Baez gvaqcieng, Fuconh Yauzcuz Swciyen daj ndwencieng cocib daengz cibngux guh cungj minzsug hozdung noix raen ndeu—— “venj daeng caq lungz”. Laebdaeb geij ngoenz, doengh aen laeuzgaeuq Gujmingzsingz daj haet daengz haemh heiqyieng ngeungeu, vunz lai vunz daih. “Aen ciet venj daeng caq lungz” laeng Fuconh daj Mingzciuz couh miz, cienz daengz seizneix gaenq ndaej 400 lai bi.

Fuyangz Gujmingzsingz gungh miz 9 diuz gaigaeuq, moix diuz cungj miz aen laeuz ndeu. Danghnaeuz vunzlai gai de bineix miz lwg’iq doekseng, haemh ndwencieng cogouj ranzde couh aeu bae ndawlaeuz venj aen daeng va ndeu, neix couh dwg aen yizsiz “venj daeng”, vunzlai guh neix bae mbaenjgouz lwglan ndangcangq an’onj、 mbouj bingh mbouj nanh. Caenh bi de seng lwgdaeg couh guh aen daeng va haemq geizheih de; seng lwgdah, daeng va couh guh ndaej haemq gyaqciq. Moix bi ndwencieng cogouj daengz cibngux doengx haemh, beixnuengx Yauzcuz couh youq gwnz gai gehhongh yawj daeng、caq lungz, ciengzmienh nauhyied dangq- maz.

Gouj aen laeuz laeng Guj- mingzsingz cungj venj miz haujlai daeng va, gak cungj gak yiengh、yienghceij gyaeundei, ciuq dwk doengh aen laeuz ronghsagsag, hek- youz baebae dauqdauq, caenh haenh mbouj dingz. Moix aen laeuz lij cuengq miz baiz daeng duzlungz ndeu, gyanghaemh gwnhaeux imq le, gyoengqvunz couh hainduj cingj daeng duzlungz okbae foux lungz lo.

Vunzlai sien baiq aenlaeuz gonq, eiqsei dwg naeuz cojgoeng caemhcaiq angqhoh gai de youh dem lwg’iq. Singgyong goksadsad, aen doih foux- lungz couh daj ndawlaeuz cingj daeng duzlungz okdaeuj, youq gwnz gai youzbyaij guhcaemz, caeuq vunzlai gouz fuk. Aen doih caenh byaij gvaq hoh lawz, ranzde couh cuengq bauq mbouj dingz, duzlungz foux daengz gizlawz, singbauq couh yiengj daengz gizlawz. Vunzlai baihhenz caemh homx dwk baenz geij caengz, yawj da mbouj laep, gvaqyinx raixcaix.

Daengz ndwencieng cibngux daengzhaemh, doengh aen doih foux- lungz gak gai doxcomz Funghvuengz Gai doxdax. Caenh raen duzduz lungz daj gak aen dougai buet okdaeuj, singbauq gaen dwk yiengj hwnjdaeuj, daj iq daengz hung, vunzlai cungj riengz duzlungz bae. Ndaw doih foux- lungz, gyoengq hauxseng daenj buh- ndaem, duk gyaeuj daep goujcau, cug dinvaq, song fwngz gingz duzlungz, foux bae foux dauq, ndoj deuz gij bauq daj seiqhenz mbin daeuj haenx. Moix duz lungz aiq miz 13 daengz 15 vunz, faen guh cawlungz、gyaeujlungz、ndanglungz、rienglungz. Singgyong baez yiengj, gyaeujlungz dingj aen cawlungz cijveih, ciuq singgyong dazyinx ndanglungz caeuq rienglungz foux baedauq. Ndanglungz lij langh- baij baiqdangz、ra aencaw、ciengj aencaw、buenzlungz daengj. Ndang- lungz itbuen miz gouj、cib’it、cibsam、cibhaj hot. Gouj hot dwg lungzdinj, aeu bae biujyienj “gyaeujlungz con va” “duzlungz baetrieng” “ngwz boklonj” daengj. Cib’it hot doxbae dwg lungzraez, cawjdaeuz aeu bae biujyienj “cap va” “baij cihsaw”. Lumjbaenz baij “喜”“福”“吉祥如意” daengj cihsaw.

Vunzlai raen duzduz lungz buet daeuj, couh gveng bauq haeuj duzde bae. Bauq caq ndaej lai, gyoengq fouxlungz diuq ndaej engq sang, ndoj engq lingzvued. Singbauq singgyong doxgyaux, nauhyied raixcaix. Duzduz lungz foux baedauq, roixroix bauq dekbembem, vunz lai lumj raemx- langh, bouxboux cungj angq gvaq ciet.

“Aen ciet venj daeng caq lungz” Fuconh ndaej senj haeuj buek daihhaj swcigih gaep feihyiz mingzloeg. Bauq dek bya roxsingj, lungz bongh gaiq- gaiq hoengh. Bineix, vunzlai Fuconh camhseiz mbouj guh aen ciet neix lo, gyoengqde cingq deq binghraq deuz bae, deq seizcin dauqma, bak va hailangh, deq gak dieg hekyouz dauq daeuj guhcaemz.