Ronghndwen yawjraen gyoengq lwgnyez bekfwngz eu fwen, sijsaeq baez dingq, dwg eu hot fwen 《Ronghrib》, de hozndat dangqmaz, heiq hwnj foedfoed gangj naeuz:“Hw! Ronghrib miz maz citgeiz lai!”

Ciepdwk, de lij haenqrengz hemq gyoengq lwgnyez naeuz:“Gaej eu lo! Gaej eu lo! Rongh ronghrib youh iq youh nyieg, neix miz maz ndei eu ne. Hw! Sou wnggai byaengq aen lwgda sou yawjyawj gou ha, ingj ndaej gwnznamh ronghsagsag, yienznaeuz mbouj lumj gyangngoenz yienghde rongh, hoeng hawj gyoengqvunz youq gyanghwnz lij yawj ndaej raen saekdi. Caiq gangj, ndang gou baenzneix hung, ronghrib iqetet, de baenzlawz beij ndaej gvaq gou ne!” Gangj sat le, ronghndwen gig gaengq riuhaha hwnjdaeuj, itcig riu ndaej bak ngaeungatngat bae.

Gyoengq lwgnyez raen rongh- ndwen baenzneix ndaengndiengq mbouj roxsoq, ndawsim mbouj sangj. Boux lwgnyez ndeu hemq sing sangsetset naeuz:“Mwngz laihnaeuz gyoengqdou mbouj rox ha, mwngz bonjfaenh mbouj ndaej fat rongh, dwg baengh aen daengngoenz ingj, mwngz cij rongh ne! Mwngz miz maz citgeiz lai. Aen rongh duz ronghrib yienznaeuz youh iq youh nyieg, hoeng, aen rongh neix dwg de swhgeij gag fat okdaeuj! Raeuz boiqfug de, ndigah eu fwen haenh de——

Ronghrib ronghrib gip haex gaeq,

Daeh bwnh daeh bwnh daeuj laeng gou.

Gou miz bit baen mwngz gaj,

Dou miz duzmax hawj mwngz gwih.

Gwih bae daengz Baekging,

Ingj bae daengz dangjcungh- yangh.

Gangj hawj Siz cujsiz dingqnyi,

Aen dangj raeuz cwngcwz ndei lai.”

Lingh boux lwgnyez hix gaen naeuz:“Dou maij eu byawz couh boux de, bak dou youzcaih dou mbouj youzcaih mwngz nw. Dou youq lajmbanj doekseng、majhung, caeuq guekcoj doxbeij, couh lumj ronghrib caeuq daengngoenz. Raeuz laebdaeb eu! Mbouj dam de!”

Gyoengq lwgnyez youh laebdaeb eu fwen hwnjdaeuj lo——

“Seizneix gij sevei,

Caen ceiqndei mboujgvaq,

Ndomq raeuz gij guekgya,

Caen bienqvaq lailai.

Mboengqneix raeuz guekgya,

Caen bienqvaq lailai,

Yienghyiengh cungj leihhaih,

Gaiqgaiq raeuz cungj miz.

Ngoenzneix dou youq neix,

Lwnh beixnuengx raeuz nyi,

Mbanjcuengh rumzcin ci,

Ndwenngoenz bi ndei bi.

Caiq gangj mbanjranz dou,

Couh bienqvaq haujlai,

Ranzlaeuz baiz laeb baiz,

Caeuq gwnzgai doxdoengz.

Seizneix gyoengq mbanj dou,

Vuenyungz youh angqyangz,

Roen suijniz doeng ranz,

Mbanjmbanj miz ciiq.

Miz raemx saw daengz ranz,

Mbouj yungh fanz rap raemx,

Youq ndawranz dajcaemx,

Raemx yiengj goksadsad.

Seizdaih neix caen ndei,

Cae rauq mbouj yungh vaiz,

Gizgiz gihgi lai,

Cwz vaiz mbouj hoj ciengx.

Banggungz hix daengz deih,

Cwngcwz ndei baenzmaz,

Mbouj gyau liengz cixbah,

Guekgya lij bouj ngaenz.

Bouxhoj miz ciengxlaux,

Lwglan cungj hauqgingq,

Danghnaeuz ndang baenz bingh,

Ngaenz yw lingh bauqsiu.

Lwgnyez bae doegsaw,

Mbouj yungh hawj cienzhag,

Lajmbanj gyoengq lwghag,

Ngoenz gag soengq can gwn.

Gunghcangj youq henz mbanj,

Gyawj ranz miz hong guh,

Nyez geq cungj ndaej goq,

Mbouj caiq coh rog bae.

Gij cwngcwz dangj ndei,

Sevei youh vwnzmingz,

Lwgminz uk coengmingz,

Riengz gungcanjdangj byaij.

Lienz henznaz henzdaemz,

Cungj baenz dieg youzbyaij,

Vunz rog daeuj haujlai,

Vunzmbanj muengz daih hek.

Seizneix gyoengq vunzmbanj,

Hwnj vangj bae cawx huq,

Hix mbouj yungh byaij loh,

Huq gag soengq daengz ranz.

（1）