It

Lauxdoengz Daegngangz youq baihrog dajgoeng maranz, gyoengqde geij boux baengzyoux doxiu daengz gwnzhaw gwn laeuj gangjgoj.

Geij cenj laeuj ndoet roengz dungx, gyoengqde bouxboux bak raeuz vah lai.

“Gou ciuhneix maz saeh cungj guh mbouj baenz, couhdwg ndaej aeu yah baenzgya.” Boux ndeu doq ndoet laeuj doq naeuz.

“Lwgbiek doxlwnz guh meh, baenzgya nai aen sim bohmeh.” Lingh boux dap naeuz.

……

Gyoengq baengzyoux boux gangj boux dap, Daegngangz gwq ngaem- gyaeuj ndoet laeuj, mbouj guhsing.

Lauxdoengz yawjyawj Daeg- ngangz youh yawjyawj dahsau daenj buhhoengz he, riu naeuz:“Mbouj gangj gou cungj yaek lumz bae lo, raeuz gij vunz ndaw neix, cij lw mwngz Daegngangz caeuq dahnuengxbiuj gou Dahvei caengz baenzgya bw.”

Lauxdoengz baez haibak, Daeg- ngangz caeuq Dahvei dingq le, naj cik liux.

Haemhde Daegngangz caeuq lauxdoengz gyoengqde ndoet laeuj gangjgoj gig hwnz cij sanq, lauxdoengz heuh Daegngangz soengq Dahvei bae ranz.

Daegngangz caeuq Dahvei dox- raen geij baez le, songde couh gangj gij vah ndawsim. Dahvei naeuz:“Dahdoih gou bineix haq vunz, sou ngaenzlaex roek fanh maenz, dangh raemx yawj boux doek gonq, bouxwnq yienghlawz gou couh yienghlawz. Caiq naeuz, seizneix haujlai vunz cungj cawx ndaej ciiq lo, mwngz lij gwih aen cimozdoz, vunz naengh baihlaeng namh faenx douh rim gyaeuj rim ndang bae, mwngz mbouj roxnyinh saetnaj gou roxnyinh saetnaj.”

Daegngangz dingq le, naj hoengzgyoenggyoeng naeuz:“Seizneix ndawranz mbouj miz geijlai ngaenz, caj gou bae dajgoeng bi song bi dem, hix mbouj ca geijlai lo.”

Daegngangz daj iq daxboh couh gvaqseiq, daxmeh boux ndeu ciengx de majhung. Daegngangz doekfag seiz, aen ndang iqetet、unqnumnum, miz saek song gaen naek, loq hung di, ciengzciengz baenz bingh, maj daengz sam bi cij rox byaij loh.

Daj iq ndang nyieg bingh lai, Daegngangz mbouj lumj gij lwgnyez wnq maj ndaej mboeng youh cangq, nyaenqnyeknyek mbouj maj sang geijlai. Daengz seiz aeu yah, dahsau cungj yiemz de ndang daemq. Seizneix roxnaj Dahvei, Daegngangz ndawsim gig angq.

Daxmeh Daegngangz rimhoz Dahvei, de naeuz Daegngangz:“Seizneix ra bawx hoj, ndawranz gaenq comz ndaej haj fanh maenz, mwngz bae ra di ngaenz dem, couh ndaej coux Dahvei haeuj ranz lo.”

Ngoenzde, Daegngangz aemq daeh bae cehcan dapci, Dahvei daeuj soengq de. Dahvei gyaep bae coh aen ci, doq gyaep doq daej hemq naeuz:“Ngangz, mwngz youq rog ndeindei guhhong, gou youq ranz caj mwngz!”

Raen Dahvei raemxda doek- byoegbyoeg, Daegngangz byai ndaeng baez soemj, sim naemj: Baezneix okbae, aeu ra ndaej bit cienz hung cij dauq ranz.

Ngeih

Aen bak gangj ndaej soeng, okrog ra hong mbouj heih, haujlai aen gunghcangj cij ciu mehmbwk mbouj ciu bouxsai. Miz di aen cangj aeu vunzsug gaisau cij ndaej haeujbae, caemh mboujlwnh dungxmaeg lai noix, rox sij saekdi cih couh baenz. Daegngangz doegsaw daengz gauh- cungh, seizneix hix hai mbouj ok feiz lo. Youq giz diegseng neix mbouj roxnaj saek boux vunz, Daegngangz seizneix mbouj gangj ra faenh hong ndaej ngaenz lai he, ciengx diuzmingh cungj nanz lo.

Dingq vunz naeuz, bae dieghong buen cien ndaek, daek namh sa ngoenz ndaej song sam bak maenz haeuj daeh, Daegngangz hix siengj bae guh.

Boux goengdaeuz daj gyaeuj daengz din cim Daegngangz mbat he, mbouj naihfanz vad fwngz naeuz:“Yawj aen ndang mwngz, rumz ci cungj yaek mbin, naeng noh hausek, guh mbouj ndaej cungj hong neix law!”

Daegngangz baez dingq simgip lo, de yamq hung byaij daengz baihnaj boux goengdaeuz, sing hung naeuz:“Gou daj lajmbanj daeuj, hong naek hong uq guh gvenq lo, gou guh ndaej gij hong neix!”

“Boux vunz baenz iq aen sing baenz hung, gou naeuz mwngz guh mbouj ndaej couh mbouj ndaej.” Boux goengdaeuz gangj sat couh yamq hung byaijdeuz lo.

Doeklaeng Daegngangz youh ra le geij ngoenz hong, cungjsuenq ndaej haeuj aen cangj guh buhnaeng he guhhong lo. Aen cangj neix cienmonz guh gak cungj buhnaeng, guhhong mbouj suenq seizgan hawj ngaenz, guh ndaej geijlai geu buh couh ndaej geijlai ngaenz.

Bouxguenjleix ndaw cangj cam Daegngangz, gaxgonq youq gyawz guhhong, guh maz hong gvaq? Daegngangz naeuz gaxgonq youq cangjvujginh yawj huq niemh huq.

Bouxguenjleix dingq le, naeuz:“Mwngz couh guh faenh hong neix ba.”

Daegngangz youq ndaw cangj moix ngoenz yawj huq niemh huq mbouj suenq dwgrengz, hoeng cix mbouj beij guh gij hong wnq ndaej ngaenz lai. Gvaq ndwen ndeu le, Daegngangz ra bouxguenjleix naeuz:“Gou mbouj siengj guh cungj hong neix lo, siengj lingh guh cungj hong ndaej mbouj?”

Bouxguenjleix naeuz:“Mwngz bae dangq buh ba, ndaw cangj ngoenz- naengz guh ndaej geijlai geu buhnaeng, mwngz couh dangq geijlai geu buh, ceiq youqgaenj aeu dingj ndaej heiqndat.”

Seizneix cingq dwg mboengq- ndat, ndaw rug dangq buh yienznaeuz miz denfunghsan, hoeng gij rumz ci gvaqdaeuj hix ndat, hwngqfwgfwg lumj youq ndaw cwngloengz nei. Daegngangz caeuq gyoengq doengz- saeh hanh roemx rim naj rim ndang, mbangj boux dingj mbouj ndaej ndat, couh duet geu buhrog bae, loh aen ndang guhhong.

Sam

Ngoenz ndeu, Daegngangz cingq nyaengq guhhong, Dahvei dwk dienh- vah daeuj, naeuz youq ranz mbwq lai, yaek daeuj caeuq Daegngangz caez guhhong.

Daegngangz naeuz okrog guh- hong sinhoj, gwn ndaej hoj cij okdaeuj.

Dahvei dingq Daegngangz baenzneix gangj, youq ndaw dienhvah riuhaha naeuz:“Mwngz guh ndaej, gou caemh guh ndaej.”

Gvaq geij ngoenz, Dahvei daeuj daengz aen cangjbuhnaeng lo. Daeg- ngangz naeuz Dahvei:“Mwngz mbouj yungh bae gizwnq ra hong lo, caeuq gou caez youq gizneix guhhong, raeuz hix ndaej doxgoq.”

Youq aen cangjbuhnaeng guh- hong, gij naengbwn doenghduz mbin doh daengx aen cehgenh, gwnz ndang、gwnz gyaeuj cungj douh rim gij bwn duznyaen. Baez aj bak gangj vah roxnaeuz sup heiq, gij faenx gij bwn couh mbin haeuj ndaw bak roxnaeuz conghndaeng bae. Daengz seiz roengzban gwn ngaiz, yawjyawj aen ndang cihgeij, Dahvei naj saepsatsat.

Dahvei naeuz Daegngangz:“Gizneix youh faenx youh uq, gou mbouj siengj youq neix guhhong lo.”

Daegngangz raen Dahvei mbouj simhai saekdi, naeuz:“Guh mbouj ndaej couh mbouj guh, lingh ra hong wnq guh hix ndaej.”

Dahvei youh ra le geij faenh hong, mbouj dwg yiemz guhhong seizgan raez, couh yiemz hong uq youh dwgrengz, moix faenh hong guh geij ngoenz couh gienj mbinj riuj doxgaiq deuz lo. Yiengh hong lawz cungj guh mbouj ndaej nanz, Dahvei cijndei naiqnueknuek dauqma mbanjranz lo.

Daengz cieng, Daegngangz guh- hong rom ndaej haj fanh maenz, de angq ndaej geij hwnz cungj ninz mbouj ndaek.

Daegngangz naeuz Dahvei:“Caengz rom ndaej geijlai ngaenz, lij okbae guh bi hong dem.”

Hai cieng, Daegngangz youh boux ndeu aemq daeh hwnjci, lij bae cangjbuhnaeng guhhong.

Youq ndaw cangj guhhong gvenq le, Daegngangz yied guh yied sug, yied sug couh yied guh ndaej ndei youh vaiq, moix ndwen souhaeuj engq lai lo.

Ndwenngoenz lumj raemx lae, yaepyet youh daengz byai bi lo. Daegngangz suenq gvaq, bineix guhhong rom ndaej cib fanh maenz, beij bi’gvaq lai boix ndeu, bi’gvaq guhhong rom ndaej haj fanh maenz, caeuq ndawranz comz ndaej haj fanh maenz, gungh miz ngeihcib fanh maenz lo. Daegngangz naemj dawz cib fanh maenz bae cawx ciiq, roek fanh maenz soengq ngaenzlaex hawj ranz Dahvei, seiq fanh maenz banh laeuj.

Song ngoenz neix yaek dauq ranz lo, Daegngangz bae sanghcangz cawx di doxgaiq hawj daxmeh caeuq Dahvei. Seizneix yaek daengz cieng, ndaw sanghcangz gwnz gai baij rim gak cungj gak yiengh doxgaiq, boux bae boux dauq, nauhnied raixcaix.

Naemj daengz caenhneix guh- hong nyaengq, Daegngangz siengj lai youz saek seiz. Daegngangz gwq byaij gwq byaij, raen gizgyae miz haujlai vunz humx yawj maz.

Seiq

Daegngangz byaij gvaqbae, cij raen dahsau ndaej cibcaet bet bi he, daenj buh hagseng, gumzgaeuj naengh youq gizhaenx. Baihnaj dahsau baij miz mbaw ceijhau hung he, gwnzde raiz rim cih. Gwnz mbaw ceij sij naeuz, dahsau mingzcoh heuhguh Vangz Cinggyah, bohmeh laebdaeb gvaqseiq, de caeuq daegnuengx doxbaengh gvaq saedceij. Bineix gauj ndaej daihhag, byawz liuh daengz ranz roh youh bungz fwn lienz hwnz, daegnuengx baenz bingh lo, maq- muengh gak boux simndei bangcoh.

Gyoengqvunz doqgyaeuj lwnh- nyaengnyaeng. Mizmbangj naeuz, dahsau neix caen hojlienz, aeu bangcoh de; mizmbangj naeuz, seizneix vunz guhyaeuh gig lai, loengh vayiengh yaeuh vunz aeu cienz, gaej saenq.（1）