“Vunzfaex, vunzfaex, caen lumj vunz; heiqmoegyou, heiqmoegyou, gig lumj vunzcaen bae yienjheiq”. Neix dwg coenz vah riuz youq gwnzbiengz guek raeuz. Cienzgangj, heiqmoegyou guek raeuz “Hanciuz ok, Dangzciuz hoengh”, Samguek seiz gaenq miz vunz aeu moegyou yienj cazgi, Suizciuz cix aeu bae yienj gojgaeq. Heiqmoegyou Guengjsae gig miz daegsaek, yienjok minzsug、goj fangz、goj lwgnyez、goj gwzming daengj.

Moegyou ndawheiq yienghceij gyaqciq, lumjliuxliux, diuhfwen baez bienq, bak、da moegyou lij riengz dwk hai haep、cienq bae cienq dauq, gwnzndang youh miz gihgvanh; daengx duz maqhuz mbaeu, heih dawz heih loengh; moegyou faen guh swngh、dan、couj、gungh、boz、cing daengj; caiq miz moegyou bengcag、moegyou gwnz byaidwngx、moegyou unq daengj, ndangdaej moegyou yied daeuj yied lumj vunzcaen; heiq cix daj moegyou gagdog biujyienj bienqbaenz vunzcaen caeuq moegyou doengzdaiz yienj; miz heiqyienhdaih, youh miz heiqdoenghbaez, sengdoengh lingzvued; diuhfwen miz go Guengjdoeng、fwen Bouxcuengh、siujdiuh gwnzbiengz、go yienhdaih daengj; foux cix sezgi ndaej gig ndei, cab miz gohgi yienhdaih, ndeiyawj dangqmaz.

Aen Heiqduenz Moegyou Guengjsae dwg gij daibyauj heiqduenz moegyou gih raeuz. Aen heiqduenz neix yienjok 《Cejsam Roengz Biengz》《Cuh Bazgai Ciucin》《Gij Byauhyij Hungzginh》《Lwgnyez Hoengz》《Dahfwngzmeh》daengj, youq ndawgih rog- gih、ndawguek rogguek cungj mizmingz. 《Lwgnyez Hoengz》 dwg cit heiq moegyou goj fangz, daj aen goj “Gyauj Hingz Lwgnyez Hoengz” laeng 《Sih Youz Geiq》 daih seiqcib baez daengz daih seiqcib ngeih baez gaijbien daeuj. Dangz Swngh、Sunh Vugungh、Lwgnyez Hoengz daengj moegyou gak miz daegsaek, cang ndaej gig caen, heiqdaiz sezgi gyaeundei. Cit heiq neix miz haujlai heiqfoux, naengh fwj mbin、diucieng、byoq hoenz byoq feiz, hawj vunz nyaenx mbouj ndaej bekfwngz hemqndei, bouxlaux lwgnyez cungj haengj yawj.

Seizdaih bienq lo, heiqmoegyou caemh mboujduenh cauhmoq. Lumjbaenz 《Lwg Byavunzgyaeu》 dwg bouh daih’it heiq fouxbahleiz moegyou laeng seiqgyaiq, fouxbahleiz caeuq moegyou doxgap, youh geizheih youh moq, daizheiq gig miz gohgiganj, lij aeu ndaej gimciengj Gaiq Daihngeih Moegyou Beizingj Daengx Guek Doxdax “Gimsae Ciengj”. Cit heiq 《Saenq Bwngaeq》 dwg cit heiq youqgaenj Swcigih aeu bae soengqlaex hoh aendangj laebbaenz 100 hopbi ndeu. De gangj le“Daeghaij” lwgsai ndaej 12 bi neix, daj ndaw youzhi VR dauqma daengz 80 bi gonq, bungz daengz boux yinghyungz iq dingjhoenx Yizbwnj ndeu caemh heuhguh “Daeghaij ”. Songde doxbang doxbaengh, dawz “fungh saenq bwngaeq seiqvunz ceiq youqgaenj ndeu”soengq daengz ndawfwngz hungzginh. Cit heiq neix miz 100 lai duz moegyou caeuq beizingj, yienj ndaej engq lizdij, engq lumj gij caen de; heiqyienhdaih lij miz yauzgunj、cix naeuz cix ciengq daengj biujyienj.

Gih raeuz Bwhhaij、Bwzliuz、Bwzswz Cingsih caeuq Dwzbauj、Gveibingz daengj dieg lij miz yisuzdonz youq gwnzbiengz biujyienj heiqmoegyou. Yienznaeuz gij biujyienj funghgwz gak dieg gak mbouj doengz, hoeng, gyoengqde lij gangj Vahdoj, eu fwen dieg de, aeu moegyou geqgangj gojgaeq, mbouj gouz okmingz ciepcienz aen yisuz conzdungj neix.

Vih ciepcienz aen yisuz gaeuqgeq neix, moix daengz cietheiq ngoenzgyaj, Aen Heiqciengz Lwgnyez Guengjsae cungj daegdaengq hai aen ciengz yienj heiq- moegyou. Bi 2014, heiqmoegyou Guengjsae ndaej senj haeuj buek daihhaj swcigih gaep feihyiz mingzloeg.