Aenyienz baedauq gyaj lumj caen,

Cij nyienh seizhaenx mbouj baenz

vunz,

Duzroeg ndaw ndoeng gonq doxbaengh,

Ngoenzneix fanjnaj mbouj doxgaen.

Haq deng ae ngangjgyaeuj(hengzmanz),

Cuij ndaej daeuq,

Caenh gwn laeuj gvaq ngoenz,

Gou haemh ninz,

Loq fangzhwnz cungj daej.

Beg guh vunz bouxsai,

Dai ndi dai,

Caeg haeux gai cawx laeuj,

Gwn ngveiz yiemz mbouj gaeuq.

Mbouj gangj yaeuh,

Caenh raiz nyouh henz daiz.

Bouxvunz mbouj rox ngeix,

Hoj fouzbeij.

Caih gangj leix mbouj doeng,

Gou yied naemj yied loeng,

Daej da hoengz,

Mbouj rox doengzlawz(yienghlawz)

banh.

Ae beizheiq youh yak,

Baez hai bak,

Ae couh fak youh diz(dub),

Saedcaih vi(vei),

Siengj gwn mbi(mbei) yiemz cit!

Haq deng ndaek vunz neix,

Nyaengq fouzbeij,

Cungj mbouj ngeix cauhgya,

Ceng lili lala,

Lwg haeujma,

Gamz raemxda gwn haeux.

Siengj daiq lwg gaijhaq,

Ae dwk vah,

Dingh aeu gaj mbouj louz,

Lumj sim ma sim mou,

Caenh haep gou,

Saenz lumj nou lumj roeg.

Mehlwg deng nozdai,

Cungj fouznaih,

Vanzlij caiq haq vunz,

Ce lwg youq mbiengjmbwn,

Guh hong gwn,

Da ndi raen satsoq.

Ndaej doxliz okma,

Nanz yamq ga,

Gamz raemxda youh daej,

Nyeux naj yawj lwgnyaeq,

Ndek ndi ndaej,

Lwg iq daej gaenlaeng.

Lwg iq got gahoq,

Caen hojcoh(hojlienz),

Lawz yamq loh okbae?

Yied ngeix sim yied ceiz(naiq),

Doxbiek bae,

Daengz geij seiz raennaj.

Lwg iq got gagoek,

Daejboegboeg,

Raemxda doek lumj fwn,

Mingh cienh mbouj doengz vunz,

Mbwn ha mbwn,

Mwngz rox raen rox mbouj.

Lwg iq beng dinvaq,

Daejnga’nga,

Naeuz meh ha gaej bae,

Yied daeuj daej yied vei,

Naeuz mwngz bae,

Gou lawz ndei cogneix.

Lwg yied daej yied genx,

Mbenj ha mbenj,

Gou lawz cienh baenzlai,

Lumj deng gyaep bae gai,

Vei lailai,

Caen nyienh dai bae liux.

Lwg daej meh hix daej,

Gvej sim saej,

Mbouj rox ndaej guh ndei,

Nanz ndek lwg okbae,

Saedcaih vei,

Nyienh gwn vei seizneix.

Ndek lwg sim nanz nyaenx,

Daej ngaebngwnx,

Gyaeuj caenh ngunh caenh fouz,

Cienz vih ndaek gvan gou,

Ndi rox you,

Haih lwg gou souh coih.

Gij vunz youq bakmbanj,

Mbingj(yawj)cancan,

Hix mbouj sanq mbouj deuz,

Lwg buet daeuj naj heu,

Sing daej veu,

Beng buh heuh doxdauq.

Vunz cungj gangjswgswg,

Lawz cijdwg(cijndei)?

Caiq umj lwg yawj baez,

Yied yawj yied dwggyaez,

Meh okbae,

Caiq mbouj meiz(miz) meh maij.

Gou mbat faemz roengzdaeuj,

Lwg ceu(itcig) nyaeu,

Got hoz gou mbouj deuz,

Cig daej ndaej naj heu,

Caih lawz heuh,

Lwg caenh ceu(itcig) ngaebngwnx.

Simjsauj raen gijneix,

Hix gaen daej,

Gvej sim saej lailai,

Coengh umj lwg gyaezgvai,

Coih lailai,

Hix laihdai hwnj loh.

Gangj lwnh beixnuengx doih,

Coih suenq coih,

Ndek lwg oiq okdou,

Simjsauj gaej gvaiq gou,

Gvih gouz sou,

Lai coengh gou yawj lwg!