Foux duzloeg laeng Sangswh youq mwh Cinghcauz cogeiz couh miz, dwg aen hozdung Bouxcuengh gig mizyinx ndeu. Riuznaeuz seizgonq Sangswh Yen miz lwgnyez deng lah makraemx yaek dai bae, gyoengqvunz aeu feiz lang hawq gij haex caeuq gaeu duzloeg, hawj lwgnyez gwn, doeklaeng bingh couh ndei lo. Baenzneix vihliux geiqniemh gij goenglauz duzloeg, gyoengqvunz couh hawj lwgnyez cang duzloeg diuq foux daeuj gyo’mbaiq duzloeg. Geij bak bi gvaqbae lo, baez daengz ndwencieng、sam nyied cosam daengj ciet hoengh cungj ndaej youq Sangswh raen cungj foux neix.

Guh gij hongdawz foux duzloeg, aeu faexduk san aenloz、nem ceij、veh dozanq daengj, yaek guh baenz song sam ngoenz. Aen gyaeuj “duzloeg” aeu faexduk san baenz haenx, nem caet caengz ceijsa, daz saeknding roxnaeuz saekhenj; aeu baengz guh ne, baihgwnz veh aeu lwgda、bak caeuq dujrwz duzloeg, roxnaeuz aeu ceijgeng guh dujrwz. Gij gaeu dwg aeu faexnga lumj gaeu duzloeg guh baenz, daz saeknding roxnaeuz saekhenj, cap haeuj ndaw gyaeuj “duzloeg” bae. Aen ndang hix aeu faexduk san gonq, caiq aeu baengzhau raez miz saek haj cik nyib hwnjbae, aeu saekhenj daz henz, baihndaw aeu saeknding、saeklamz veh baenz yienghceij duzloeg, caiq veh seiq diuz ga duzloeg, youq baihlaeng duzloeg raiz “goenghoh bimoq” daengj cih. Bang lwgnyez foux duzloeg couh youq ndaw ndang “duzloeg” aeu song fwngz bae gaem faexnga baihndaw bae biujyienj.

Roek boux lwgsai gapbaenz aen doih ndeu, miz song duz “loeg”, boux ndeu gag foux duz ndeu, boux ndeu ndaek laz, boux ndeu ndaek gyong, boux ndeu ndaek ca iq, lij miz boux ndeu hai roen. Bouxcuengh Sangswh nyinhnaeuz lwgnyez gvaigvetgvet, gangj vah caen, hawj lwgnyez foux duzloeg youh ndei youh gitleih. Doih foux duzloeg youq mbanj bonjfaenh foux gonq, sat le caiq bae mbanj wnq foux. Youq gyaeujmbanj foux, hoh aen mbanj neix baenz bi doenghgo demsou、rumz fwn habngamj. Doek- laeng caiq daengz gak ranz bae hohfuk.

Foux duzloeg aeu “goengheij” gonq, sien dingqnyi sing “dung dung dung dung dung dung ca”. Mwhneix, danghnaeuz daiq miz bauqrengh, couh coemh roix iq ndeu. Riengzlaeng, gij sing couh bienqbaenz “dung dung ca, dung dung ca, dung dung ca, dung dung ca ca, dung dung ca”. Duzloeg lumj duzdouq diuq nei, “gyaeujloeg” bi bae bi dauq doxbungq doxangq. Foux duzloeg aiq foux cib faen cung, mbangj cix yawj bouxcawj seizlawz hawj hoengzbau, hawj vaiq couh foux vaiq, hawj menh couh foux numq di. Mbangj bouxcawj aeu dakbuenz cuengq hoengzbau, mbangj cix cigsoh cuengq gwnz namh, doengh laeq lwgnyez ndaek laz ndaek gyong de yawjraen le, couh roq ok gij diuh yaek sat haenx, laeq lwgnyez cang guh “duzloeg” couh daj ndaw bak iet fwngz okdaeuj gip hoengzbau, couh lumj “duzloeg” aeu linx riz aeu nei.

“鹿” caeuq “禄” doeg doxdoengz, duzloeg youq guek raeuz daj ciuhgeq daeuj couh dwg doenghduz leihndei, miz gij eiqsei miz fuk、gyaeusouh caeuq ra ndaej gwn. Ndawcieng danghnaeuz miz lwgnyez daengz ndaw ranz daeuj foux duzloeg, goengheij bimoq, couh dwg duzloeg daeuj hoh ranz bouxcawj miz “fuk、loeg、souh”, daengx ranz vunz ndangcangq heiq ndei、bimoq fatdad、bouxgeq ndaej gyaeu.

Foux duzloeg dwg cungj foux hohfuk youq ndwencieng daengj ciet Bouxcuengh Sangswh bonjdieg cungj mbouj ndaej noix ndeu. Foux duzloeg mboujdan miz gij yinxdaeuz lwgnyez daegbied, lij ce miz gij ndwenngoenz、minzsug cienzdoengj、daegsaek minzcuz Bouxcuengh Sangswh.