“Duzlungz dwg duzlungz, duz- ngwz dwg duzngwz, mwngz oet sim roengz saej bae!”

Baezbaez daiq cungj gangj ndaej gig haengjdingh, danghnaeuz daxmeh mbouj saenq, daiq caen nyienh caeuq de dajdoj ne!

Caeklaiq, doeklaeng cungj dwg daxmeh nyiengh, mbouj caiq oksing lo.

Gou doq swiq din doq ndaejnyi bohgoux caeuq daiq gangj vah.

“Ai, raq byajraez fwn hung yienghneix, gij maknganx deng sai bae mbouj noix lo.”

“Gij fwn daj baihsaebaek daeuj, baez doek couhdwg sam seiq ngoenz, moix ngoenz doek saek raq, maknganx cungj baenz lo, vihmaz mbouj vaiqdi goq vunz bae mbaet ne?”

“Dingqgangj roenraemx mbouj doeng, bineix maknganx gai mbouj doek lo.”

“Gvaiq mbouj ndaej, geij bi gaxgonq gyoengq buenq maknganx haenx caeux couh wnggai baedauq lo.”

“……”

Gou mboujguenj maz boux buenq maknganx caeuq roenraemx, cij siengj ngoenzcog aeu hwnq romh, bae henzdah laj gofaexnganx gip mak- nganx doek roengzdaeuj, mboujnex couh deng Ah Veij gyoengqde bae gip gonq lo. Ndigah, gou uet hawq din, laeglemx ndonj hwnj gwnz congz ninz lo.

Hwnzneix, gou loqraen le gij goj Aulungzgveiz gangj.

Gou baez ndiu gvaqdaeuj, daxmeh gaenq mbouj youq ranz lo, cijmiz daiq youq henz gyanghongh boen raemz gueng gaeq. Gou roxnyinh mbwn rongh lo, baez ninz couh ninz gvaq lo, simgip ndaej yaek daej, daj laeng dou riuj aen bied ndeu, gvax gvaq baihlaeng daiq, buetlulu coh rog.

“Ah Byauh! Baez hwnqdaeuj couh buet okrog bae.”

Yienznaeuz daiq gaenq ndaej caetcib lai bi lo, rwz cix beij byawz cungj raeh, gij sing gou lohdin laeglemx buet hix ndoj mbouj ndaej rwz de bae.

“Gou okbae baez ndeu.”

Gou doq han doq buet.

“Mbouj gwn souh la?”

“Dauqdaeuj caiq gwn lo.”

Buet ok bakdoulaux seiz, ndit lwenqda cingq daj dah baihdoeng cik gvaqdaeuj, gou roxnyinh mbouj ndei, buekmingh riengjret buet, yamq buet yamq diuq coh laj gofaexnganx bae. Caen dahraix, lajde gyawz lij miz naed maknganx lawz dem ne? Naed ndeu hix mbouj miz, cij miz saek rizdin luenhbyubbyub, yaenq youq gwnz- namh cumxdumz.

(caengz sat)