Youh daengz binaengz seiz ndaem faex. 2 nyied 26 hauh, Swcigih Dangjveij suhgi、Swcigih Yinzda Cangzveijvei cujyin Liuz Ningz, Swcigih Dangjveij fusuhgi、Swcigih cujsiz Lanz Denhliz, Nanzbu Cangih Luzginh swhlingyenz Cangh Gen, Swcigih Cwnghez cujsiz Sunh Daveij, Swcigih Dangjveij fusuhgi Liuz Siujmingz daengj swcigih dangj cwng ginh lingjdauj, caeuq soujfuj gak hangz daibyauj doxcaez camgya yivu ndaem faex hozdung.

Banhaet 9：30， Liuz Ningz daengj vunz bae daengz Gvangjsih Gauhfungh Swnhlinz Gunghyenz dieg youq baihbaek Nanzningz Si, daih’it dingq le gij bauqlwnh daengx gih hwnqguh ndaem faex、ndaem faex ndaem nywj hawj diegnamh bienq heu daengj mizgven cingzgvang, riengz- laeng dawz fagso bae daengz dieg ndaem faex, caeuq ganbu cizgungh、sausenh duiyenz doxcaez nyaengq- foedfoed. Fuz cingq lwgfaex、gvak namh、lumx namhmoq、rwed raemx……Caezgya caemhrengz ndaem roengz doengh go faexbizdauz、faexdezlimuz、faexhojyen daengj.

“Gvaq geij ngoenz couh daengz gingcaet, cingq dwg seiz ndei doenghgo dok ngaz、 ndaem faex cauh ndoeng.” Liuz Ningz caeuq ganbu ginzcung youqciengz naeuz, lingjdauj ganbu daiqdaeuz yivu ndaem faex, mboujdan dwg hengzguh gij hengzdoengh saed- saeh swnghdai vwnzmingz swhsiengj Siz Ginbingz, hix dwg yienh’ok aen gietsim cauhlaeb aen Gvangjsih gyaeundei caeuq dieg ak swnghdai vwnzmingz. Raeuz aeu geiqmaenh vahdaengq “gijndei swnghdai Gvangj- sih gim mbouj vuenh” Siz Ginbingz cungjsuhgi, sonyinx daengx gih gyoengq ganbu ginzcung doxcaez camgya ndaem nywj ndaem faex hawj diegnamh bienq heu, caezcaemh rapdawz mbaq rap henhoh ndei bya dah Gvangjsih, laebdaeb cauh aen vanzging huzndei bya gyaeu raemx gyaeu vunz gyaeu swnghdai gyaeu, roengzrengz doidoengh hwngfat saek- heu hamjok yamqdin moq. Swnghdai vanzbauj leixniemh aeu daj iq hag, maqmuengh gyoengq lwgnyez ciengx- lwenx cingsaenz hoenghhwd, lumj lwgfaex nei majhung maenghswd、ngoenz sang gvaq ngoenz, caemhcaiq doenggvaq gag doengh fwngz ndaem faex、lumx namh、 rwed raemx, daj iq nyinhrox gofaex go’nywj gova hix miz sengmingh, guh boux veisw iq henhoh swnghdai, majhung le yungh song fwngz bonjfaenh hwnqguh guekcoj caeuq mbanjranz engqgya gyaeundei bae.

Geij bi neix daeuj, Gvangjsih haeujlaeg saedhengz aen gunghcwngz cauh ndoeng bienq heu “Betgveiq heuswd”, “cibsam haj” geizgan gyoebsuenq ndaemfaex cauh ndoeng 1735 fanh moux、 yivu ndaem faex 4.1 ik go, vunz cauh ndoeng najdieg、doenghgo swnghdai caetliengh youq daengx guek daihdaeuz, ndoengfaex cwgoemq cingzsoq、baenzfaex ndaej cienz、ndoengfaex swnghdai fuzvu gyaciz baujmaenh baiz daengx guek baihnaj.

(Vei Hwngz Lanz Fungh)