Sinhvazse Baekging 3 nyied 13 hauh dienh Cunghgung Cunghyangh Gozvuyen fat hohdienh hawj Baekging Daih 13 Gaiq Dunghcanzauvei Cungguek Dijyuz Daibyaujdonz

Cungguek Dijyuz Daibyaujdonz:

Youq Baekging Daih 13 Gaiq Dunghcanzauvei, Cungguek Dijyuz Daibyaujdonz haenqrengz cenggonq, ceng ndaej 18 gaiq baizgim、20 gaiq baizngaenz、23 gaiq baizdoengz, youq buengj baizgim、 buengj baizciengj baiz daih’it, aeundaej gij cingzcik ceiq ndei guek raeuz camgya dunghcanzauvei doenghbaez caengz miz gvaq, vih guekcoj caeuq beksingq hingz ndaej mingzdaeuz, vih banh baenz Baekging Dunghcanzauvei guh’ok le gungyen hung. Dangjcunghyangh、Gozvuyen cukhoh caeuq camnai gyoengqsou!

Youq gaiq dunghcanzauvei neix, gyoengqsou geiqmaenh vahdaengq dangj caeuq beksingq, fatyiengz gij cingsaenz mbaq dawz sawjmingh、buekguh miz gou, lohloh camgya、gamj bae hamjgvaq, gag ak mbouj dingz、doxgiet buekguh, yienj diuz go sengmingh giendingh mbouj fug、angqyangz baenaj, saedyienh yindung cingzcik caeuq cingsaenz vwnzmingz cungj fungsou. Gyoengqsou yungh saedsaeh hengzdoengh doeksaed gij iugouz aeu baizgim daudwz、baizgim funggek、baizgim seuqcengh, caeuq bouxyindung vunzndangcanz gak guek gak dieg seiqgyaiq doxhag, doxndei doxgyau, caezyiengj hoihhoengh, cungfaen langhbaij gij yienghsiengq cingsaenz vunzndangcanz Cungguek seizdaih moq. Gyoengqsou biujyienh ndei cungfaen yienh’ok gij cingsaenz dijyuz Cunghvaz, cungfaen yienh’ok gij cingzcik Cungguek gienzvunz baujcang caeuq guekgya hwngfat, caenh’itbouh gikfat gij cingz gyaez guek lwg Cunghvaz ndaw guek rog guek, vih daengx dangj daengx guek gak cuz beksingq youq roen moq cienzmienh hwnqguh sevei cujyi yendaiva guekgya giet sim comz rengz、doxgiet haenqguh gyahaeuj rengz cingsaenz. Guekcoj caeuq beksingq vih gyoengqsou roxnyinh ndaengndiengq caeuq miznaj!

Seizneix, miz Dangjcunghyangh aeu Siz Ginbingz dungzci guh vaedsim giengiengz daiqlingx, daengx dangj daengx guek gak cuz beksingq cingq cingsaenz gvaekgvaek hamj haeuj coh aen moegbiu bak bi buekguh daihngeih. Maqmuengh gyoengqsou aeu gij swhsiengj sevei cujyi miz daegsaek Cungguek seizdaih moq Siz Ginbingz guh vixyinx, laebdaeb fatyiengz gij cienzdoengj miznaj dijyuz vunzndangcanz, sim naemj guekcoj, haenqrengz buekguh, cauh cingzcik ndei moq, doidoengh gij saehnieb dijyuz vunzndangcanz guek raeuz hwngfat, doinyoengx caeuq gikcoi gyoengq vunzndangcanz gag aeueiq、gagsaenq、gaggiengz、gaglaeb, gamj bae najdoiq deuqnyex, gaenxmaenx lienhndang fukcangq, hawj ciuhvunz lwenqrongh, vih saedyienh aen loqsiengj Cungguek Cunghvaz Minzcuz fukhwng hungmbwk ok rengz ok dungxcaiz.

Cunghgung Cunghyangh

Gozvuyen

2022 nienz 3 nyied 13 hauh