“Gou ngeix gij saedceij mboengqneix de aiq gvaq ndaej mbouj daih ndei, couh heuh Ah Byauh soengq song geu buhvaq hawj de, gangj mbouj dingh de——”

“Daxmeh mwngz caen huk.” Meh gikdoengh ndaej dajduenh gij vah daiq, yiemzsuk naeuz, “gangj mbouj dingh yaek yinx gij mazfanz daeuj ne! Ndaek vunz neix youq ndawmbanj, dauqdaej dwg aen foeg miz doeg.”

Ndawsim gou gig mbouj doengzeiq gij vah daxmeh, hoeng mbouj gamj haibak euq, cij laeglemx byaij daengz henzndang daiq bae, dahnuengx hix ndaejnyi gij sing gangj vah daj ndawrug byaij okdaeuj.

“Gij saedceij neix ndaej bang couh lai bang de saekdi lo.”

Gou roxnyinh daiq gangj ndaej gig deng.

Gou cingq yaek laeglemx naeuz hawj daiq Aulungzgveiz lwnh hawj gou aen goj he gig mizyinx, liuh mbouj daengz daxmeh cix maenj hwnjdaeuj lo:

“Lij mbouj bae swiq din? Haemhneix mwngz mbouj siengj hwnj congz ninz lo?”

“Bae, ndawbat miz raemxndat.” Daiq sing iq gangj, loq gaex gou haeuj ndawrug bae.

Gou mbouj gamj dwen saek coenz couh bae ra haizdaz, ndawsim gig ienq daxmeh, de maz cungj ndei, couh dwg beizheiq gaenj lai, mizseiz maij gou couh maij yaek dai bae, lauheiq mbouj ndaej lumj lwgnding nei got gou haeuj ndawrungj bae, hoeng baez hozgaek, couh ndaq gou ndaq ndaej gyaeuj haeu bae. Mbouj lumj daiq gwq baenzneix gyaez gou, couhcinj guh saeh loek lo, daiq ceiq lai cangguh yiengh hozhwnj hat gou song coenz. Mizseiz daxmeh ndaq gou, daiq lij bang gou gangj vah’unq, ndigah ciengzseiz nyex ndaej daxmeh engq hozgaek, ienq daiq naeuz:

“Ah Byauh cungj deng mwngz cungh ndaej mbouj baenz yiengh lo.”

“Ai, daeglan neix baenzneix ndeigyaez, guenj ndaej yiemz gvaqbouh hix mbouj dwg saeh ndei ha.”

“Seiziq mbouj guenj, caj de majhung le hwnj bya bae?”

Gou rox daxmeh gangj “hwnj bya” couh dwg naeuz bae guh caeggeq.

(caengz sat)