Danghnaeuz mwngz mbouj bae gvaq Caet- bakrungh, mwngz ngeix mbouj daengz lajbiengz lij miz gaiq dieg yienghneix, cien rungh fanh bya, gij gingjgvanh gahswhdwz miz gumh miz ndoeng miz byasang haenx, dwg lajbiengz gahswhdwz fat ndaej ceiq daegbied、faenbouh ceiq maed ndeu. Byarin doeddoed dudu goengq nem goengq, haijbaz miz 800 mij doxhwnj. Doengh aen gumh laj din bya miz laeg miz feuz, hunghung iqiq, lumj aenlaeuh nei, neix couh dwg “rungh” lo.

Caetbakrungh dwg mbwn cauxbaenz. Seiz ndei mbwn gvengq ndit rongh, goengq bya heuswdswd caengz youh caengz. Byabya cungj miz daegsaek, mbouj miz song goengq bya lawz ndaej naeuz doxdoengz. Youq Bet Leix Gouj Van, baihnaj roen bya lingqlaulau, baihlaj cauzlak laegluemx, caen dwg “ci youq gwnzmbwn sa, fwj ok lajdin daeuj”. Roen bya ngutngeuj, lumj duzlungz ngut ngauj nyeujnyeuj, hix lumj saibaengz mbinfwfw. Dangh- naeuz naengh feihgih yawj roengzbae, bya dab bya neix, bya lienz bya haenx, sangsang daemqdaemq daengjbyoengbyoeng, raih daengz henz mbwn. Gvax gvaq goengq bya ndeu couh ndaej raen aen rungh, mbangj aen caenh miz reihnaz mbouj raen ranz. Nazmbaeklae dwg daj dinbya haifwz doxroengz, lumj saehaij nei baenz gvaengx baenz gvaengx baenq roengz laj rungh, doeklaeng byai saehaij youq gaiq reih ndawrungh laeglaeg haenx mbouj raen lo, cungj yiengh neix couh dwg “dieglungzgeuj” laeng Caetbakrungh mizmingz haenx.

“Gouj faen rin faen namh ndeu”, diegbya Dava Yauzcuz Swciyen Caetbakrungh bya sang rungh laeg, ndawbya ndawgumh cungj laeuh raemx, caeng mbouj ndaej raemx, dwg gaiq dieg lajbiengz hojyouq ndeu. Yauzcuz、Bouxcuengh、Bouxgun goenqcaej lai, youq haenx guhranz、dajndaem, guh ndaej mbanj youh mbanj. Youq gwnzsang yawj bae, aenaen ranz mbangj saek o mbangj saek hoengz, lumj dujraet ok lajrungh hwnj nei. Daj bi 1997 doxdaeuj, cwngfuj youq dieg de guh hong banggungz: Senj dieg anceiq、doeng bya guh roen、guh gvihcouxraemx、soengq ngaenzbang caeuq gisuz daengj.

Geij bi neix doxdaeuj, Dava dajcauh “Aen Yienh Guh Vwnzva Lijyouz Giengzak Ndeu”. Bi 2020, cienzngaenz doxgap Gvangjdungh Gvangjsih douz roengz 3087.92 fanh youq Caetbakrungh guh Vuengzlez Sijhoq. Aen de guh baenz le, mboujdan ndaej gaijndei gij cingzgvang dangdieg dajndaem dwkraemx nanz caeuq vunzyouq yungh raemx hoj, lij hawj aen diciz goengyienz demlai cungj gingjsaek ndeu, haeujcoengh lijyouz guh baenz. Seizneix, Caetbakrungh hekyouz yied daeuj yied lai, gaeqdoj、moudoj、duzyiengz、lwgrazbag、dangzrwi cwx daengj nungzcanjbinj yied daeuj yied mizmingz. Vunz gizneix lauxsaed simndei, maijhek simhoengh, ciengzseiz gaj gaeq gaj yiengz daih hek. Gwn ngauq noh、ndoet laeuj rang, danghnaeuz bouxhek gwn lai gwn feih, bouxcawj hix roxnyinh miznaj dangqmaz.

Bya heu raemx saw, mbanj ndei vunz huz, neix couh dwg Caetbakrungh, gizdieg daegbied youh gyaeundei ndeu.