Lozyez Yen youq laeng baihsaebaek Guengj- sae, Dahbuliuj sawdik haenx con gvaq ndawyienh, neix mboujdan dwg gizdieg gumzmbwn seiqgyaiq，lij dwg giz bya heu raemx saw、gingjsaek gyaeundei、yienghndei minzcuz naekna ndeu. Bouxcuengh ranghdieg Dahbuliuj gag heuh swhgeij guh “Bouxndoeng”, eiqsei dwg gij vunz youq ndawndoeng youqdingh de. Bouxndoeng youq Mbanjmolij comzyouq lai, mbanj neix daj doenghbaez couh cienzciengq fwenlaux, neix couh dwg fwenlaux Bouxcuengh.

Fwenlaux Bouxcuengh daj Mbanjmolij fat daeuj, Mingzciuz couh miz, cienz daengz seizneix gaenq ndaej seiq bak lai bi, dwg cungj hozdung vunzlai guh’angq doxgyau、aeubawx haqsau daengj aeu guh de. Bouxlaux cienz bouxiq, bohmeh cienz lwg, fwenlaux Bouxcuengh couh yienghneix daih cienz daih, yungzhaeuj ndwenngoenz vunzlai bae. Baez daengz ngoenzciet、ngoenz saehhoengz roxnaeuz ngoenzhaw, vunzmbanj cungj gyaez eu fwen guhcaemz. Lumjbaenz ranz lawz yaek haqsau, ngoenz couxyah, mbiengj mehmbwk aeu nda daizlaeuj raezrangrang, bouxcawj bouxhek gak naengh song mbiengj, eu fwen ndumqlaeuj, singfwen singriu cienz bae gyae’gyanggyang, nauhyied raeuh.

Fwenlaux Bouxcuengh gig miz daegsaek Bouxcuengh. Bouxlaux gangj, cungj fwen neix gaxgonq dwg “gangj”aeu, doeklaeng couh bienqbaenz “eu” aeu, eu gojfangz、lizsij、ndwenngoenz vunzlai、saeh dajndaem daengj, daengx hot fwen dawz saeh daj gyaeuj geq daengz rieng, lwnh dwk caezcupcup, gig daegbied. Miz fwen cauh doenghduz doenghgo、fwen leixsug、fwen doxgyaez、fwen geqhaemz、fwen senglwg、fwen lwgnyez、fwen ronghndwen、fwen doenghduz、fwen guhhong daengj. Coenz fwen miz haj cih、caet cih, mbangj cix haemq swyouz, mbouj hanh coenz ndeu miz geijlai cih. Doiqfwen miz bouxsai caeuq mehmbwk doxdoiq、bouxsai gag doiq、mehmbwk gag doiq sam cungj. Diuhfwen rwenz raeuh, ndeidingq dangqmaz, vah fwen yungh ndaej giuj, moix hot fwen cungj dwg aen goj ndei ndeu.

Vih henhoh caeuq ciepcienz fwenlaux Bouxcuengh, aen cwngfuj Lozyez Yen youq ndaw Mbanjmolij guh aen doih eu fwen, seiz mbouj seiz doxdax eu fwenlaux Bouxcuengh, caiq bien sawgaeuq fwenlaux、hwnjguh dieggiek cienzciep fwenlaux、haeuj hagdangz eu fwen daengj. Vunzlai diegde gag roxnyinh “daj iq aeu son eu fwenlaux Bouxcuengh”, bouxlaux son bouxoiq, hawj gyoengqde daj iq couh gag haengj eu fwen.

Gyawj geij bi neix, Lozyez guh aen ciet fwenlaux Bouxcuengh, fwenlaux cienz ok rog bae, mizmingz lo. Mwh gvaq ciet, haujlai hekyouz lij daegdaengq ra daengz mbanj daeuj yawj nauhyied. Ngoenzciet, beixnuengx Bouxndoeng seiqhenz mbanj fwngz doxring humx baenz gvaengx, eu fwen hohfuk, yienh’ok cingsaenz doxgiet vunzlai Bouxndoeng. Yienhciengz lij baijok buhvaq gyaeundei caeuq gij dinfwngz daemjrok Bouxndoeng, yienjok sibsug soengq sainda, vunzlai youq gwnz dah bengcag daengj, hawj hekyouz caenndang daejniemh vwnzva minzsug Boux- ndoeng, gamjsouh yienghndei minzcuz Lozyez.