Gou yaek fatcaiz lo.

Ndaw ranz gou miz aen mboenj- meng ndeu, aen mboenj neix luenz- lulu, wenjmyagmyag ndaej ingj raen ngaeuz vunz, gwnz fa mboenj caeuq gwnz ndang mboenj veh rim mbawfaex caeuq dujva, raizrwdrwd, siensaksak, ndeiyawj dangqmaz. Miz baengzyoux naeuz, aen mboenj neix dwg doxgaiq ciuhgonq, dij cienz lo.

Baengzyoux dawz duzsiengq aen mboenjmeng neix fat hwnj vangj bae, mbouj geij nanz couh miz vunz dwk dienhvah daeuj hawj gou, naeuz aen mboenj neix dij samcib fanh maenz, cam gou gai mbouj gai.

Gou gig doeksaet, dawz aen mboenjmeng okdaeuj lumhlumh, fan gwnz fan laj, yawj bae yawj dauq. Aen mboenjmeng neix gou mbouj dawz haeuj da, cuengq youq gak rug, geijlai ndwen mbouj lah saek baez, gwnz mboenj uq rim foenx, bouxlawz rox baenzneix dij cienz?

Gou mad gij foenx gwnz mboenj- meng bae, aen mboenj bienq ndaej moqsaksak, gag naemj: Aen mboenj neix lauheiq caen dij samcib fanh roxnaeuz engq lai dem dahraix bw!

Baezneix gou mbouj caiq yawj aen mboenj neix mbouj hwnj da lo, gou dawz aen mboenj cuengq daengz ndaw gvihsaw bae, ngoenzngoenz yawj geij da, ngoenzngoenz uet geij baez, ndeindei hoh hwnjdaeuj.

Ngoenz ndeu, miz mehmbwk he dwk dienhvah hawj gou, naeuz de dwg aen gunghswh Baekging, cienmonz bang vunz guh gij hong doxgaiq gaeuqgeq gaicawx, de naeuz gaenh geij ngoenz youq Sanghaij miz aen hoih doxgaiq ciuhgeq gaicawx ndeu, cam gou bae mbouj bae camgya.

Gou gag naemj, gou caeuq Sanghaij doxliz geij cien leix loh, baenzlawz bae ndaej, couh dwg bae ndaej gou hix mbouj bae.

Gou naeuz gou mbouj bae lo, aen mboenj neix hix mbouj rox caen dij geijlai ngaenz, daengz Sanghaij bae, vunz baez yawj mbouj dij ngaenz, gou couh beg feiq simgei lo. Danghnaeuz miz vunz caen daengz ranz daeuj yawj, miz sim naemj cawx, mbouj gangj samcib fanh maenz, gai ndaej sam haj cien maenz gou hix sim’onj.

Yaek miz saeh daeuj daengz, dangj hix dangj mbouj ndaej. Mehmbwk haenx youh dwk dienhvah hawj gou, naeuz gvaq geij ngoenz dem de couh daiq vunz daengz ranz gou daeuj yawj aen mboenjmeng neix, lij naeuz danghnaeuz dwg caen couh caeuq gou gangjgyaq, baenzlawz hix aeu cawx aen mboenj neix.

Gou baez dingq, doeksaet youh miz di vueng lo, ndawsim fanfoek hwnjdaeuj, aen mboenj neix gou hab mbouj hab gai? Aen mboenj neix gou baenzlawz hix mbouj ndaej gai!

Daihgya mbouj rox, aen mboenj neix dwg vunz soengq hawj gou, mbouj dwg aen duh gou.

Saehcingz dwg baenzneix.

Hawsaen dwg aen haw gaeuqgeq vang youq gwnz bien Dahyougyangh ndeu, miz Gaicingq、Gaivangz、Gai- hak caeuq Gaidoeng seiq diuz gai. Dingqnaeuz daj gaxgonq daengz seiz- neix, Hawsaen couh dwg aen haw hwngvuengh ndeu.

Gaxgoenq mbouj miz goengloh, mbouj miz ci baedauq, gag boux hwnjroengz baedauq cungj dwg naengh ruz, bouxguh seng’eiq、boux daeuj youzlangh、boux deuz caeg deuz bing cungj naengh ruz comz daengz Hawsaen daeuj, hawj Hawsaen nauh- yied hwnjdaeuj, seng’eiq hix hoengh- hwdwd. Miz haujlai vunz diegrog daengz Hawsaen le, couh youq Haw- saen youq roengzdaeuj, aeu yah seng lwg, Hawsaen bienqbaenz maz singq cungj miz. Hawsaen vunz mbouj lai, hoeng couh miz singq Leiz、singq Gungj、singq Yauz daengj samcib geij aen singq, cabyouq Bouxgun、Boux- cuengh、Bouxmohlauj daengj lai minzcuz.

Seizneix, gwnzgai Hawsaen lij miz geij aen ranz ciuhgeq, gij ranz gaeuqgeq neix aeu cien ndaem caep ciengz, vax nding hoemq gwnz, dingj ranz seiq gak gaeu soemlitlit, gwnz yiemhranz deu lungz veh fungh, ndeiyawj raixcaix.

Geijcib bi gaxgonq, hungzcizginh daengz Hawsaen daeuj caeuq vunzdig doxhoenx gvaq. Vihliux raiz ndei aen gojgaeq neix, gou couh daengz Haw- saen bae, dajsuenq ra vunz camcam gij goj neix. Gyoengq bouxcoz mbouj miz vunz rox gienh saeh neix, aeu ra bouxgeq he cij ndaej.

Gou daeuj daengz Hawsaen, miz vunz heuh gou bae ra naihlaux ndeu, naeuz naihlaux haenx ndaej goujcib lai bi lo, dwg aen haw neix boux nienzgeij ceiq geq he, naeuz de rox gij goj gaxgonq lai.

Naihlaux heuhguh Cangh Caij- lenz, de byoemgyaeuj haumiegmieg, hwet miz di gaeuz, raen gou haeuj ranz daeuj, de muengz aeu daengq hawj gou naengh, de rwz mbouj nuk, da mbouj fangz, heuh gou naengh roengz le, de couh mbouj dingz mbouj duenh lwnh goj hwnjdaeuj.

Naihlaux naeuz caetcib lai bi gaxgonq, de ndaej cibcaet bi seiz hungzginh couh youq geij goengqbya liz Hawsaen mbouj geij gyae haenx caeuq vunzdig doxhoenx, de caeuq gyoengq bouxcoz gwnzhaw couh bae bang hungzginh guh saeh, gyoengq bouxsai bae ram bouxdengsieng, gyoengq mehmbwk couh bang dajcawj. Daxboh naihlaux guh seng’eiq, ndaw- ranz miz di ngaenz, mwh hungzginh caeuq vunzdig doxhoenx, gij gwn gij yungh gig noix, de couh caemh daxboh aeu ngaenz bae cawx byaek cawx haeux soengq hawj hungzginh.

Naihlaux seng dahlwg bihaenx, bouxgvan de okbae guh seng’eiq couh mbouj dauqma gvaq, daengz seizneix hix mbouj rox de youq gizlawz, mbouj rox de dai bae roxnaeuz lij lix. Dahlwg bae haq le, naihlaux couh boux ndeu gag gwn gag youq.

Gou raen ndawranz naihlaux miz daengmeng、swizmeng、batmeng、mboenjmeng daengj haujlai doxgaiq ciuhgonq, aen swizmeng de cuengq youq gwnz sahfaz haenx, wenj- myigmyig, aen swizmeng neix seiq mienh veh lungz veh fungh, ndeiyawj youh dwggyaez. Gou lumhlumh aen swizmeng, cam naihlaux naeuz:“Baj, gai aen swiz neix hawj gou ba, geijlai ngaenz mwngz naeuz.”

Naihlaux naeuz mbouj ndaej gai, gou youh cam aeu cawx aen daengmeng de, de hix naeuz mbouj gai. Aiq dwg raen gou caen gyaez gij doxgaiq gaeuq neix, roxnaeuz raen gou cawx mbouj ndaej doeknaiq, de haeuj rug bae, dawz aen mboenjmeng he okdaeuj, naeuz de ndawranz mboenj- meng lai, couh soengq aen neix hawj gou.

Gou ciep aeu aen mboenjmeng, fan gwnz fan laj yawj bae yawj dauq, roxnyinh aen mboenj neix hix mbouj yaez, couh dajsuenq hawj de song bak maenz ngaenz. Gou yaek mbon daeh aeu ngaenz hawj naihlaux, naihlaux vad fwngz coh gou naeuz de mbouj aeu ngaenz, aeu ngaenz de couh dwg gai mboenj hawj gou lo, de naeuz de dwg soengq hawj gou, soengq hawj.

Gou roxnyinh gig mbouj ndei eiqsei, yaek aeu mbouj dwg, mbouj aeu mbouj dwg, naihlaux raen gou yienghsiengq mbouj doengz, naeuz:“Gou geq lo, yungh mbouj daengz gij doxgaiq neix, gou hix cij miz dah lwg ndeu, de hix yungh mbouj daengz baenzlai mboenj, mwngz couh cuengqsim dawz bae ba. Aeu bae coux doxgaiq hix ndaej, aeu bae daengj gwnzdaiz yawj yiengh hix ndaej. Mwngz daeuj ra gou, ngoenzneix raeuz ndaej doxraen, dwg raeuz miz yienz- faenh, aen mboenj neix caeuq mwngz hix miz yienzfaenh. Gij doxgaiq caeuq vunz miz yienzfaenh neix mbouj ndaej aeu daeuj guh gaicawx.”

Gou angqvauvau umj aen mboenjmeng dauqbae seiz, baenq gyaeuj dauqlaeng, raen naihlaux gaem faexdwngx ndwn youq bakdou, song da mbouj yaep soengq gou lizbae.

Cien ngeix mbouj daengz fanh ngeix mbouj daengz aen mboenjmeng neix dij baenzlai ngaenz. Gou caiq gingz aen mboenj hwnjdaeuj, yawj bae yawj dauq, mbouj rox aen mboenj neix caen mbouj caen dij ndaej baenzlai ngaenz, hoeng naihlaux soengq dox- gaiq hawj gou faenh cingzngeih neix, caen dij cienz lai, aen mboenj caiq bengz, baenzlawz gai ndaej?

Gou aeu mbaw sujbaq seuq he caiq uet aen mboenj baez he, dawz mboenj cuengq youq gwnz gyaq, dangguh aen doxgaiq hawj boux haeuj ok yawjngonz ndeu, miz seizgan gou hix lwnh gij goj aen mboenj neix baenzlawz daeuj daengz ranz gou hawj vunz nyi.

Gou muengh aen mboenj neix caen dwg huq caen, caen dwg dij cienz.

Gou muengh naihlaux ngoenz- ngoenz ndangcangq, ndaej gyaeu cien bi.