Dahlingzgiz youq henz yienhsingz Hingh- Anh Yen laeng Gveilinz Si, gunghyenz gaxgonq 214 nienz vat baenz, suenq daengz seizneix miz 2000 lai bi nanz, vunz heuh de caeuq Duhgyanghyen、Cwnggozgiz guhdoih caemh dwg sam aen suijli gunghcwngz hung ciuhgeq Cungguek.

Vat baenz Dahlingzgiz, couh hawj baihnamz baihbaek ndaej soh doxdoeng. Youq cwngci fuengmienh, de ok rengz hung hawj ranghdieg Lingjnanz gvihaeuj cunghyangh, hawj guekgya doengjit. Youq ginghci fuengmienh, de coinyoengx gij ginghci sevei ranghdieg Lingjnanz ndaej fatmaj vaiqvat. Youq vwnzva fuengmienh, de hawj Cunghyenz vwnzva caeuq Lingjnanz vwnzva doxgyaux ndaej haeuj duenh moq. Youq minzcuz doxgyau fuengmienh, de coinyoengx gij minzcuz Cunghyenz caeuq Lingjnanz doxgyau doxhag doxgyaux.

Dahlingzgiz dwg gij yienghbanj vunz youq duenh lizsij ciuhgeq ciuq dieg guhsaeh、gohyoz dajveh hwnqguh gunghcwngz. Caemhcaiq, vat baenz Dahlingzgiz, doiq henhoh guekcoj doengjit, gyarengz hawj gak minzcuz doxgyau doxgyaux、guhdoih mwnhoengh mizyungh youh lai youh nanz.

（Gvangjsih Minzcuz Yenzgiu Cunghsinh hawj gauj）