20 sigij 60 nienzdaih, gokraeh Bwzhaij miz 80 lai dahsau ranzdwkbya gaenxguh youh mbeidaeuz, gyoeblaeb Aen Minzbinghlenz Mehmbwk Gokraeh Bwzhaij. Gyoengqde capyouq henz aen haij Bwzbuvanh gyaeundei, ndaej vunz haenh guh “faj ciengz diet henz Bwzbuvanh”“bingmbwk saekhoengz dawzgeuq Nanzhaij”.

Seizneix, byonghlai sigij gvaq lo, Aen Minzbinghlenz Mehmbwk Gokraeh Bwzhaij miz 400 lai boux minzbingh mehmbwk daenggeiq youq ndaw bouh. Gyoengqde ciuq gaxgonq guhbing guhhong doxgap caemhcaiq guh lai ndei dem, guhdaengz bing minz gapfuengz、dawz dieg haij bwh hoenxciengq、coihguh gangj ruzbya、dangj raemxhaij cauh diegnaz、gouq vunz deuz cai、bauj biengz onjdingh、guh vwnzmingz gensez daengj, baijok gij cingsaenz Bwzhaij hwnjheiq coh fuengyiengq ndei byaij, dajcang gij yienghsiengq“dahsau diet”henz Bwzbuvanh couh dwg beij vunz lai ak gwn haemzhoj、beij vunz lai ak hoenxciengq、beij vunz lai ak guhbaenz saeh hojnanz, baenz aen yinghyungz cizdij mehmbwk“bingzciengz guh ndei hong、hoenxciengq dwk ndaej ak”.

Ndwenngoenz gvaqbae vaiq dangqmaz, Aen Minzbinghlenz Mehmbwk Gokraeh guhvunz simsoh、yienghsiengq gyaeundei、vunzcoz riengjret caeuq gyaezmaij guekgya naekgwd, gijneix yingjyangj daih dam daih vunz.

（Gvangjsih Minzcuz Yenzgiu Cunghsinh hawj gauj）