Mehbuz Bouxcuengh dwg bouxsaenz laeng ndawgoj gwnzbiengz Guengjsae. Haujlai dieg nyinhnaeuz de dwg bouxsaenz guenj seng lwg、guenj lwg haenx. Mbangj dieg caiq miz gij goj mbouj doengz de. Gij goj Mehbuz couh yienghneix buenx gyoengqvunz majhung, daih cienz daih.

Cienzgangj, Mehloeggyap boux cojgoeng Bouxcuengh neix dwg daj ndawva doekseng, de cawjdaeuz guenj gij saeh soengq va soengq lwg. Vunzbiengz cungj dwg daj gij va ndaw suen Mehloeggyap doekseng, ndigah vunzlai couh guenj de guh bouxsaenz Mehbuz. Liggaeuq ndwen ngeih ngoenz ngeihgouj dwg ngoenzseng Mehloeggyap, gyoengq mehmbwk Bouxcuengh youq ngoenzde couh couqngaenz cawx bit、gaeq、yieng、lab、ceijngaenz daengj buizcaeq Mehbuz, doxcaez bae ndoi mbaet va ma daep, mbaenjgouz miz lwg roxnaeuz muengh lwg maj ndei baenz vunz. Mehbuz soengq vahau couh seng lwgdaeg, soengq vahoengz couh seng lwgdah. Danghnaeuz baezlaeng mizndang, lij aeu cingj bouxsae youq gyangdoengh niemhging gouz va, youq diuzmieng henzroen guh yizsiz gaqgiuz, daj gwnz giuz ciep dujva gvaqma. Seng lwg le, lij aeu youq gyaeujmbonq an aenbaed Mehbuz, daj gwnz ndoi mbaet va ma buiz. Mbangj dieg lij youq henzmbanj roxnaeuz laj dinbya guh miuh Vavuengz.

Nanzningz Si Yunghningz Gih Bujmyau Cin lij riuz miz aen goj mbouj doengz ndeu. Cienzgangj, youq haujlai nanz gaxgonq, henz Dahyunghgyangh、laj Byayinzcinj miz geij go faexrungz hung. Lajfaex raemhfwdfwd、liengz raixcaix, vunzlai byaij gvaq cungj maij youq gizneix yietbaeg. Mbouj rox daj seizlawz doxdaeuj, couh miz boux mehbuz bwn’gyaeuj haunyo ndeu youq lajfaex gai haeuxcuk. Mehbuz neix sim ndei raeuh, mboujguenj mwngz miz mbouj miz ngaenz, caenh miz vunz byaij gvaq henz, mehbuz couh daek vanj haeuxcuk ndat ndeu riuyumyum heuh mwngz gwn. Gangj daeuj caemh geizheih, vunzlai gwn le haeuxcuk mehbuz, mboujdan ndaej gaij hozhawq, danghnaeuz fat bingh ne, doq gwn bingh doq ndei caez. Haujlai vunz gwn le haeuxcuk mehbuz couh miz caijsoq ndei, baezlaeng cungj guhhoengh hwngfat, gvaq ndaej an’onj. Bouxlawz cungj mbouj rox mehbuz daj gizlawz daeuj, mbangj naeuz de dwg duzyou faex deng raemxlaux daj baihgyae cung daeuj; mbangj gangj de dwg naengh aen lwggyoux sien bouxsien vut youq Dahyunghgyangh haenx fouz daeuj; mbangj cix cienz de dwg dahsaenzva gwnzmbwn bienqdaeuj. Saeh Mehbuz cienz okbae le, vunzlai cungj haengj senj daeuj gizneix youq, doeklaeng vunz yied daeuj yied lai, couh baenz aen haw. Vih geiqniemh Mehbuz, vunzlai couh youq henz Dahyunghgyangh hwnq le miuh Mehbuz, heuh aen haw neix guh “Miuhbuz”, couh dwg Bujmyau Cin seizneix.

Moix bi liggaeuq ndwen sam ngoenz cibngeih, Bujmyau Cin couh guh hozdung hai haw guh cin. Gek sam bi youh guh mbat daihhoh geiqniemh Mehbuz ndeu. Bi 2011, dieg de guh gaiq daih’it ciet Mehbuz. Ngoenzde miz ciengj bauqva、doiq fwen、batyaem biujyienj、foux lungz foux saeceij、heiq Guengjdoeng、“Mehbuz fat haeuxcuk”、 cuengq daengdah daengj. Ndawde “Mehbuz soengq haeuxcuk” caeuq Mehbuz cunzyouz ceiq mizyinx. “Cuk Mehbuz, goenjbibi, menhmenh gwn, cungj miz fuk.” Saek cib boux vunz daep mauhngeg Mehbuz、daenj buhvaq minzcuz hawj vunz seiqhenz soengq haeuxcuk, vunzlai baiz ndaej raezraez, cungj muengh Mehbuz ndaej hawj fuk hoh vunz souhyienz.

Mehbuz cunzyouz caemh gig nauhyied. Aen ci “Mehbuz Soengq Fuk”byaij baihnaj, “Mehbuz” fwngz gaem song nyup va naengh gwnz ci, dahsau ndeu caeuq daegsai ndeu ndwn song henz. Lwgsai dawz daeng’va’ngaeux, dahsau fwngz ndeu dawz vanj haeuxcuk, fwngz ndeu dawz buiz. Aen doih cunzyouz riengz byaij baihlaeng. Yienhciengz vunz lai vunz daih, angqangq riuriu.

Bujmyau Cin guh ciet Mehbuz, mboujdan ndaej langhbaij vwnzva minzcuz dieg de, lij ndaej coicaenh gak dieg de lijyouz hwngfat, gak minzcuz huzndei hwngfat.