“Sasasa, sasasa……” Banhaet, gou ngamq ndiu gvaqdaeuj, couh mumjgyumq dingqnyi gij sing fwn seizcin baihroeg doek mbouj dingz. Vahsug naeuz “fwn seizcin dijbauj lumj youz”, gij fwn neix itdingh rwed doenghgo ndaej hoenghfwdfwd bae lo.

Gij fwn neix lij gig manz, seiz mbouj seiz miz saek raq fwn ndeu riengz rumzcin caegcaeg bat gvaq cueng gingq daeuj, lumj bat haeuxsan nei yiengjsasa, seksak youh ndei- dingq. Gij fwn gwnzgingq lij caengz ndwn maenh youh menhmenh lae roengz naj gingq bae lo. Daj baihndaw yawj okbae, gij gingjsaek seizcin baihrog gyuemluemz youq ndaw- fwn, moengzmoengz loengzloengz, lumj raen mbouj raen, maezvunz dangqmaz.

Gou nyaenx mbouj ndaej hwnq ndang bad hwnj geu buhrog bae biengj yiemhcueng hai gvangq di, ndwn youq ndaw naj cueng sijsaeq cimyawj gij fwn seizcin, nyinhcaen dingq gij vah unqswnh de.

Sawqmwh, gou lumj mup ndaej raq vadauz homfwd gab youq ndaw rumzcin——Couhdwg mwhhaenx, gou lumj dauq daengz seiz lwgnyez, lumj youh yawjraen song go faexdauz ndaw suen daxmeh. Gij hom neix, dwg gij hom vadauz, engq dwg gij gyaez daxmeh gou.

Aen suen daxmeh youq laeng ranz, byaij gvaq geij bumh faexcuk couh bae ndaej daengz. Ndawluengq faexcuk, dou byaij bae byaij dauq byaij baenz diuz roen iq ndeu, gij roen iq neix ngutngeungeu doeng daengz aen suen hajsaek daxmeh. Gwnz roen iq doek rim gij sing riu dou, ndaw- suen hajsaek hix louz miz haujlai goj lwgnyez yinxdaeuz dou.

Youq ndawsuen, daxmeh riengz seiqgeiq ndaem miz gij byaekheu gak cungj gak yiengh, youq seiqhenz lij ndaem geij go mak dem, dangq guh led youh ndaej gwn mak, guh ndeu ndaej song. Daegbied dwg song go faexdauz haenx, baez daengz seizcin, fwn seizcin unqswnh nyumx vadauz ndaej hoengzmaeq. Raq rumzcin ci daeuj, gij hom vadauz riengz rumz baenz raq baenz raq cienz bae dieg- gyae, hawj vunz simsoeng vaiqvued!

Gou caeuq daxmeh gyaez song go faexdauz neix, mboujdan dwg aenvih ndaej yawj va gyaeu, ndaej gwn makdauz, caemh aenvih gienh saeh seiz iq ndeu.

Saeh haenx dwg youq gou ngamq ndaej caet bi, seiz makdauz baenz seiz fatseng. Banhaemh, gou gaen daxmeh bae gyangdoengh ndaem naz dauqma, byaij gvaq aen hongh au Nungz ndawmbanj. Ndawhongh de ndaem miz go makdauz ndeu, gij makdauz venj rim gwnz go, lij miz nga faex makdauz he iet ok rog daeuj, gak youq gwnz ciengzcab, caen ciuyinx vunz. Dou ngamq souhong dauqma, caeux couh dungxiek youh hozhat. Gou doq byaij doq yawj, ngah gwn dangqmaz, ndwnj geij gaemz myaiz le, cij dingz din roengzdaeuj naj nding sing daemq naeuz daxmeh:“Meh, gou siengj gwn makdauz.”

Gou iqet couh roxsoq, ngamq hwnjhag doegsaw hix gwn ndaej haemzhoj, gaen vunzhung roengz naz bae reih guh hong, ndigah daxmeh bingzciengz cungj gig sim’in gou. Hoeng, mwhhaenx ndawranz boux guh naz ngamq ndaej faen naz, yienznaeuz miz ngaiz caeuq byaekheu gwn ndaej dungx imq, hoeng saedceij hix mbouj baenzmiz, lij caengz miz maz ngaenz lw bae cawx mak gwn.

Dou hix rox, au Nungz daengx ranz bouxboux cungj maij hangz vunz, baengh ndawranz gag guh aen diemq gai huq miz di ngaenz, couh yawj bouxwnq mbouj hwnj da. Simj Nungz engq dwg bakrwix, doxceng mbouj saw byawz gvaq……Daxmeh dauq dwg boux vunz sohnupnup, bingzciengz mbouj haengj caeuq vunz ceng maz.

Gou yawj ok daxmeh aengj- gyaengj lo, gou hix mbouj nyaenxsim daxmeh aenvih caeg mbaet mak hawj gou deng bouxwnq ndaq. Gou ngiengxgyaeuj muengh gij makdauz yinxvunz da he, ndwnj gaemz myaiz le, couh ngaemgyaeuj cienq ndang naeuz daxmeh:“Daxmeh, gou mbouj siengj gwn makdauz lo, raeuz baema loba.”

Aengjgyaengj yaep he, daxmeh vanzlij cuengq rap roengzdaeuj, siuj- sim sisi gingz diuz faexhanz raez- rangrang, ngaeu nye faex venj rim makdauz iet ok ciengzcab haenx roengzdaeuj, youh yuengq hwnjbae mbaet aeu song aen ceiq hung he couh cuengq fwngz lo. Hoeng, miz geij aen hix riengz daj nye faex “dung dung dung”doek roengz gwnzdieg daeuj.

“Dwg byawz? Yu, gaeb caeg bw! Byawz mbei baenz hung? Gingqyienz gamj daeuj caeg makdauz ranz gou? Hawj gou gaeb ndaej, yawj gou mbouj moeb raek ga ma mwngz bae ne!” Ndawranz de cienz ok gij sing ndaq simj Nungz daeuj.

Daxmeh doeksaet yat. Sikhaek vutvak song aen makdauz ndawfwngz bae, rag gou couh buet bae coh ranz dou……Caeklai ciengzcab ranz de dwg aeu namh daem ndaej sangset, yawj mbouj raen dou.

Daengz ranz le, daxmeh soeng gaemz heiq he, aeu fwngz cocadcad de lumh faj naj gou, faj naj gou aenvih buetdeuz bienq ndaej ndatfoedfoed, de sim’in dangqmaz. De raemxda rim gvaengz nai gou naeuz:“Lwg gou dingqgangj bw, mbouj dwg mak raeuz, dou mbouj gwn ndaej, baihlaeng daxmeh hix ndaem mak hawj mwngz gwn, ndei lwi?” Gou ngaekngaek gyaeuj, lumj rox mbouj rox, lij iet fwngz bae bang daxmeh uet raemxda gwnz naj.

Daj baezhaenx hwnj, moix baez ginggvaq mienh ciengz namh daem haenx, ndawsim gou cungj foekfan mbouj dingh. Gou gig boiqfug youh gamjaen mienh ciengz namh daem haenx. Aenvih de mboujdan bi dem bi henhoh go makdauz haenx, vanzlij baujhoh gou caeuq daxmeh gvaq. Mboujnex, simj Nungz haengjdingh nauh hwnjdaeuj, caemhcaiq seiqlengq boq loz naeuz dou dwg “fangz ngah” caeuq “caegsaeq”……Danghnaeuz caen dwg yienghde, vunz ranz dou caen mbouj miznaj saekdi lo? Seizneix, gou engq gamjaen, caeklai seiz iq miz daxmeh simsienh son gou baenzlawz guhvunz.

Bi daihngeih seizcin, ngoenzde hix dwg lumj ngoenzneix nei doek fwnmoenq. Daxmeh mbouj rox bae gyawz aeu ndaej song go faexdauz iq dauqma, angqvauvau naeuz yaek aeu daengz henz suen laeng ranz bae ndaem. Gou hix hozhaenz beq gvak bae bang daxmeh vat gumz, ndaem faexdauz, rwed raemx……Loengh ndaej gij dinvaq caeuq genbuh cungj boengzbwdbwd.

Yaep he, daxmeh iet hwet aeu fwngz rub gij byoem gyaeuj miz di luenh, unqswnh daengq gou menh di guh, dawz gvak gaej deng swhgeij. Gou ngiengxgyaeuj han sing ndeu:“W, gou rox lo!” Gou hix swnhfwngz aeu genbuh mad gij hanh najbyak bae. “Dah neix dwg lwg meuzraiz lobw!” Daxmeh raen naj gou uq lo, couh riu naeuz. Gou baez dingq, caeuq daxmeh cungj riuhaha, yied riu sim yied diemz.

Geij bi gvaqbae, youh dwg seiz rumz raeuj va hai, daengx biengz hoengzhoengz loegloeg. Ngoenz doek fwnmoenq, song go faexdauz haenx hai va lo. Gou caeuq daegnuengx dah- nuengx angqfwngfwng rag daxmeh caez bae yawj vadauz.

Gou baez daih’it baenz nyinh- caen cimyawj vadauz gyaeundei. Duj- duj vadauz limqlimq va cungj dwg hoengzmaeq, mizmbangj ngaemgyaeuj bemhbongz yaek hai, mizmbangj coh mbwn haihoengh doxhwnj, lij miz haujlai lupva iqet doxcomz youq gwnz nye faex dem, gyoengqde caeuq gij nyod heuoiq doxdaengh, engq yienjok gij dwggyaez gyaeundei. Dou youq laj godauz guhcaemz angqhoh, gij sing riu cang rim suen iq, cienz bae gizgyae.

Mbouj geij nanz, daengz seiz makdauz cug lo, haujlai aen makdauz hung daengj youq gwnz nye faex. Yienznaeuz dwg bi daih’it giet mak, mak mbouj suenq lai, hoeng gaenq hawj dou cungj angqyangz lo! Mbaet mak seiz, daxmeh gig gikdoengh, mbaet aen ceiq hung ndeu roengz- daeuj, bau haeuj dinbuh bae, song fwngz yunghrengz vaiqvit nu geij baez le, couh caet haeuj ndaw fwngz gou daeuj, daekeiq fwngfwng naeuz gou:“Dah gou, hawj mwngz aen ceiq hung, gwn ba, baezneix cuengqsim gwn!” Gou rox gij eiqsei de, ngaekngaek gyaeuj, aj bak yunghrengz haeb gaemz hung ndeu geux hwnjdaeuj, mizfeih raixcaix. Daxmeh sim angq riuhaha. Daegnuengx caeuq dahnuengx hix angqvauvau gwn, mbiengj diuq hwnj diuq roengz hemq: “O, o, ranz raeuz hix miz makdauz gwn lo!”

Baez yaepda couh gvaqbae haujlai bi lo, gou caeuq dahnuengx cungj doxgaen gauj ndaej swhfan yozyau, baez bizyez okdaeuj couh dang lauxsae lo. Daxmeh najrongh lai lo. De itcig nyinhdingh song go faexdauz haenx mboujdan ndaej baenz mak, vanzlij hawj ranz dou daiq daeuj haujlai caijsoq ndei dem, gij saedceij ndawranz gvaq ndaej ngoenz beij ngoenz ndei. Gou caeuq dahnuengx ndaej dang lauxsae, de couhdwg muengh gyoengq hagseng lumj godauz laeng ranz dou nei, va maez baenz mak rim lajmbwn.

Seizdoeng gvaqbae seizcin daengz, va loenq va youh hai, baez yaep da, ngeihcib lai bi couh gvaqbae lo. Gou caeuq doenghbaez doxdoengz, baez ndaej hoengq couh haengj bae ndawsuen daxmeh byaijbyaij. Daeg- bied dwg seizcin doek fwnmoenq, gou ceiq haengj bae yawj song go vadauz haenx, aenvih ndawde miz gij ngaeuz angq seiz iq, lij miz gij maqmuengh daxmeh……