“Luz cujyin roengzlingh, gou cimh swix cimh gvaz, lawh viq oen viq nya, lawh bin bya dangh raemx. Guh saeh ndaej baenz ndei, bouxboux caez miznaj, danghnaeuz ram mbouj gvaq, haeujmbaq bae bang dawz.”

Daj haeuj ndaw cunhveij guhhong le, gou yienghyiengh cungj dingq Luz cujyin, de heuh buet couh buet, heuh ndwn couh ndwn, heuh naengh couh naengh, caen dwg “bak faenh bak cungcig, mbouj gamj dingj saek coenz”. Luz cujyin guh ndaej saeh, youq ndawmbanj gangj it couh it gangj ngeih couh ngeih, gangj daengz guh daengz, gig miz mingzmuengh. Ngoenznaengz, gij hong lajmbanj de gaenxmaenx okdaeuz, daiqlingx dou guh ndaej ndeindetndet, gyoengq vunzmbanj hix cungj haengj boiqhab caeuq haeujcoengh de. Yawj ha, guh seuq diegmbanj、dingh gienz nazreih、bujcaz ginghci、diuzgaij doxceng、dingjre binghraq…… Yienghyiengh baiz youq daengx cin daih’it. De bouxvunz neix aeu ndaej gwnz aeu ndaej laj, doengh boux doengzsaeh cungj mbouj ndaej mbouj gingqfug de. Vunzlai cungj haenh de naeuz:“Boux vunz neix nanz ndaej, boux vunz neix hoj ra, youq lajmbanj danggya, gaiqgaiq ca ndaej hwnj.”

Luz cujyin daegbied saenq ndaej gvaq gou, yawj gou baenz boux “caensaenq”, de caenndang bae bang cizdij ndawmbanj cawx maz doenghyiengh, baezbaez cungj caenh heuh gou bae riengz, mbouj hawj bouxwnq bae gyawj gvaq. De mbouj suenq ndaej dwg boux “hakdam”, hix mbouj dwg bouxdaeuz din fwngz “seuqcingh”. De haengj daengq gou heuh boux dajgai hai mbawfei lai sij di ngaenzsoq hwnjbae, yienghneix de dauqma cunhveij bauqsiu couh lai ndaej geij maenz diemzseb, dang- yienz lo, de mbouj dwg bouxdog gag gwn liux, hix baen di hawj gou. Gij saeh neix, mbwn rox deih rox, Luz cujyin rox, gou rox, mbouj miz bouxwnq rox. Luz cujyin miz maz saeh de mbouj lau gou rox. Cingq dwg aenvih yienghneix, saekseiz gou couh mbouj lau youq dangqnaj de naeuz de:“Dam gwn rox deng dai, dam caiz rox deng gaemh, saeklaeuq dingjgit laemx, naj nyaenq vaih mingzsing.” De saekseiz hix dingq gou gangj di, hoeng youh haengj geq haemz naeuz:“Siuj Cingh ha, mwngz mbouj rox, gou caemh mbouj siengj yienghneix guh ha. Hoeng ngoenz- naengz baenq youq ndawmbanj roxnaeuz okrog banh goengsaeh, cungj dwg cawx saek bau baj ien ndei baen hawj vunz, raeuz youq neix ndwen ndaej ngaenz noix gvaq vunz, guhlawz mbit ndaej okfwngz? Ukgyaeuj mbouj lingzvued saekdi cingqcaen mbouj baenz. Daengz bak mbouj rox gwn, couhdwg vunz hojndoq, guhdaeuz dungxsaej soh, beij ranzhoj lij yaez.”

Geij ngoenz neix, aen lahbah gwnz dienhganj henz vwnzva cungh- sinh ndawmbanj haenx, caenh haengj fanfan fukfuk boqcuengq gij fwen vwnzyidui ndawcin mbouj dingz, singyaem gig gok, roxnyinh miz di laegraeh——

“Dangj lingjdauj yinghmingz,

Yinzminz lwgda raeh,

Daengx guek guh cingjceih,

Mbouj ndaej dam cienzngaenz.

Duz nengznyaen duzguk,

Cungj dwk doh dwk caez,

Mbwn seuq daengngoenz ndei,

Seiqseiz ronghsagsag.

Boux dam noix dam lai,

Ceiz caeux ngaiz vunz rox,

Daengz ngoenz riengmax loh,

Mbouj giz ndoj giz deuz.

……”

Gij fwen coegrwz neix nyi lai le, ndawsim gag miz di yiep, saek ngoenz caen deng loh riengmax couh boihseiz lo. Gou it dwg lau bonjfaenh deng cazbanh mbouj miz naj raen vunz, ngeih dwg lau Luz cujyin mingzsing vaih, de guh baenz byongh ciuh bouxdaeuz lajmbanj lo, soqlaiz vunzlai cungj haenh de dwg boux cunhganbu maenhndei, danghnaeuz caen youq mwh yaek doiq roengz- daeuj neix deng caz ok miz ginghci vwndiz, couh mbouj dij lo. Gou naeuz de:“Cujyin ha, seizneix baihgwnz ca lenzcwng gensez ca ndaej haenq bw, raeuz baezlaeng cawx doenghyiengh couh mbouj guh caeg yom aeu ngaenz loba.”

Luz cujyin cix riuhehe naeuz:“Doenghboux byaij henzdah, byawz gavaq mbouj dumz, raen ngaenz sim mbouj humz, vunz riu bamz riu huk. Mwngz ngeix ha, miz vunz dam ndaej baenz faet baenz faengq cungj mbouj miz saek yiengh saeh, raeuz aeu didi giekheiz neix suenq maz? Couhcinj gijveij cingqcaen bae caz, gwnz- biengz nyaenx lai hakdam, caz ndaej liux lwi? Cuengqsim ba, mbouj miz maz saeh.”

Mboengqneix guh gij hong gaijcauh yienghsiengq lajmbanj youqgaenj, deng bae cawx gak cungj doenghyiengh lailai daihdaih. Haet ndeu, miz goenglaux he daeuj ra gou. De gaem fwngz gou naeuz:“Mwngz couhdwg Siuj Cingh ba? Gou dwg daegbeix Luz Aicaiz, youq yangh nden guh yanghcangj gvaq, seizneix geq le doiq roengzdaeuj lo, mbouj dang guen daengx ndang soengswtswt……”

Gou miz di doeksaet, goenglaux dangqnaj neix couhdwg daegbeix Luz cujyin youq yangh nden dang yanghgcangj gvaq haenx? Gaxgonq ndaejnyi naeuz Luz cujyin miz daegbeix ndeu youq aen yangh nden dang yanghcangj, mwhde couh nyinhnaeuz ranz Luz cojdaej “ok hak”, daegbeix guh yanghcangj, daegnuengx guh cunhcujyin.

Gou cingq ngeix bae naemj dauq, goenglaux cix daengq gou naeuz:“Siuj Cingh ha, mwngz yaek bang gou re ndei Luz Aicaiz bw, ciengeiz gaej hawj de dam gwn ngaenz goenggya bw. Gou rox de ceiq saenq ndaej gvaq mwngz, gou hix mbouj lau coh mwngz gangj, daegnuengx gou beizsingq baenzlawz yiengh gou gag rox, gou hix ciengzseiz naeuz de, hoeng de cix mbouj haengj dingq haeujrwz……”

Gou ii wtwt mbouj rox baenz- lawz han ndei, doeklaeng goenglaux youh naeuz:“Yawj daeuj cij miz mwngz ndaej bang de gaij gij mauzbingh rwix de bae lo.”

“Gou hix gienq de gvaq, de gaenbonj mbouj dingq.” Gou naeuz.

Goenglaux daengx yaep he le, vaehvaeh naeuz:“Boux Couh gijveij ngamq diuh daeuj aen cin raeuz haenx, gaxgonq gou ndaej dizbaz de gvaq, de lij niemh gou. Danghnaeuz mwngz ndaejhoengq, gou nem mwngz bae laeng de gwn caz, caezcaez naemj banhfap.”

Gou cungjsuenq roxyiuj lo, goenglaux neix dwg caen gyaez daegnuengx de, cien fueng bak geiq siengj caenh banhfap naemj “ywbingh gouq vunz”. Gou caemh nyinhdingh Luz cujyin dwg boux vunzcaiz nanz ndaej, gangj vah ndawsim gou hix caen maqmuengh “gouq” ndaej de. Ngoenzhaenx banringz, gou riengz goenglaux bae laeng Couh gijveij gwn caz. Couh gijveij cij caeuq dou gwn caz gangjriu, gijwnq maz cungj mbouj gangj, goenglaux yaek dwen daengz Luz cujyin, de couh gangj daengz gizwnq bae.

Aen singgeiz daihngeih ngoenz ndeu, gou cingq youq ndawranz banhgoeng nyaengqnywt guh caiz- liuh. Luz cujyin mbouj rox seizlawz yaengyaeng byaij daeuj daengz henzdaiz gou. Gou baez ngiengx- gyaeuj yawj de, de lumj miz di simvueng, cij raen de mbaj dwddwd naeuz:“Siuj Cingh ha, Couh gijveij haxbaenh daj……daj dienhvah daeuj, daengq gou naeuz mwngz nyi, de yaek heuh mwngz bae……bae damzvah, mwngz aeu miz swh…… swhsiengj cunjbei bw.”

Gou cangguh yiengh doeksaek, cam naeuz:“Vih……vih maz saeh ni?”

“Gou doiq mbouj hwnj mwngz, dwg gou mbouj ndei, dwg gou haih mwngz lo. Gijveij naeuz yaek cujfwn mwngz, naeuz miz vunz gawjbauq mwngz bae cawx doenghyiengh caeg yom aeu ngaenz cizdij, baengzgawq caezcienz. Mboujnex mwngz couh gangj dwg gou heuh mwngz nyaenx guh, hawj gou daeuj rapcoih ba……” Luz cujyin gangj vah miz di bak saenz linx geng lo.

Gou guhmuengz ciengj gangj naeuz:“Mbouj…… mbouj ndaej yienghneix guh. Mwngz dwg cujyin, dwg diuzsaeu dingjliengz, miz goengrengz hung hawj gyoengq vunzmbanj gvaq, youq ndawda baihgwnz mwngz dwg boux ganbu lajmbanj maenhndei ndeu, mbouj ndaej hawj gyuek saekdi uq ha. Diuz rap neix lij dwg hawj gou bang mwngz dawz ba! Gou neix nienzgeij oiq, dingj coih lau gijmaz, cujyin yawj hwnjda, couh ra ndaej ingbaengh.”

Doeklaeng, Luz cujyin hix deng heuh bae damzvah, gou siengj rapcoih caez hix mbouj baenz, song dou cij ndaej gyaudaih gij saeh dam cienz seuqsat lo, cungj deng cujfwn lo. Gij gijliz aendangj gij faplwd guekgya caen mbouj ndaej famh, neix dwg diuz sienq, baez yamq gvaqbae couh deng doek dat.