It

“Bub” sing he, lumj byajraez nei, bonjsaw deng Vangz Cing hozndat faet roengz henz gyangjdaiz bae, youh doek roengz gwnzdieg.

“Sou gangj, saeh neix, dauqdaej dwg byawz guh?”

……

Ngeih

Ngoenzhaenx haetromh, Vangz Cing daenj diuz vunj hoengzmaeq ndeu, rop geij bonj saw youq ndawrungj, yamqdin reuxret, doq ciengq go doq byaij youq laj ndit rongh, sim’angq raixcaix. Baez yaep da, de youh ndonj gvaq laj gorungz ndaw cauhcangz, lumj duz mbungq- mbaj nei mbin bae gyausiz lo. Neix dwg Vangz Cing ngoenz daih’it daengz hagdangz moq bauqdaengz, caemh guenj aen ban roek nienzgaep. De gig yawjnaek dangz goq daih’it neix, dangz goq neix ndaej yienh ok dungxcaiz swhgeij, ndigah de caeux couh bwh ndei lo.

De youq hagdangz Mbanjcuengh guh banhcujyin cib lai bi, maz hagseng cungj son gvaq, rom miz haujlai gingniemh guenj ban, lij sam baez ndaej gij mingzdaeuz “lauxsae ndei” ndawyen ndawsi dem.

Hwnj dangz seiz, sawqmwh, de fwt yawjraen miz boux hagseng naengh youq baihlaeng mbouj rox ngaem- gyaeuj loengh maz, mbouj haeujsim dingqgangj. Vangz Cing couh menh byaij roengzbae yaek daezsingj de.

Vangz Cing doq gangj doq yawj hagseng haenx, muengh de hix ngiengxgyaeuj yawj swhgeij, cijaeu song vunz lwgda ndaej doxbungq, de couh miz banhfap daezsingj. Gaxgonq, gyoengq hagseng cungj naeuz da Vangz Cing rox “gangj vah”, couhdwg yienghneix lo. Hoeng daeg haenx dailix cungj mbouj ngiengxgyaeuj. Vangz Cing mbouj miz banhfap, cijndei laebdaeb byaij roengzbae.

Byawz rox, de lij caengz byaij geij yamq, couh ngaiz maz dap dawz naj hoz. De doeksaet yat, cagaenj doiqdauq geij yamq. De coih nganx- gingq daengx da baez yawj, laxlawz dwg diuz mae nizlungz saekndaem he vang gvaq ndaw gyausiz, cug youq song mbiengj conghcueng.

Gyoengq lwgnyez dingq ndaej cingq haeujyinx, raen de sawqmwh mbouj gangj le, cungj caezcubcub geizheih yawj gvaqbae. Miz geij boux hagseng siengj hai bak youh mbouj gamj gangj, lumj lau maz nei.

Seizneix, Vangz Cing miz di hozndat, aenvih son saw baenz nanz, lij caengz miz hagseng gamj yiengh- neix naenj de gvaq. Hoeng, de hix mingzbeg, seizneix mbouj dwg seiz fok, aeu son saw gonq, de cijndei nyaenx heiq.

Dingjlingz, aen lingz roengzdangz yiengj lo. De couh lumj mbouj miz saeh nei byaij bae bangunghsiz. Itloh gag naemj: Ciengz doxbeij caeuq lwg manz neix yaek hainduj lo!

Sam

Ngoenzneix roengz dangz le, de caegcaeg ra banhcangj Cungh Li daeuj bangunghsiz liujgaij cingzgvang.

“Saeh neix dwg Lij Dauh guh.” Cungh Li naeuz.

Vangz Cing lij daj gyoengq lauxsae ndaej rox, bohmeh Lij Dauh cungj youq rog dajgoeng, yienghsiengq de baksoem najbyom, lwgda cungj baenqlulu mbouj dingz. Hwnj dangz cungj dingh mbouj gaeuq sam faencung gvaq, hag maz cungj mbouj haeujsim, gangj hix mbouj gaij. Ndawban cib lai boux hagseng bouxsai hix riengz de manz.

Vangz Cing seizneix cij rox vihmaz gaxgonq miz doengzsaeh cungj gangj riu naeuz:“Ndaej ciep ban neix, dwg lingjdauj yawjnaek mwngz bw!”

Vangz Cing rox seizneix cij ndaej menh byaij menh bae. De dajsuenq banringz ra Lij Dauh gangjgangj goj, cam de dauqdaej siengj youq hag- dangz guh maz.

Ninzringz seiz, de fan bae boek dauq. De rox aeu son ndei bang lwgnyez neix, vanzlij aeu feiq haujlai simgei cij ndaej.

Seiq

Banringzgvaq, Vangz Cing cing- saenz gvaekgvaek byaij haeuj gyausiz bae.

Ngamq ndwn dingh henz gyangj- daiz, de youh fwt roxnyinh miz cungj heiq gvaiq ndeu nyoengx gvaqdaeuj. De sup gaemz heiq hung he, menhmenh caemdingh roengzdaeuj hainduj hwnj dangz.

“Hwnj dangz!” Banhcangj heuh sing he, daengx ban doengzhag couh sikhaek caezcingj ndwn hwnjdaeuj naeuz:“Lauxsae ndei!”

Vangz Cing ngamq siengj haenh gyoengq hagseng gangj vah mizrengz, byawz rox, gij sing hagseng ging- doengh le duz maz ndaemndwtndwt ndaw habbit gwnz gyangjdaiz, fwt saet hwnjdaeuj, ngamj daemj dawz najaek Vangz Cing.

“Aiya!” Vangz Cing doeksaet yat, saemxsax doiqlaeng, naj bienq hau caez, simdaeuz diuqbubbub, caeklaiq cap maenh cij mbouj deng laemx. Gyoengq hagseng raen de yienghneix cungj riuhoho hwnjdaeuj.

De dingh saenz baez yawj, laxlawz dwg duz bangjbuq ndeu! Caeklaiq mbouj deng de set nyouh haeuj da, mboujnex da couh fangz lo! Gij hozhwnj Vangz Cing yaek daemx mbwn! Ndigah, couh miz haidaeuz de hujdengdeng faet saw roengz daiz lo.

Haj

Seizneix, daengx ban caem- rwgrwg, gyoengq hagseng bouxboux ngaemgyaeuj mbouj gamj guhsing. Aenvih gyoengqde rox, saeh neix caen nyex lauxsae heiqhwnj lo. Rog cueng, gij singheuh duzbid mbouj dingz mbouj duenh, engq hawj gyoengq hagseng gyaenjmbaet.

Vangz Cing daengx gyoengq hagseng. Mwh de yawj daengz dieg Lij Dauh seiz, dingh youq lo. Lij Dauh roxnyinh lauxsae yawj bonjfaenh, hix gig mbouj cwxcaih, de laeglemx nyeux coh gyangjdaiz bae. Songde lwgda doxbungq seiz, Vangz Cing couh rox lo.

“Lij Dauh, mwngz ndwn hwnj- daeuj!” Vangz Cing hat coh aen daiz cuj daih’it henz doulaeng, de yawj gvaq biujnaengh, baihgwnz raiz Lij Dauh naengh youq gizneix.

“Lij Dauh” raen lauxsae ndat- heiq lumj feiz dawz, saenzgywggywg ndwn hwnjdaeuj.

“Hw! Mwngz laihnaeuz gou mbouj rox dwg mwngz guh gij saeh neix ha?” Vangz Cing riunyaen. De gietdingh aeu son gij dauhleix hawj Lij Dauh.

“Mwngz gangj, saeh neix dwg mbouj dwg mwngz guh? Mwngz gamj guh couh aeu gamj nyinh! Mbouj ndaej guh duzgvi ndoj gyaeuj ndoj din fwngz ne, dan lw diuzrieng youq rog hawj vunz riu. Gangj vahbyangz vahgyaj, gou yawj doeklaeng lij miz byawz caeuq mwngz guhdoih guh- caemz dem!” Vangz Cing gangj vah gawqgawq mizrengz, coenzcoenz yiemzcuk, lwgda de lumj faggiemq nei, camx haeuj aen ndang “Lij Dauh”, gij vah de lumj fagcim nei, baengq haeuj aen sim “Lij Dauh”. Vangz Cing aeu noeg naenx gij iuseiq “Lij Dauh” roengzbae, hawj Lij Dauh doeklaeng mbouj gamj loengh saeh.

“Lij Dauh” vanzlij saenzdegdeg, songda fouznaih muengh lauxsae, youh dalengq cuj daihseiq baez ndeu, vanzlij mbouj guhsing.

“Gangj vaiqdi! Gaej ngaiznged!” Vangz Cing mbouj siengj caiq sai seizgan roengzbae.

“Gou……” “Lij Dauh” ngamq sing iq gangj aen swz ndeu youh suk linx mbouj gangj lo.

“Lauxsae, de mbouj dwg Lij Dauh, de dwg Cangh Yungz, yenzlaiz naengh youq cuj daihseiq. Lij Dauh vihliux mbouj hawj mwngz nyinh ndaej ok de, daegdeih apbik Cangh Yungz caeuq de vuenh diegnaengh!” Banhcangj Cungh Li ndwn hwnjdaeuj naeuz.

Cungh Li dah neix hagsib ndei, roxsoq roxlaex, gamj gangj gamj guh, aenvih de byaij ndaej cingq gangj ndaej soh, hix mbouj miz byawz mbouj fug de. Ndawban baenz luenh, haujlai saeh cungj baengh de hawj lauxsae bang rengz.

（1）