Vunz lai bak cab, sim vunz naemj mbouj doxdoengz, mbangj boux ndenq hawj dahsau maenz ndeu haj maenz cungj miz, mbangj boux muenghyawj saek yaep couh byaij deuz.

Daegngangz youq ndaw vunzlai muengh coh dahsau, danq gaemz heiq he.

Mbwn fuemx lo, gwnzmbwn doek fwnmoenq, seizneix roxnyinh engq nit lo, dahsau haenx baenq ndang yaek byaij deuz. Daegngangz byaij gvaqbae, heuh naeuz:“Dahnuengx, caj gou yaep ndeu.”

Dahsau doeksaet muenghyawj Daegngangz, ndwn youq gizhaenx mbouj guhsing.

“Dahnuengx, gou siengj bang mwngz, mwngz daiq gou bae ranz mwngz yawjyawj, ndaej lwi?” Daeg- ngangz naeuz.

Dahsau muenghmuengh Daeg- ngangz, roxnyinh mbouj lumj vunz- rwix, sing iq naeuz:“Ndaej.”

Daegngangz riengzlaeng dahsau bae, dahsau youq aen ranz iq he dingz roengzdaeuj, yaeng’yaeng hai dou haeujbae. Ndawranz gig laep, lwgsai iq he byombyengbyeng boemz ninz youq gwnz cik daiz daemq he.

Dahsau naeuz:“Neix dwg daeg- nuengx gou, baenz bingh youq ranz, mbouj ndaej bae hagdangz doegsaw.”

Laxlawz, mbanjranz dahsau youq Huznanz, daj iq caeuq daegnuengx riengz bohmeh okrog daeuj. Daxboh youq dieghong daj gwnzgaq doek roengzdaeuj, deng sieng gig naek, mbouj nanz couh gvaqseiq lo. Daxmeh souh mbouj ndaej daxboh biek bae, baenz baez bingh naek he, hix riengzlaeng daxboh bae lo. Seizneix dahsau gauj hwnj daihhag, naemj youq neix doq doegsaw doq dajgoeng ra cienz caeuq ciuqgoq daegnuengx. Hoeng boux ndeu guh mbouj ndaej baenzlai, seizneix cij ndei gouz vunzlai bangcoh. Dahsau gangj sat, baenq naj gvaq mbiengj he bae, aeu fwngz mad lwgda.

“Dahnuengx, daegnuengx baenz bingh, seizneix aeu soengq de bae yihyen yawj bingh gonq.” Daegngangz naeuz.

“Bae yihyen yawj bingh sai cienz, gou mbouj miz baenzlai cienz.” Dahsau naeuz.

“Gou ok cienz bang mwngz gonq, daengzcog mwngz doegsaw okdaeuj guhhong rom ndaej ngaenz caiq gangj.” Daegngangz riu naeuz.

Daegngangz caeuq dahsau soengq daegnuengx daengz yihyen, canghyw naeuz daegnuengx bingh naek lai, aeu youq yihyen yw cijndaej.

Daegngangz daj ndawdaeh dawz mbaw gajngaenzhangz ndeu ndenq hawj dahsau, naeuz:“Dahnuengx, daegnuengx baenz bingh aeu cienz yw, mwngz doeg daihhag hix aeu yungh cienz, mbaw gajngaenzhangz neix miz haj fanh maenz ngaenz, mwngz dawz bae yungh gonq.”

“Daeggo, gou baenzlawz ndaej aeu cienz mwngz.” Dahsau vad fwngz naeuz.

“Mbouj gangj baenzlai lo, daengz cieng lo, gou dauqranz lij miz saeh aeu banh.” Daegngangz doq byaij deuz doq naeuz.

“Daeggo, gou heuh Vangz Cing- gyah, mwngz heuh maz coh? Ce aen dienhvah hawj gou.” Dahsau gyaep gvaqdaeuj.

“Cinggyah dahnuengx, gou singq Liengz, cohnoix heuhguh Daegngangz, danghnaeuz miz yienzfaenh, daengz- cog cungj miz ngoenz ndeu raeuz ndaej caiq doxraen.” Daegngangz gangj sat gig vaiq couh byaij bae gyae lo.

Dawz haj fanh maenz ngaenz bang Vangz Cinggyah, seizneix Daeg- ngangz cij lw cib fanh maenz ngaenz dauqranz lo. Daegngangz mbouj rox- nyinh miz maz mbouj onj, dauq roxnyinh miz raq rengz he, coicaenh de bae bangcoh dahsau najseng neix.

Dauqranz le, daxmeh naeuz Daegngangz caeuq Dahvei:“Gou gaenq heuh vunz yawj ngoenzndei lo, ndwenlab cibbet sou bae minzcwnggiz daenggeiq gonq, ndwencieng cogouj banh laeuj , sou naeuz yienghlawz?”

Ndaw daeh gaenq mbouj miz baenzlai ngaenz, Daegngangz lwnh hawj daxmeh caeuq Dahvei de baenz- lawz bangcoh Vangz Cinggyah.

“Lwg ha, mwngz ndatsim bang vunz mbouj loek, simndei mehmbwn yawj ndaej raen. Mboujyawx sou bae minzcwnggiz daenggeiq gonq, gvaq- laeng caiq rom cienz banh laeuj.” Daxmeh Daegngangz naeuz.

“Sou huk gou mbouj caeuq sou huk, mwngz Daegngangz baenzneix guh, lij muengh gou byaij haeuj aen ranz neix daeuj dem? Sou gaej naemj!” Dahvei ndatheiq rim dungx.

“Ciuhvunz byawz cungj miz saekseiz mbouj swnh, raeuz bang vunz, doeklaeng hix miz vunz bang raeuz.” Daegngangz byaij coh Dahvei.

“Gou deq mwngz song bi, giz- gyawj bouxboux cungj rox gou yaek guh bawx mwngz, mwngz dawz cienz bae bang boux vunzseng he, cungj mbouj naemj daengz gou, raeuz byaij mbouj roengzbae lo!” Dahvei gangj sat, aeu fwngz goemq naj cuengq sing daejfwtfwt.

Raen Dahvei yienghneix, Daeg- ngangz caeuq daxmeh mbouj rox baenzlawz guh cij ndei. Daegngangz naemj le naemj, dawz mbaw gaj- ngaenzhangz lw haj fanh maenz caeuq haj fanh maenz ndawranz comz ndaej, gyau hawj Dahvei. Ndaej bit cienz neix, Dahvei lizhai mbanjranz, mbouj rox gvaq gyawz bae lo.

Daegngangz seizneix song fwngz hoengqhanghang, maz cungj mbouj miz lo. Aen ndwencieng neix, Daeg- ngangz roxnyinh dungx soemj raixcaix.

Haj

Gvaq cieng, Daegngangz youh aemq daeh okbae dajgoeng lo, de siengj caiq bae cangjbuhnaeng guh- hong, youh lau bungzraen dahsau Vangz Cinggyah, bang vunz bang daengz daej, Daegngangz mbouj siengj dahsau boizcingz dauq hawj cihgeij.

Daegngangz youq rog guhhong, roxnyinh cihgeij lumj benq fwj nei, youq gyangmbwn mbin bae mbin dauq, mbouj rox bae coh gyawz, hix mbouj rox daengz seizlawz cij ndaej dingz din. De vuenh le haujlai aen dieg, vuenh le haujlai aen cangj, roxnyinh guhhong cungj mbouj rimhoz.

Mizseiz, Daegngangz lijdwg nyaenx mbouj ndaej naemj hwnj aen cangjbuhnaeng, gizhaenx hong soeng youh ndaej ngaenz lai, naemj bae ngeix dauq, Daegngangz youh daeuj daengz aen singz gaxgonq dajgoeng neix.

Bet bi lo, gizneix bienq le haujlai, baenz benq baenz benq ranz- laeuz moqsaksak、 sang’vidvid, ci bae vunz byaij nauhyied raixcaix. Aen cangjbuhnaeng haenx mbouj rox gaenq buen gvaq gyawz bae lo, seiz- neix gizde dwg aen denswj gunghswh ndeu.

Ra hong guh youqgaenj, Daeg- ngangz mbouj caiq naemj baenzlai, yamq hung byaij coh aen denswj gunghswh neix bae.

“Aen gungswh sou lij ciu vunz lwi?” Daegngangz cam boux baujanh bakdou.

“Seizneix lij ciu geij boux, mwngz dawz sinhfwncwng hawj gou yawj gonq.” Baujanh naeuz.

Daegngangz muengz ndenq sinhfwncwng gvaqbae.

“Dou gizneix ciu boux ndaej cibbet bi daengz samcib haj bi, mwngz gaenq ndaej samcib roek bi, geq bi ndeu, mbouj ndaej lo.” Baujanh ngauz gyaeuj vad fwngz naeuz.

“Lauxgo, gizsaed gou bineix ngamq ndaej samcib haj bi, caengz ndaej samcib roek bi, daxmeh gaxgonq soengq gou haeuj hagdangz doegsaw caeux, bauq geq bi ndeu lo.” Daegngangz naeuz.

“Yawj sinhfwncwng guh cinj, gangj gizwnq fouz yungh.” Baujanh najfonx naeuz.

“Lauxgo, doenghyiengh mbouj ndaej bienq, vunz goj ndaej bienq, mazfanz mwngz caeuq bouxdaeuz gangj sing ndeu.” Daegngangz dep- gaenh gvaqbae naeuz.

“Mwngz ndaek vunz neix, caeuq mwngz gangj mbouj ndaej doeng!” Baujanh gangj sat baenq ndang deuz lo.

Ra mbouj ndaej hong guh, Daegngangz miz di nyapnyuk, mbwn laep lo, de okbae youzbyaij gaij mbwq. Daegngangz youh byaij daengz diuz gai haenx, naemj hwnj gaxgonq gij saeh haenx, naemj daengz dahsau Vangz Cinggyah. Gwq naemj gwq naemj, Daegngangz ndawsim lumj raemxlangh fandoengh.

“Daeggo, dwg mwngz lwi?” Sawqmwh, Daegngangz dingqnyi baihlaeng miz vunz sing hung heuh de.

Daegngangz ngeux gyaeuj baez yawj, raen dahsau gyaeundei youh nienznomj he ndwn youq baihlaeng.

“Daeggo, gou dwg Vangz Cing- gyah, bet bi gaxgonq mwngz bang gou gvaq ne. Mbouj ngeix daengz youh youq neix bungz raen mwngz.” Dahsau youh angq youh doeksaet.

“O, gou geiq hwnjdaeuj lo, mwngz dwg Vangz Cinggyah dah- nuengx, geij bi mbouj raen, mwngz caeuq daegnuengx baenzlawz yiengh la?” Daegngangz riu naeuz.

Vangz Cinggyah doeg daihhag bizyez le, daengz aen gunghswh he guhhong, seizneix gaenq dang hwnj ginghlij lo.

“Daeggo, gou roxnyinh cungj miz saek ngoenz raeuz caiq doxraen, gou baez ndaejhoengq couh daeuj neix baenq, mbouj ngeix daengz baezneix caen bungzraen mwngz lo. Mwngz mbouj dwg ra hong ha, ngoenzcog mwngz bae aen gunghswh gou hwnjban ba.” Vangz Cinggyah muengh coh Daegngangz naeuz.

Daegngangz soqlaiz gaenx guh gaenx doengh uk, haeuj gunghswh mbouj geij nanz, ndaej bouxdaeuz ndaw gunghswh yawjnaek, daez de dang bouxguenjleix he, de caeuq Vangz Cinggyah itheij vih gunghswh okrengz. Songde ciengzciengz hawj fuzliyen soengq cienz soengq doxgaiq, hix gien haujlai cienz hawj hagseng dieggungz doegsaw.

Vangz Cinggyah naeuz:“Go- ngangz, gaxgonq mwngz bang gou, seizneix raeuz bang bouxwnq, boux bang boux, lajbiengz couh yied daeuj yied raeujrub.”

（2 sat）