem、o、hau haj saek, naengj cug le aeu bae buiz cojgoeng. Gij haeuxnaengj ngamq naengj baenz haenx, mboujdan ndeiyawj, lij homfwtfwt, mbangj dieg doq aeu fwngz gaenx guh baenz nyeuq doq gwn, baez geux de unqnupnup, feih dangqmaz. Mbangj cix dwk youz ceuj coeng, cuengq haeuxnaengj, cab duhheu roxnaeuz duhhau, gyaux yinz couh gaenx guh baenz nyeuq luenzled, yienghneix gwn caemh gig feih. Vunzlaux naeuz, haeuxnaengj dwg dahsien cienz daeuj, gwn le couh ndangcangq an’onj. Caemh miz vunz gangj, neix dwg aeu bae caeq Cejsam daengj.

Dwkmoh

Bouxcuengh gih raeuz cungj youq sam nyied dwkmoh, daj ndwen sam ngoenz cosam daengz ngoenz ngeihgouj, gak dieg cungj miz vunz dwkmoh. Ngoenzde, daengx ranz cungj dawz haeuxnaengj、yieng、lab、ceijngaenz、bauq daengj bae ndoi. Dwkmoh sat le aeu cuengq bauq, eiqsei dwg heuh cojgoeng ma ranz doxcomz gwn haeux. Mbangj dieg ndawfuengz ndawcoeng caemh doxcaemh dwkmoh caeq cojgoeng.

Eu Fwen

Ngoenzde banhaemh, hauxseng gak dieg cungj haengj bae doiqfwen, nanz le couh baenz hawfwen, seizde baenz doengh baenz ndoi, singfwen mbouj dingz mbouj duenh. Vunzlai byaij gvaq cungj gag dingzdin yawj nauhyied. Aen sigij gonq betcib nienzdaih, Vujmingz Yen lij dingh ngoenz sam nyied cosam guh cietfwen Bouxcuengh. Baezlaeng, yienh de couh youq ngoenzde guh hawfwen, guh dojgaeq、dojroeg、foux saeceij、ciengj bauqva daengj hozdung. Canghfwen gak dieg doxdax doxbeij, yienhciengz vunz lai vunz daih, ndaet raixcaix.

Bau Aendom

Gak minzcuz gih raeuz youq sam nyied sam lij dap bungzsiuqva, dahsau、daegmbauq gak youq mbiengj, bau aendom, aen de youq gwnzmbwn mbin baebae dauqdauq, gig ndeiyawj. Ciet yaek daengz, dahsau fwngz soem haenx couh doxiu siuq aendom: Cibngeih limq va lienh guh aen giuz luenz ndeu, limq va ndeu couh dwg baenz bi ndawde ndwen ndeu, gwnzde siuq miz va ndwende. Mbangj cix guhbaenz fueng hingz、lai gak hingz daengj. Ndawdom cang cehfaiq、duh roxnaeuz haeuxfiengj. Caiq raek miz diuz sai ndeu, daibyauj ndiepcingz youh cinghseuq youh ndei.

Ciengj Bauqva

Cingciuz mwh Gvanghsi nienz 《Vujyenz Yen Doz Ging》geiq miz：“Gak mbanj aeu haeux ndaem caeq Caenvuj, doxdax aeu bauqhung coux saenz, gij bauq cizging miz it daengz song conq, sang haj daengz roek conq, ndangbauq valoeg lai saek, baez dek de sing gok lumj byajraez.” Seizneix, mbangj dieg Mbanjcuengh lij youq ngoenzde ciengj “bauqva”.

Gyawj song bi neix, aenvih binghraq, mbangj dieg gaij youq gwnzmuengx guh hozdung lo, lumj cigboq eu fwen daengj. Deq binghraq gvaqbae, beixnuengx mwngz ndaejgeiq daeuj Guengjsae cimz haeuxnaengj、dingq fwen yawj nauhyied bw.