Aenvih ciengz binghraq neix, Baksaek sawq- mwh okmingz lo. Doengh boux buek youq baihnaj dingjhoenx binghraq haenx mbouj lau dwgrengz, daemhdwngx riuj gaiqhongdawz, byaij gvaq roen loemq, benz gvaq roen bya gumzgamx raeuzrad haenx, dangh gvaq raemxgip, roxnaeuz cauh ruz、naengh cidienhbingz、cisamloek、dohlahgih daengj, daengz gak mbanj gak ranz bae guh hwzsonh genjcwz. Vunzmbanj mbouj rox aeu maz bae docih, couh aeu gijgwn ceiq ndei bae daiq, lumj nohgouq、haeuxfaengx、haeuxnaengj、saejlwed daengj. Dah- youqgyangh riuznoengnoeng, mboujdan gung ok aen singz yinghyungz ndeu, ganq ok doengh gij vunz lauxsaed simndei de, lij miz gij byaraemx lajmbwn gyaeundei de.

Aen Suen Geiqniemh Baksaek Gijyi

Aen suen neix miz aen gvanj geiqniemh、aen minzcuz bozvuzgvanj、gaiq sigbei geiqniemh、diuz giuz hungzginh daengj, dwg giz diegbaeyouz lizsij hoengz caeuq vwnzva minzcuz doxgyaux doxyungz ndeu. Ndaw gvanj geiqniemh miz lai aen ding, langhbaij gij saeh caeuq gij doxgaiq Baksaek Gijyi, hawj vunz lumjbaenz dauqma daengz doenghbaez, gamjsouh gij haemzhoj dwgrengz bouxgonq.

Ngozcenz

Ngozcenz laeng Cingsih youh heuhguh Mboq- lingz, baenz bi mbouj mbaet, sawdik lumj gingq. Seiqhenz bya heu daengjsoengz, nazhaeux bingzrwd, gyaeu lumj fuk veh. Gwnzmboq gaq diuz giuz miz 15 conghgungj ndeu, daengngoenz banhaemh baez ciuq, 15 conghgungj deng ciuq rongh, couh lumj 15 aen ronghndwen gaeuznyeunyeu nei. Mingzciuz Gyahcing Vuengzdaeq dingqnaeuz, lij lok coh “ndit banhaemh ciuq Mboqlingz”.

Luengq Hung Doenglingz

Luengq Hung Doenglingz caemh heuhguh “bak sieng gyaeundei gwnz digiuz”, yamq hwnj mbaek- lae, couh ndaejnyi raemxgienghdat bauhrumxrumx, ngauj gvaq ndoi faex ndeu, Raemxgienghdat Doeng- lingz couh venj youq baihnaj. Seizfwn, raemx- gienghdat couh lumj gyoengq max bongh bae, raemx dauqcawq biu, youh lumj Dahmbwn daj gwnz bongh doxroengz, hausaksak, ndeiyawj raixcaix. Ndaw luengq miz 2000 lai cungj doenghgo sengcingz hwnj de, faex hung sangngaungau、gogaeu heuxgeuj、raemxgienghdat dauqcawq sinz, vunz lij heuh de guh “cauz luengq ceiq heu Cungguek”.

Byagamjcuengh

Cienznaeuz, Baeuqroxdoh couh youq gwnz Byagamjcuengh youqdingh. Gwnz bya miz Miuhcoj- goeng、Rinmehnangz、Gamjcienggun、Gamj- hungzginh daengj diegbaeyouz. Moix bi liggaeuq ndwen sam cocaet daengz cogouj, gyoengqvunz lij doxcomz lajdin Byagamjcuengh guh aen Hawfwen Gamjcuengh, buizcaeq Baeuqroxdoh, doxdax doiq- fwen、foux saeceij daengj. Daj ciuhgeq daengz seizneix, gij vwnzva Baeuqroxdoh Bouxcuengh gizneix cienz ndaej gig ndei.

Aen Gunghyenz Ndoengfaex Mbaw Hoengz

Seizcou, ndaw gunghyenz mbawraeu hoengzfwg lumj feiz, raemx ndawhuz fubfab, daj gwnz daengz laj, ndingfug、nding’oq、henjhoengz caeuq saekheu camca, lumj sei lumj veh, lij miz vunz haenh naeuz“mbawraeu Dwzbauj ndei gvaq gij Giujcaigouh”. Dingqnaeuz, Dwzbauj aiq miz cib fanh moux faexraeu, baenz ndoi baenz ndoeng, yawj mbouj raen gyaeuj, hoengzhoengz henjhenj heuheu doxsan doxgeuj, hekyouz yawj dwk mboujsij ma.

Gumzmbwn Lozyez

Lozyez dwg “aen bozvuzgvanj gumzmbwn seiqgyaiq”, ndawde “Gumzmbwn Dasizveiz” haijbaz sang 1468 mij, laeg 613 mij, bakgumz doengsae yiengq gvangq 600 mij, namzbaek yiengq gvangq 420 mij, aiq hung 6700 fanh lizfanghmij. Ndawde miz conghroengj lajnamh、ndoengfaex nduj seiqgyaiq ceiq hung、doenghgo doenghduz dijbauj caeuq mehraemx, dwg aen dieg sengcingz hungmbwk ndeu.

Baksaek lij miz Giucouh Gujcin、Cwngzbiz Huz、Gizyangz Huz、Gizsinghyenz Gingjgih Dwz- bauj、Haugunh Huz Lingzyinz daengj diegbaeyouz, gak miz daegsaek. Deq binghraq lizbae, seizcin va langh, baengzyoux mwngz ndaejgeiq daeuj Baksaek yawjyawj bw.