Daengz Gvangjsih le, Cauzsan laujnungz caeuq vunzlai dangdieg doxndei caemh youq、naih haemz naih hoj、guhvunz aekgvangq, rox maz son maz cienz gij gingniemh gohyoz ndaem naz hawj Gvangjsih nungzminz liuxcaez. Beijlumj boux Cauzsan laujnungz haeuj Canghvuz Yen Sizgyauz Gunghse Cuzveiz Swnghcanjdui, ndaem gyaj ngoenzde, mbwn nit lij doek fwn, bouxcoz riengz de naeuz：“Doek fwn gvaq, ngoenzcog caiq guh hix mbouj nguh!”Cauzsan laujnungz mboujdan laemxsim laebdaeb guh, vanzlij caeuq gyoengq- de gangj：“Daih’it, gij gyaj ngoenzneix giemz, ngoenzneix mbouj ndaem roengz naz, caj daengz ngoenzcog cij ndaem couh sieng buek gyaj neix; daihngeih, gaiq naz ndeu ngoenz ndeu ndaem liux, cijndaej maj yinz, doxcaemh baenzhaeux, mboujnex couh miz camca, yingjyangj canjlieng; daihsam, ndaem naz aeu cadawz geiqciet, danghnaeuz bungz doek fwn couh mbouj ndaem, seizlawz cijndaej ndaem liux?”Baenzneix gangj hawj bouxcoz riengz cungj fug de caez, ndaej son ndaej rox. Ciuq 1965 nienz gyoepsuenq, bide Gvangjsih daengx gih haeuxgok cungjcanjlieng beij bi’gonq gyalai 12 ik lai gaen. Cauzsan laujnungz daeuj Gvangjsih cienz gingniemh gengndaem dwg gienh saeh hawj vunz yawjraen dangseiz daengx guek gak cuz yinzminz nyinhdoengz guekcoj hungmbwk, gaenxmaenx caeuqfaenh hwnqguh Cungguek Moq.

（Gvangjsih Minzcuz Yenzgiu Cunghsinh hawj gauj）