It

“Di di di”, raq sing lahbah ci he youh coeg haeuj rwz daeuj, geij aen ciiq buet haeuj ndawmbanj.

Ngoenzneix dwg ngux nyied co- ngux, ndawmbanj miz vunz hai ci dauq mbanjranz lo. Ci lai, mbouj miz baenzlai dieg dingz ci, mbangj vunz dingz youq najranz cihgeij, mbangj vunz dingz youq song mbiengj diuz lohmbanj, aen dep aen, diuz loh bienq ndaej gig gaeb.

Bohgeiz naemj: Seizneix ndaw- mbanj ciiq lai, cihgeij dwg daeuz- mbanj, aeu naemj guh aen dieg- dingzci ndeu cij ndaej.

Baihdoeng gyaeujmbanj miz benq reih gvangqlangh he, gij reih neix dwg geij ranz vunz doxrangh, Bohgeiz hix miz sam faen reih youq ndawde. De heuh gyoengqvunz daeuj, naeuz naemj aeu benq reih neix guh aen diegdingzci he, cihgeij sam faen reih haenx mbouj suenq, rau aeu reih bouxlawz, daihgya caez ok di cienz hawj.

Simjngeih naeuz:“Cwngfuj hawj geij duz cwz daeuj banggungz, gou cingq naemj aeu reih daeuj guh rienghcwz.”

Lauxcinz naeuz:“Gou miz sam daeglwg, ranz mbouj gaeuq youq, aeu ce diegreih hawj gyoengqde guh ranz.”

Raen Simjngeih caeuq Lauxcinz baenzneix gangj, gyoengqvunz hix ra saeh neix saeh haenx daeuj doi. Mbouj doengzsim nanz guh baenz saeh, Bohgeiz siengj guh diegdingzci gij saeh neix couh cuengq roengzdaeuj gonq.

Ngeih

Ngoenz he banringz, Bohgeiz caeuq geij boux vunz comz youq bakdou gangjgoj.

“Gyoengq beixnuengx ndei, gou ma daengz lo!” Aen sing goksad he doq gangj doq riu byaij gvaqdaeuj.

“Mehgeiz, mwngz youh dauq ranz yawj Bohgeiz lo.”

“Youq rog guhhong ndaej ngaenz lai bw, yawj yiengh couh rox lo.”

“Mehgeiz, mwngz seizlawz caiq okbae, gou gaen mwngz caez bae, mbouj siengj youq mbanj guh hongnaz lo.”

Gyoengqvunz humx gvaqdaeuj, naeuz Mehgeiz.

“Dahgeiz gou gaenq doeg daihhag bizyez， hix ra ndaej hong guh lo, gou mbouj you baenzlai lo, mbouj caiq naemj ok rog guhhong, netsim youq ranz, gyaez guh maz couh guh maz.” Mehgeiz riu naeuz gyoengqvunz.

Bohgeiz dingq le, coh mehyah riuriu, mbouj gangj maz.

Bohgeiz dwg daeuzmbanj, ndaw- mbanj saeh hung saeh iq cungj ra de, lij aeu goq hongranz, de rox Mehgeiz youq rog dajgoeng sinhoj, cihgeij youq ranz hix mbouj ndaej soeng saek seiz gvaq.

Gwn caeuz le, mbwn fuemx lo, ndawmbanj lohdaeng ronghsagsag. Mehgeiz rag aen yinhsiengh ok najranz daeuj. “Gum, gum, gum”, sing go goksasa yiengj doh ndawmbanj, gyoengqvunz cungj buet gvaqdaeuj yawj dwg maz saeh.

“Daeuj diuq fouxgvangjcangz lo!” Mehgeiz riu naeuz.

Yienznaeuz seizneix ndawsingz lajmbanj cungj hwng diuq fouxgvangj- cangz, hoeng caengz raen miz vunz youq ndawmbanj diuq gvaq, gyoengq- vunz roxnyinh citgeiz, cungj humx gvaqdaeuj yawj.

Gyoengqvunz ndwn gyae yawj Mehgeiz diuqfoux, mbouj miz vunz yamq din bae caez hag diuq.

Haemh daihngeih, gyoengqvunz mbouj caiq daj gyae muengh Mehgeiz diuqfoux lo, yied gyaed yied daeuj gyawj.

Simjngeih caeuq geij mehyah byaij gvaqdaeuj, naeuz:“Mehgeiz, dou daeuj gaen mwngz hag diuqfoux lo!”

Mehgeiz riu naeuz:“Gou cingq muengh vunzlai caez daeuj diuq cij nauhyied ne.”

“Nduj hag diuqfoux, raeuz sien lienh dinga gonq, dinga lienh ndei le, song cik gen couh rox doengh, menhmenh couh diuq baenz lo.Gizsaed diuq fouxgvangjcangz hix mbouj nanz, baedauq cungj dwg geij aen dungcoz haenx, diuq lai couh rox.” Mehgeiz naeuz gyoengq mehyah.

Sam

Daj neix hwnj, baihnaj ranz Bohgeiz couh bienq ndaej nauhyied lo, Mehgeiz haemhhaemh son gyoengq mehyah ndawmbanj diuqfoux, gyoengq bouxsai、bouxgeq caeuq lwgnyez humx youq seiqhenz yawj.

Bohgeiz naengh aen daengq daemq he, dinghdingh yawj Mehgeiz gyoengqde diuqfoux.

Gaxgonq Mehgeiz vahnoix, caeuq vunzwnq lai gangj saek coenz vah cungj najhoengz, de youq rog dajgoeng hag rox diuq fouxgvangjcangz le, bienq ndaej gyaez gangj gyaez riu, Bohgeiz lumjbaenz seizneix ngamq roxnaj de nei.

Mehgeiz son gyoengq mehyah haenx diuqfoux yied diuq yied baenz yiengh, gyoengq vunzmbanj miz di doeksaet, cungj naemj: Laihnaeuz bang mehyah neix baenzciuh cij rox ngaemgyaeuj guh nazreih ne, byawz rox lij rox monz hong neix.

Haemhneix, Bohgeiz riunyum- nyum naeuz gyoengq mehyah:“Ndwenlaeng ndaw yangh gawjhengz aen doxdax diuq fouxgvangjcangz, sou aeu nyinhcaen bae hag bae lienh, ceng’aeu aen mingz ndeu rongh naj mbanj raeuz bw.”

“Laemxsim guh yienghlawz, cungj guh ndaej baenz, gyoengq dahcej dahnuengx, sou naeuz dwg mbouj?” Mehgeiz naeuz.

“Mehgeiz gangj ndaej deng, raeuz caemh mbouj yaez, mbouj hawj doeklaeng bw!” Gyoengq mehyah naeuz.

Daengz ngoenz doxdax diuqfoux, Bohgeiz caeuxcaeux hwnqcongz, hai ci soengq Mehgeiz gyoengqde daengz gwnz haw. Ndaw yangh baez daih- it guh aen hozdung neix, gwnz haw vunz ndaetfwdfwd, bouxboux angq- fwngfwng yawjngonz.

Lwnz daengz Mehgeiz gyoengqde diuqfoux lo, gyoengqde diuq aen foux《Eu Hot Fwen Ndeu Hawj Dangj Dingq》, ngamq diuq sat, gyoengqvunz sikhaek dopfwngz robrob, singriu singhemq goenjoo. Mehgeiz aen doih neix ndaej faensoq ceiq sang, ndaej daih’it.

Seiq

Ndawmbanj goenj hwnjdaeuj lo, gyoengq vunzmbanj naeuz, Mehgeiz gyoengqde vih ndawmbanj cengnaj, byaij daengz gyawz cungj roxnyinh miznaj raixcaix. Dingq gyoengqvunz baenzneix gangj, Bohgeiz ndawsim diemzswdswd.

Gyoengqvunz engq gyaez daeuj najranz Bohgeiz doxcomz lo, doengx- ngoenz guhcaemz gangjgoj, doengx- haemh daeuj diuqfoux, sai mbwk laux iq cungj daeuj.

Haemhhaemh baenzlai vunz daeuj, najranz Bohgeiz coux mbouj ndaej roengz lo. Miz vunz naeuz:“Mboujyawx raeuz guh aen dieg iq he, haethaemh cungj ndaej youq gizde diuqfoux、gangjgoj.”

“Bohgeiz mboengqgonq gaenq naeuz gvaq lo, naeuz seizneix ca mbouj lai ranzranz miz ciiq, siengj youq baihdoeng gyaeujmbanj guh aen diegdingzci he. Siengj rau aeu reih geij ranz haenx daeuj guh, hix caeuq gyoengqde doxyaeng gvaq, caengz gangj ndaej doeng. Danghnaeuz ndaej guh aen diegdingzci he, ndaej dingzci youh ndaej diuqfoux, geijlai ndei ha!” Miz vunz han naeuz.

Simjngeih daeuj diuqfoux dingq- nyi gyoengq beixnuengx ndawmbanj baenzneix gangj, de naemj hwnj mboengqgonq cihgeij gangj gvaq gij vah haenx, naj fwt hoengz, ndawsim gig mbouj onj.

Lauxcinz naengh youq henz hix dingqnyi lo, de mbon geu ien he daeuj cit, song da muengh coh baihdoeng gyaeujmbanj, lumj naemj maz saeh nei.

Haj

Baez yaepda youh daengz cieng lo, gyoengqvunz doxcunz ndoet laeuj nauhyied dangqmaz, ciiq baij rim song mbiengj diuz lohmbanj.

Haetneix, Bohgeiz caeuq Meh- geiz cingq gwn ngaizromh, dingqnyi rog ranz cauzswdswd, miz vunz sing hung buet daeuj heuh de, naeuz haemhlwenz ndawmbanj fatseng saeh- hux lo. Bohgeiz baez yawj, dwg Simjngeih caeuq Lauxcinz.

Laxlawz, haemhlwenz gyang- hwnz, daeglwg Simjngeih daj ndaw- mbanj hai ci okbae, daeglwg Lauxcinz daj rog hai ci haeuj mbanj ma. Aenvih diuz lohmbanj song mbiengj cungj baij rim ciiq, loh bienq ndaej gaebgebgeb, song aen ci doxngveq mbouj ndaej, caez doek roengz laj loh bae lo. Caeklaiq vunz mbouj deng sieng, ci deng bungq vaih.

Lauxcinz naeuz:“Bohgeiz, dou geij ranz doxyaeng gvaq lo, gietdingh aeu reih baihdoeng gyaeujmbanj guh aen diegdingzci he.”

Simjngeih naeuz:“Bohgeiz, mboengqgonq mwngz naeuz guh dieg- dingzci, gaiq reih cihgeij mbouj suenq, rau aeu reih ranz lawz, caezgya ok di cienz, mwngz guh ndaej daengz, dou hix guh ndaej daengz, mbouj rau reih, hix mbouj aeu cienz lo.”

Bohgeiz naeuz:“Sou naemj doeng couh ndaej.”

Haicin lo, ndit raeuj lo, gyoengq- vunz mbangj hai gouhgih vat namh, mbangj hai ci daeh rin、daeh suijniz haeuj mbanj daeuj, caezgya nyaengq- foedfoed guhhong.

Mbouj geij nanz, gyaeujmbanj couh guh baenz aen diegdingzci ndeu lo. Aen diegdingzci seiqhenz ndaem haujlai gofaex caeuq gova, lij baij miz haujlai aen daengqfaex dem. Ciiq dingz youq seiqlengq, cungqgyang gvangqlumlum ce hawj vunzmbanj diuqfoux, guh yiengh ndeu ndaej sam yiengh daeuj yungh, dij.